ކުރީގެ ރައީސް މުހައްމަދު ނަޝީދު އަވަށްޓެރި ސްރީލަންކާ އަށް ވަޑައިގަންނަވައިފިއެވެ.
އިނގިރޭސިވިލާތުގެ ހިމާޔަތް ހޯއްދަވައިގެން އެ ގައުމުގައި ދިރިއުޅުއްވާ ރައީސް ނަޝީދު ދޭތެރެދޭތެރެއިން އަވަށްޓެރި ސްރީލަންކާ އަށް ވަޑައިގަންނަވައެވެ.
ހޯމަ ދުވަހު ރައީސް ނަޝީދު ސްރީލަންކާ އަށް ވަޑައިގެންނެވި އިރު އެމަނިކުފާނު ވަނީ ނޮވެމްބަރު މަހުގެ 1 ވަނަ ދުވަހު ރާއްޖެ ވަޑައިގަންނަވާނެ ކަން އިއުލާން ކުރައްވާފައެވެ.
މިދިޔަ ސެޕްޓެމްބަރު މަހުގެ 23 ގައި ބޭއްވި ރިޔާސީ އިންތިހާބު ގުޅިފައިވާ ސިޔާސީ ޕާޓީތަކުގެ ރިޔާސީ ކެންޑިޑޭޓް އިބްރާހީމް މުހައްމަދު ސޯލިހު (ސޯލިހު) ކާމިޔާބު ކުރެއްވުމާ ގުޅިގެން ސިޔާސީ ދައުވާތަކެއްގައި ޖަލުގައި ބަންދުކޮށްފައިވާ ގިނަ ބަޔަކު ދަނީ މިނިވަން ކުރަމުންނެވެ. އަދި ކޯޓުގެ އެކިއެކި މަރުހަލާތަކުގައި ހުރި މައްސަލަތައް ވެސް ނިންމުމުގައި ދައުވާ ލިބޭ ފަރާތްތަކަށް ކާމިޔާބުވާތަން ވަނީ ފެންނަން ފަށައިފިއެވެ.
އެގޮތުން މިދިޔަ ހަފްތާގައި ކުރީގެ ރައީސް މައުމޫން އަބްދުލްގައްޔޫމްގެ މައްޗަށް ކޮށްފައިވާ ޖަލު ހުކުމުން ސަލާމަތް ވެވަޑައިގެންފައި ވާއިރު، ހޯމަ ދުވަހު ވަނީ ޖުމްހޫރީ ޕާޓީގެ ލީޑަރު ގާސިމް އިބްރާހީމްގެ މައްޗަށް ކްރިމިނަލް ކޯޓުން އިއްވާފައިވާ ޖަލު ހުކުމް ބާތިލްކޮށް، ގާސިމް ވެސް މިނިވަން ކޮށްފައެވެ.
