ޚަޝޯގީ މަރާލާފައިވާކަމަށް އެންމެ ފަހުން ސައުދީން އެއްބަސްވެއްޖެ
20 އޮކްޓޯބަރު 2018 | ހޮނިހިރު 00:38މިހާތަނަށް ސައުދީގެ 18 މީހަކު ހައްޔަރުކޮށްފައިވާކަމަށް އެ ސްޓޭޓްމެންޓުގައި ވަނީ ބުނެފައި
ޖަމާލް ޚަޝޯގީ މަރާލާފައިވާކަން ހާމަކުރުމުގެ ކުރިން ބަޔަކު، އޭނާ މިނިވަންކުރަން ގޮވާލައި އަޑުއުފުލަނީ
ތުރުކީގައި ހުންނަ ސައުދީ ކޮންސިއުލޭޓަށް ވަތްތަނާ ވީ ނުވީއެއް ނޭގި ގެއްލިފައިވާ ނޫސްވެރިޔާ ޖަމާލް ޚަޝޯގީ މަރާލާފައިވާ ކަމަށް ސައުދީއިން އެއްބަސްވެއްޖެއެވެ.
ސައުދީ އިން ބުނެފައިވަނީ ޚަޝޯގީ މަރާލާފައިވަނީ ތުރުކީގައި ހުންނަ ސައުދީ ކޮންސިއުލޭޓްތެރޭގައި ހުރި މީހަކާއި ޚަޝޯގީއާއި ދޭތެރޭ ހިނގާދިޔަ ޒުވާބެއްގެ ތެރޭގައިކަމަށެވެ. އެހެން ނަމަވެސް އެ ޒުވާބު ހިނގާދިޔައީ ކާކާއި އެކުގައި ކަމެއް ހާމައެއް ނުކުރެެއެވެ. ސައުދީގެ ދައުލަތުގެ މީޑިއާއިން ހާމަކޮށްފައިވާ ގޮތުގައި ޚަޝޯގީގެ ތަހުގީގީ ރިޕޯޓް ނެރޭނީ އެއްމަސް ދުވަސް ފަހުންނެވެ.
އެ މައްސަލައާއި ގުޅިގެން މިހާތަނަށް ސައުދީގެ 18 މީހަކު ހައްޔަރުކޮށްފައިވާކަމަށް އެ ސްޓޭޓްމެންޓުގައި ވަނީ ބުނެފައެވެ. ސައުދީ ދައުލަތުގެ މީޑިއާއިން ހާމަކޮށްފައިވާ އެގައުމުގެ ޕަބްލިކް ޕްރޮސެކިއުޓަރ ނެރެފައިވާ ސްޓޭޓްމަންޓެއްގައި ބުނެފައިވަނީ ސައުދީ އެޑްވައިޒަރ ސައުދު އަލް ގައްތާނީ އާއި ޑެޕިއުޓީ އިންޓެލިޖެންސް ޗީފް އަހުމަދު އަސިރީ ވަނީ އެދެބޭފުޅުންގެ މަގާމުން ވަކިކުރެވިފައިކަމަށެވެ. ބެލެވޭ ގޮތުގައި ހައްޔަރުކުރި 18 މީހުންގެ ތެރޭގައި އެ ދެ ބޭފުޅުންވެސް ހިމެނިވަޑައިގަންނަވައެވެ. އެހެން ނަމަވެސް ސައުދީއިން އެކަން ހާމަކޮށްފައެއް އަދިއެއް ނުވެއެވެ.
ގެއްލިފައިވާތާ ގާތްގަނޑަކަށް 18 ދުވަސް ފަހުން ސައުދީން ޚަޝޯގީ މަރާލާފައިވާކަމަށް ހާމަކޮށްފައިވާއިރު މީގެ ކުރިން އެގައުމުން ވަނީ އެކަން ދޮގުކޮށްފައެވެ.
ޚަޝޯގީ މަރާލާފައިވާކަމަށް ސައުދީން ހާމަކޮށްފައިވާއިރު އޭނާގެ ހަށިގަނޑު ވީތަނެއް އަދި ހާމަކޮށްފައެއް ނުވެއެވެ.
