މިއަހަރުގެ ރިޔާސީ އިންތިޚާބުގައި ރައީސުލްޖުމްހޫރިއްޔާ އަބްދުﷲ ޔާމީން އަބްދުލްގައްޔޫމް ހޮއްވެވުމަށް މަސައްކަތްތައް ކޮށްދިން ގިނަ މީހުން މިހާރު އެކަމާ ހިތާމަ ކުރާ ކަމަށް ގަލޮޅު ދެކުނު ދާއިރާގެ މެމްބަރު އަހްމަދު މަހްލޫފު ވިދާޅުވެއްޖެއެވެ.

ރާއްޖެ ޓީވީގެ މިރައީސް ޕްރޮގްރާމްގައި މަހްލޫފު ވިދާޅުވީ ރިޔާސީ އިންތިޚާބު ބާތިލް ކުރުމަށް ރައީސް ޔާމީން ހުށަހެޅުއްވި ދުސްތޫރީ މައްސަލައިގެ ހުރިހާ އަޑުއެހުމެއްގައި ބައިވެރިވެވުނު ކަމަށާއި، ރައީސް ޔާމީންގެ ގާނޫނީ ވަކީލް އަހްމަދު ސަލީމު (ރޭނިސް ސަލީމް) އާއި އާޒިމާ ކުރެއްވި މަސައްކަތްތައް ވަރަށް ގާތުން ފެނުނު ކަމަށެވެ. މަހްލޫފު ވިދާޅުވީ ރައީސް ޔާމީން ވެރިކަމަށް ގެންނެވުމަމަށާއި، ވެރިކަން ދެމެހެއްޓެވުމަށް ވެސް އެތައް ބަޔަކު ގުރުބާންވެ މަސައްކަތް ކުރި ކަމަށެވެ. ނަމަވެސް ބަދަލުގައި ލިބުނީ ކެހި ކަމަށާއި، ދެން އެންމެ އަވަހަށް ނުހައްގުން އަނިޔާ ލިބޭނެ ދެބޭފުޅުންނަށް އާޒިމާ އާއި، ނޭރިސް ސަލީމް ހިމެނިދާނެ ކަމުގެ ބިރު އެބައޮތް ކަމަށެވެ.

ރައީސް ޔާމީންގެ ކެމްޕެއިންގައި އިސްކޮށް އުޅުއްވި މުހައްމަދު އަޝްމަލީ ވެސް ހުންނެވީ ރައީސް ޔާމީނަށް ކެމްޕެއިން ކޮށް ދެވުމުވުން ދެރަވެފައި ކަމަށް މަހްލޫފު ވިދާޅުވި އެވެ. 

"އަޅުގަނޑު ވަރަށް މަސައްކަތް ކުރިން އިންތިޚާބު ކުރިން ވެސް ވިސްނާ ދެވޭތޯ އަޅުގަނޑުމެންނާއެކު މަސައްކަތް ކުރަން. މިރޭ އަޅުގަނޑަށް އަޝްމަލީ މެސެޖްކޮށްފައި މިބުނަނީ މަހޭ އޭ ތިމަންނަ މިހާރު ހިތަށް އެބައަރައޭ މަހޭގެ ބަސް އަހައިގެން މަހޭއާއެކު މިކަމުގައި ދެވުނު ނަމަ ގޮސްފައި އަދި އިބޫގެ ކެންޕޭންގައި އުޅެވުނު ނަމައޭ. އޭއީ އެދުވަހު އެކަން އެގޮތަށް ކުރެވުނު ނަމަ ތިމަންނަ ކުރި މަސައްކަތް ބަލައިގަންނާނެކަން." މަހްލޫފް ވިދާޅުވިއެވެ.

މަހްލޫފު ވިދާޅުވީ މިއަހަރުގެ ރިޔާސީ އިންތިޚާބުގައި ރައީސް ޔާމީން ހޮވުމަށް ކެންޕޭންގެ މަސައްކަތްތައް ކޮށްދިން މީހުންގެ އަގުވަޒަން ނުކުރާކަމުގެ ޝަކުވާ އެތައް ބަޔަކު ކުރަމުން އަންނަ ކަމަށާއި، އެމަސައްކަތްކޮށްދިން ގިނަ ބަޔަކު މިއަދު ހިތާމަ ކުރާ ކަމަށެވެ.

މަހްލޫފު ވިދާޅުވީ ރައީސް ޔާމީންއާ ދެކޮޅަށް ގައުމުގެ ކަންކަން އިސްލާހުކުރަން ނުކުތީ މަޝްވަރާއިން އިސްލާހު ނުގެން ކަމަށެވެ.

އެގޮތުން އެންމެ ފުރަތަމަ މަސައްކަތް ކުރީ ގާނޫނު އަސާސީގެ ބާރުން ރައްޔިތުންގެ މަޖިލީހުގެ ރައީސް އިތުބާރު ނެތްކަމުގެ ވޯޓު ނެގުމަށްފަހު ރައީސް ޔާމީންގެ އިތުބާރު ނެތް ކަމުގެ ވޯޓު ނެގުމަށްށެވެ. ނަމަވެސް ރިޝްވަތުގެ ތުހުމަތު ކުރެއްވުމަށްފަހު 12 މެންބަރުންގެ ގޮނޑި ގެއްލުވާލީ ކަމަށް އޭނަ ވިދާޅުވިއެވެ.

އެކެއް ފެބްރުއަރީގައި ނެރުނު ހުކުމަށް އިޝާރާތް ކުރައްވާ މަހްލޫފު ވިދާޅުވީ ސިޔާސީ ލީޑަރުން މިނިވަންކުރުމަށް އަމުރުކުރުމާއި ގުޅިގެން ސުޕްރިމްކޯޓުގެ ފަޑިޔާރުން ރިޝްވަތުގެ ތުހުމަތު ކުރުމަށްފަހު ހައްޔަރު ކުރީ ކަމަށެވެ.

މަހްލޫފު ވިދާޅުވީ ގައުމު ހަމަމަގަށް އެޅުވުމަށް ކުރި ހުރިހާ މަސައްކަތެއް ނާކާމިޔާބު ވީނަމަވެސް ރައްޔިތުންގެ ހަމައިން ހަގީގީ ބާރު ދައްކާ ރައްޔިތުން ބޭނުންވާ ގޮތް ބުނެދެވިފައިވާ ކަމަށެވެ. އަދި ރައްޔިތުން ނިންމުން ބަދަލު ނުކުރެވޭނެ ކަމަށް ވެސް އޭނަ ވިދާޅުވިއެވެ.