އިންތިޚާބީ ރައީސް އިބްރާހީމް މުހައްމަދު ސޯލިހުގެ ވެރިކަމުގެ ފުރަތަމަ 100 ދުވަހުގެ ލަނޑުދަނޑި ހާސިލްކުރުމަށް ކަނޑައަޅާފައިވާ ކަންކަން ހާސިލްކުރެވޭނެ ކަމަށާއި، ރައްޔިތުން ކުރި އިތުބާރު ދަމަހައްޓާނެ ކަމަށް އެމްޑީޕީ ސަރުކާރުގެ ހައުސިންގ މިނިސްޓަރ މުހައްމަދު އަސްލަމް ވިދާޅުވެއްޖެއެވެ.

ރާއްޖެޓީވީގެ "އާ ދައުރު" ޕްރޮގްރާމްގައި އަސްލަމް ވިދާޅުވީ ސަރުކާރެއް އުފެދިގެން އަންނައިރު ރައްޔިތުން އެސަރުކާރެއް މިނެކިރާނީ ފުރަތަމަ 100 ދުވަހުގެ ތެރޭގައި ހިނގާ ކަންތައްތަކަށް ބެލުމަށް ފަހު ކަމަށެވެ. އަދި މިއީ ދުނިޔޭގެ އެހެން ހިސާބުތަކުގައި ކަންތައް ހިނގާ ގޮތް ކަމަށް އޭނަ ވިދާޅުވިއެވެ.

އަސްލަމް ވިދާޅުވީ 2008 ވަނަ އަހަރު އެމްޑީޕީ ވެރިކަމުގައި މަސައްކަތް ކުރީ މި އުސޫލުން ކަމަށާއި، 100 ދުވަހުގެ ތެރޭގައި ކުރެވޭނެ ކަންތައްތައް ކަނޑައަޅައި އެމަސައްކަތް ކުރި ކަމަށެވެ. އަދި އިންތީޚާބީ ރައީސް ސޯލިހުގެ ވެރިކަމުގައި ވެސް މިމަސައްކަތް އެ ގޮތަށް ކުރިއަށްދާނެ ކަމަށް އަސްލަމް ވިދާޅުވިއެވެ.

"100 ދުވަހުގެ ތެރޭގައި ހިންގުމަށް ކަނޑައެޅިފައި ހުރި މަސައްކަތްތަކަކީ އަޅުގަނޑުމެންގެ މެނިފެސްޓޯގައި ހިމެނިފައި ހުރި ކަންތައްތަކާއި ރައީސުލްޖުމްހޫރިއްޔާ ކަމަށް އިންތިޚާބު ވުމަށްޓަކައި އަޅުގަނޑުމެންގެ ކެންޑިޑޭޓް އިބްރާހިމް މުހައްމަދު ސޯލިހު މިއަދުގެ އިންތިޚާބީ ރައީސް އަތޮޅުތަކަށްށާއި، ކުރެއްވި ކެންޕޭން ދަތުރުތަކުގައި ވެވަޑައިގެންނެވި ވައުދުތަކުގައި ހުންނާނެ އަޅުގަނޑުމެން އެންމެ ފުރަތަމަ ކުރާނެ ކަންތައްތަކެއްގެ ގޮތުގައި ފާހަގަކޮށްފައި. އެކަންތައްތައް ހިމެނިގެން 100 ދުވަހުގެ ތެރޭގައި އަޅުގަނޑުމެން މަސައްކަތްތަކެއް ކުރާނެ،" އަސްލަމް ވިދާޅުވިއެވެ.

އަސްލަމް ވިދާޅުވީ ބައެއް މަސައްކަތްތަކަކީ 100 ދުވަހުގެ ތެރޭގައި ފެށިގެން ކުރިއަށްދާނެ މަސައްކަތްތައް ކަމަށާއި، އަނެއް ބައި މަސައްކަތަކީ 100 ދުވަހުގެ ތެރޭގައި ނިންމާނެ މަސައްކަތް ކަމަށެވެ.

އެގޮތުން އެންވަޔަރަންމަންޓަލް ޕްރޮޓެކްޝަން އެޖެންސީ މިނިވަން މުއައްސަސާއަކަށް ބަދަލުކޮށް އެންވަޔަރަންމަންޓް މިނިސްޓްރީގެ ބާރާއި، ނުފޫޒު ނުފޯރުވޭ މުއައްސަސާއަކަށް ބަދަލުކުރާނެ ކަމަށް އަސްލަމް ވިދާޅުވިއެވެ. އަދި ވިދާޅުވީ މިފާއިތުވި ފަސް އަހަރު އީޕީއޭއަށް މިނިސްޓްރީގެ ނުފޫޒު ވަރަށް ބޮޑަށް ފޯރުވާފައިވާ ކަމަށެވެ.

މާލޭގެ މަގުތަކުގެ ހާލަތު ބަޔާންކޮށް އަސްލަމް ވިދާޅުވީ އިންތިޚާބީ ރައީސް ސޯލިހުގެ ވެރިކަމުގައި ޕާކުކުރާނެ ތަނެއް ނުދައްކައި ޖުރިމާނާ ނުކުރާނެ ކަމަށެވެ. އަދި ވިދާޅުވީ މަގުމަތީގެ ހާލަތު ބަދަލު ކުރުމަށް ފުރަތަމަ 100 ދުވަހުގެ ތެރޭގައި މަސައްކަތް ފަށާނެ ކަމަށާއި، އޭގެ ތެރެއިން ބައެއް މަސައްކަތްތައް 100 ދުވަހުގެ ތެރޭގައި ހާސިލްކުރާނެ ކަމަށެވެ.

އަސްލަމް ވިދާޅުވީ ފަސް އަހަރުގެ ދައުރު ނިމެންދާއިރު މާލޭގައި ދިރިއުޅުމަށް ހުރި ދަތިތައް ހައްލު ކުރެވި، މަގުމައްޗަކީ އެންމެނަށް ވެސް ފަސޭހަތަނަކަށް ބަދަލުވެގެންދާނެ ކަމަށެވެ. ވެހިކަލްތައް ޕާކު ކުރެވޭނެ އިންތިޒާމްތައް ހަމަޖައްސައި މާލޭގެ ޓްރެފިކަށް ބޮޑު ބަދަލުތަކެއް ގެންނާނެ ކަމަށް ވެސް އޭނާ ވިދާޅުވިއެވެ.