މަޖިލީހުގެ ނައިބު ރައީސް މޫސަ އިސްތިއުފާ ދެއްވުމަށް މެމްބަރު ސައުދު ގޮވާލައްވައިފި
ޕާޓީ ބަދަލު ކޮށްގެން ގޮނޑި ގެއްލޭ ނަމަ މޫސަ ޕާޓީ ބަދަލު ކުރުމުން ގޮނޑި ގެއްލެން ޖެހޭ
ވިލިނގިލީ ދާއިރާގެ މެމްބަރު ސައުދު ހުސައިން
ރައްޔިތުންގެ މަޖިލީހުގެ ރައީސް މޫސާ މަނިކު ވަގުތުން އިސްތިއުފާ ދެއްވުމަށް ވިލިނގިލީ ދާއިރާގެ މެމްބަރު ސައުދު ހުސައިން ގޮވާލައްވައިފިއެވެ.
ސައުދު ކުރެއްވި ޓްވީޓެއްގައި ވިދާޅުވީ މަޖިލީހުގެ ހާލަތު ގޯސްވީ މަޖިލީސް ރައީސް އާއި ނައިބު ރައީސް އެކުވެ މަގާމަށް ދަހިވެތިވެ މަޖިލިސް ހިސޯރު ކުރުމުންކަމަށެވެ. އަދި ޕާޓީ ބަދަލު ކޮށްގެން ގޮނޑި ގެއްލޭ ނަމަ މޫސަ ޕާޓީ ބަދަލު ކުރުމުން ގޮނޑި ނުގެއްލެންވީ ސަބަބެއް ނެތް ކަމަށް ސައުދުގެ އެ ޓްވީޓުގައި ވިދާޅުވިއެވެ.
ސައުދު އެގޮތަށް ޓްވީޓް ކުރެއްވީ ވޭތުވެ ދިޔަ ތަނުގައި މަޖިލީހުގެ ހާލަތު އޮތް ގޮތުން ދެރަވެ ހިތާމަކުރައްވާކަމަށް މޫސަ ވިދާޅުވުމާއި ގުޅިގެންނެވެ.
މޫސަ ވިދާޅުވީ ރައްޔިތުންގެ މަޖިލީސް ވަރަށް ބޮޑުތަނުން ވަޅުޖަހައި، މަޖިހިލީހުގެ ވާހަކަ އެ ކިގޮތަށް ދައްކައި، މަޖިލިސް އޮތީ ވަރަށް ނިކަމެތިކޮށް ކަމަށެވެ. އަދި މަޖިލީހަކީ އެހެން ވެގެންވާނެ ތަނެއް ނޫން ކަމަށާއި މަޖިލީހުގައި 15 ވަރަކަށް އަހަރު ހޭދަވެފައިވާއިރު މިފަދަ ދުވަސްތަކެއް ދެކެވަޑައި ނުގަންނަވާ ކަމަށް މޫސަ ވިދާޅުވިއެވެ.
މޫސަ ވިދާޅުވީ މަޖިލީހުގެ މެމްބަރެއްގެ ހައިސިއްޔަތުން އެކަމާ ހިތްދަތިވާ ކަމަށާއި މަޖިލީހުގެ ރައީސަށް އިހްތިރާމް ކުރުމުގެ ގޮތުން މަޤާމްގައި ހުންނެވީ ކަމަށެވެ.
