ކަންތައްތައް އޮމާންކޮށް ހިނގައިދާނެ ކަމަށް ބަލައިގެން ނުވާނެ: ރައީސް ނަޝީދު
ސިޔާސީ ޕާޓީތަކުން ކުރަންޖެހޭ މަސައްކަތް ބޮޑު ކަމަށް ވިދާޅުވި
ރައީސް މުހައްމަދު ނަޝީދު
ރިޔާސީ އިންތިޚާބުން ރައީސް އަބްދުﷲ ޔާމީން ބަލިވެފައިވުމުން ބާރުތައް ބަދަލުވުމުގެ މި މަރުހަލާގައި ކަންތައްތައް އޮމާންކަމާއި އެކު ހިނގައިދާނެ ކަމަށް ގަބޫލު ކުރުން ބުއްދިވެރި ނޫން ކަމަށް ކުރީގެ ރައީސް މުޙައްމަދު ނަޝީދު ވިދާޅުވެއްޖެއެވެ.
އިންޑިއާގެ ދަ ހިންދޫ ނޫހަށް ދެއްވި ޚާއްސަ އިންޓަވިއު އެއްގައި ނަޝީދު ވިދާޅުވީ ރިޔާސީ އިންތިޚާބާއި ގުޅިގެން ސުޕްރީމް ކޯޓަށް ހުށަހަޅާފައިވާ މައްސަލަ އަށް ނުފޫޒް ފޯރުވަން ރައީސް ޔާމީން މަސައްކަތް ކުރައްވަމުން ގެންދަވާ ކަމަށެވެ.
ދަ ހިންދޫ ނޫހުގައި ބުނެފައިވާ ގޮތުން ނަޝީދު ތުހުމަތު ކުރައްވަނީ ރިޔާސީ އިންތިހާބު ބާތިލުކުރަން އެދިވަޑައިގެން ރައީސް ޔާމީނު ހުށަހަޅުއްވާފައިވާ މައްސަލައިގައި ގޮތެއް ނިންމަން ސުޕްރީމްކޯޓަށް ނުފޫޒް ފޯރުވަނީ ކޮމިޝަނަރ އޮފް ޕޮލިސް މެދުވެރި ކުރައްވައެވެ.
ނަޝީދު ވިދާޅުވީ ކަންތައްތައް ހިނގަމުންދާ ގޮތަށް ބަލާއިރު، ބާރުތައް ބަދަލުކުރުމާ ހަަމައަށް ކަންތައްތައް އޮމާންކޮށް ހިނގައިދާނެކަމަށް ބެލުމަކީ ބުއްދިވެރިކަމެއް ނޫން ކަމަށެވެ.
މީގެ އިތުރުން ދިވެހި ރާއްޖެއަކީ އެމަނިކުފާނުގެ ވަތަން ކަމަށާއި އެނބުރި ވަޑައި ނު ގަތުމަށް އެއްވެސް މީހަކަށް ނު ބުނެވޭނެ ކަމަށް ވެސް ނަޝީދު ވިދާޅުވިއެވެ. ނަޝީދު އެގޮތަށް ވިދާޅުވީ ރާއްޖެ އަށް އެނބުރި ވަޑައިގެންނެވުމާ ބެހޭ ގޮތުން ކުރި ސުވާލަށް ޖަވާބު ދެއްވަމުންނެވެ.
ނަޝީދު ވިދާޅުވި ގޮތުގައި ރާއްޖޭގައި އޮތީ ވާނެގޮތެއް ނޭނގޭ ހާލަތެކެވެ. އެހެންވެ އެކަންކަމަށް ގުޅިފައިވާ ޕާޓީތަކަށް ކުރެވިދާނެ ގިނަ ކަންތައްތަކެއް އެބަހުރި ކަމަށް ނަޝީދު ވިދާޅުވެއެވެ. އެގޮތުން މަގުމަތީ ޙަރަކާތަކަށް ނުކުތުން ނަޝީދު ފާހަގަކުރެއްވިއެވެ.
މަގުމަތީ ހަރަކާތަށް ނުކުތުމުގެ ވާހަކަ ނަޝީދު ވިދާޅުވި ނަމަވެސް އެކަމުގެ ސަބަބުން ގެއްލުމެއް ލިބިދާނެކަމުގެ އިޝާރާތެއް ވެސް ވަނީ ދެއްވާފައެވެ. އެގޮތުން މަގުމަތީ ހަރަކާތަށް ނުކުތުމަކީ އެކަމުގައި ގެއްލުން ވުމުގެ ނުރައްކާ އޮތް ކަމެއް ކަމަށް ނަޝީދު ވިދާޅުވިއެވެ.
ނަޝީދު ވިދާޅުވީ މަގުމަތީ ޙަރަކާތަށް ނުކުތުމަކީ އެއްވެސް އިރެއްގައި ފަސޭޙަކަމެއް ނޫން ކަމަށެވެ. އަދި މަގުމަތީ ހަރަކާތްތައް ހިނގުމުގެ ކުރިން ސުޕްރީމް ކޯޓަށް އެހުކުމް ނެރުމުގެ ފުރުސަތު ދޭން ޖެހޭނެ ކަމަށް ނަޝީދު ވިދާޅުވިއެވެ.
މީގެ އިތުރުން ސުޕްރީމް ކޯޓުން ނެރޭ ހުކުމަކީ ޤަބޫލު ނު ކުރޭ ވަރުގެ ގޯސް ހުކުމަކަށް ވެއްޖެނަމަ އެ އެހިސާބުން ހުރިހާ ކަމެއް ދޫކޮށްލާފައި މަގުތަކަށް ނުކުންނަން ޖެހޭ ވަގުތު ޖެހުނީ ކަމަށް ވެސް ނަޝީދު ވިދާޅުވިއެވެ.
