ޓައިވާނުގެ އިރުއުތުރުގައި ފަސިންޖަރުން އުފުލާ ރޭލެއް ދަގަނޑުން ކައްސާލައި މަދުވެގެން 18 މީހުން މަރުވެ 170 މީހުން ޒަޚަމްވެއްޖެއެވެ.
ޔިލަން ކައުންޓީގައި އާދީއްތަ ދުވަހު 16:50 ހާއިރު ހިނގި ހާދިސާ ތަހުގީގު ކުރަމުންދާ ކަމަށް ރެއިލްވޭ އޮތޯރިޓީން ވަނީ ބުނެފައެވެ.
ޓައިޕެއި އާއި ޓައިޓުންގްއާ ދެމެދު ދަތުރު ކުރި އެ ރެއިލްގައި 366 ފަސިންޖަރުން ދަތުރުކުރިއެވެ. ރޭލުގެ އަށް ބުރި ވެސް ވަނީ ދަނގަޑުން ކައްސާލާފައެވެ.
ކަމާބެހޭ ފަރާތްތަކުން ބުނެފައި ވަނީ ރޭލުގައި ތިބި އެންމެން ވެސް މިހާރު ރޭލުން ނެރެފައިވާ ކަމަށެވެ.
ޓައިވާނުގެ ރެއިލްވޭ އެޑްމިނިސްޓރޭޝަން ގެ ޑެޕިއުޓީ ޗީފް ލޫ ޝިއެ ޝެން އާދީއްތަ ދުވަހު ބޭއްވި ނޫސްކޮންފަރެންސެއް ގައި ވިދާޅުވީ އެ ރޭލަކީ އެންމެ ހަ އަހަރުވީ ރޭލެއް ކަމަށާއި އެކްސިޑެންޓްގެ ކުރިން އޭގެ ހާލަތު ރަނގަޅު ކަމަށެވެ.
އެކްސިޑެންޓް ދިމާވި ސަބަބު އަދި ސާފު ނުވި ނަމަވެސް މަންޒަރުދުށް ބައެއް މީހުން ބުނެފައިވާ ގޮތުގައި ގަދަ އަޑަކާއެކު ކަނިބުރާ މަންޒަރާއި ދުން ފެނިފައިވެއެވެ.
