ޖަމާލް ޚަޝޯގީގެ މަރުގެ މައްސަލައިގައި ތުހުމަތުކުރެވޭ 15 ފިރެހެނުންގެ ޓީމުގެ މެމްބަރަކު ޚަޝޯގީ މަރާލި ދުވަހު އޭނާގެ ހެދުން ލައިގެން އިސްތަންބޫލްގެ ތެރޭގައި އުޅެފައިވަނިކޮށް ސީސީޓީވީ ފުޓޭޖަށް އަރާފައިވާ ކަމަށް ތުރުކީގެ އިސް އޮފިޝަލަކު ސީއެންއެންގައި ބުނެފިއެވެ.

ސީއެންއެން އިން ބުނެފައިވާ ގޮތުގައި އެ އިދާރާ އަށް ވެސް ވަނީ ތުރުކީ ސަރުކާރުގެ ތަހުގީގު ޓީމުގެ ވީޑިއޯގެ ބައެއް ލިބިފައިވާއިރު އެ ވީޑިއޯއިން ފެންނަ ގޮތުގައި ޚަޝޯގީގެ ހެދުމުގައި ހުންނަ މީހަކު ކޮންސިއުލޭޓްގެ ފުރަގަސް ދޮރުން ނުކުމެގެން ދާތަން ފެނެއެވެ. އަދި އެ މީހަކު ފޭކް ތުނބުޅިއެއް ޖަހާފައި ހުރިއިރު ހުރީ އައިނެއް ވެސް އަޅައިގެންނެވެ.

ޚަޝޯގީ އެންމެ ފަހުން ދިރިހުއްޓައި ފެނުނު ދުވަސް ކަމަށްވާ އޮކްޓޯބަރު މަހުގެ 2 ވަނަ ދުވަހު ޚަޝޯގީ ފެނުނުތާ ގަޑިއިރުތަކެއް ފަހުން ހަމަ އެ މީހަކު އިސްތަންބޫލްގެ މަޝްހޫރު ބްލޫ މޮސްކުން ފެނިފައި ވެއެވެ.

ވީޑިއޯ އިން ފާހަގަވެފައިވާ މީހަކީ ޚަޝޯގީ މަރާލުމަށް ކޮންސިއުލޭޓަށް ފޮނުވި މީހުންގެ ތެރޭގައި ހިމެނޭ މުސްތަފާ އަލް މަދަނީ ނަކަމަށް ކިޔާ މީހެއް ކަމަށް ތަހުގީގު ޓީމުން ބުނެއެވެ.

އޮކްޓޯބަރު މަހުގެ 2 ވަނަ ދުވަހު ޚަޝޯޯގީ ކޮންސިއުލޭޓަށް ގޮސްފައި ވަނީ ތުރުކީގެ އަންހެނަކާ ކައިވެނިކުރުމަށްޓަކައި ކުރިން ކުރި ކައިވެނީގެ ސެޓްފިކެޓް ބަލައެވެ.

ޚަޝޯގީގެ މައްސަލައިގައި ތުރުކީގެ ވާހަކަތައް އެކި ފަހަރުމަތިން އަންނަނީ ބަދަލުވަމުންނެވެ.

ގެއްލިފައިވާތާ ގާތްގަނޑަކަށް 18 ދުވަސް ފަހުން ސައުދީން ވަނީ ޚަޝޯގީ މަރާލާފައިވާ ކަމަށް އެއްބަސްވެފައެވެ.

ސައުދީ އިން ބުނެފައި ވަނީ ޚަޝޯގީ މަރާލާފައި ވަނީ ތުރުކީގައި ހުންނަ ސައުދީ ކޮންސިއުލޭޓްތެރޭގައި ހުރި މީހަކާއި ޚަޝޯގީއާއި ދޭތެރޭ ހިނގާދިޔަ ޒުވާބެއްގެ ތެރޭގައި ކަމަށެވެ. އެހެން ނަމަވެސް އެ ޒުވާބު ހިނގާދިޔައީ ކާކާއި އެކުގައި ކަމެއް ހާމައެއް ނުކުރެެއެވެ. ސައުދީގެ ދައުލަތުގެ މީޑިއާއިން ހާމަކޮށްފައިވާ ގޮތުގައި ޚަޝޯގީގެ ތަހުގީގީ ރިޕޯޓް ނެރޭނީ އެއްމަސް ދުވަސް ފަހުންނެވެ.