ގޭތެރޭގައި ތިބެގެން މަސައްކަތްކުރާ މީހުންނަށް ރަނގަޅު ގޮތްތަކެއް ހޯދައިދޭނަން: އިންތިހާބީ ރައީސް
ގޭތެރޭގައި ތިބެގެން އާމްދަނީ ހޯދުމަށްޓަކައި މަސައްކަތްކުރާ ފަރާތްތަކަކީ މުޖުތަމައުގައި ވަރަށް މުހިންމު ރޯލެއް އަދާކުރާ ބައެއް
ޖަޒީރާ ކެމްޕޭން ލޯންޗުކުރުމުގެ ރަސްމިއްޔާތުގެ ތެރެއިން
ގޭތެރޭގައި ތިބެގެން އާމްދަނީ ހޯދުމަށްޓަކައި މަސައްކަތްކުރާ މީހުންނަށް ރަނގަޅު ގޮތްތަކެއް ހޯއްދަވައި ދެއްވާނެ ކަމަށް އިންތިހާބީ ރައީސް އިބްރާހީމް މުހައްމަދު ސޯލިހް ވިދާޅުވެއްޖެއެވެ.
ހޮނިހިރު ދުވަހުގެ ރޭ އެމަނިކުފާނު ކުރެއްވި ޓްވީޓެއްގައި ވިދާޅުވީ ގޭތެރޭގައި ތިބެގެން އާމްދަނީ ހޯދުމަށްޓަކައި މަސައްކަތްކުރާ ފަރާތްތަކަކީ މުޖުތަމައުގައި ވަރަށް މުހިންމު ރޯލެއް އަދާކުރާ ބައެއް ކަމަށާއި އެމަނިކުފާނުގެ ސަރުކާރެއްގައި އެފަދަ ފަރާތްތަކަށް ރަނގަޅު ގޮތްތަކެއް ހޯއްދަވައި ދެއްވާނެ ކަމަށެވެ. އެމަނިކުފާނު މި ޓްވީޓްކުރައްވާފައި ވަނީ އިންޓަނޭޝަނަލް ހޯމް ބޭސްޑް ވޯކާސް ޑޭގެ މުނާސަބަތުގައެވެ.
އިންތިހާބީ ރައީސް ސޯލިހް މިފަދައިން ޓުވީޓު ކުރައްވާފައިވާއިރު ގޭތެރޭގައި ތިބެގެން އާމްދަނީ ހޯދުމަށްޓަކައި އެންމެ ގިނައިން މަސައްކަތް ކުރަމުން އަންނަނީ އަންހެން ކަނބަލުންނެވެ. އެގޮތުން ކޭކު އުޅެމާއި ފެހުމާއި ހެދިކާ ހެދުމުގެ އިތުރުން އެކަނބަލުން ތަފާތު މަސައްކަތްތަކެއް ކުރަމުންދެއެވެ.
