ރައީސް ޔާމީން ފިއްލެވިޔަ ނުދީ ހުއްޓުވައި ދިނުމަށް އެދި ގުޅިފައިވާ ޕާޓީތަކުން ފުލުހުންގެ އިދާރާ އަށް
18 އޮކްޓޯބަރު 2018 | ބުރާސްފަތި 14:09ރައީސް ޔާމީން ރާއްޖެ ދޫކުރައްވައި ފިއްލަވަން އުޅުއްވާ ކަމުގެ މައުލޫމާތު މުއުތަބަރު ގޮތަކަށް ލިބިވަޑައި ގެންފައިވާ ކަމަށް
ގުޅިފައިވާ ޕާޓީތަކުން މައްސަލަ އާއި ގުޅޭ މައުލޫމާތު މީޑިޔާ އާއި ހިއްސާ ކުރައް ވަނީ
ރައީސް އަބްދުﷲ ޔާމީން ރާއްޖެ ދޫކުރައްވައި ފިއްލަވަން އުޅުއްވާ ކަމަށް ތުހުމަތުކޮށް އެކަން ހުއްޓުވައި ދިނުމަށް ގުޅިފައިވާ ޕާޓީތަކުން މައްސަލަ އެއް ފުލުހުންގެ އިދާރާއަށް ހުށަހަޅައިފިއެވެ.
ގުޅިފައިވާ ހަތަރު ޕާޓީގެ ފަރާތުން ފުލުހުންގެ އިދާރާ އަށް ހުށަހެޅުއްވި މައްސަލައިގެ ތަފްސީލް މީޑިޔާއަށް ދެއްވަމުން އެމްޑީޕީގެ ޗެއަރޕާސަން ހަސަން ލަތީފް ވިދާޅުވީ ރައީސް ޔާމީން ރާއްޖެ ދޫކުރައްވައި ފިއްލަވަން އުޅުއްވާ ކަމުގެ މައުލޫމާތު މުއުތަބަރު ގޮތަކަށް ލިބިވަޑައިގެންފައި ވާ ކަމަށާއި، އެހެންކަމުން އެކަން ހުއްޓުވައި ދިނުމަށް އެދި ފުލުހުންގެ އިދާރާ އަށް މައްސަލަ އެއް ހުށަހަޅުއްވާފައިވާ ކަމަށެވެ.
ހަސަން ލަތީފް ވިދާޅުވީ ގާނޫނުގެ ތެރެއިން ރައީސް ޔާމީން ފުރާވަޑައި ނު ގެންނެވޭނެ ގޮތަށް އެ މަނިކުފާނު ހިފެހެއްޓުމަކީ ފުލުހުންގެ އިދާރާ އިން މިހާރު ކޮންމެހެން ކުރަންޖެހޭ ކަމެއް ކަމަށާއި، ޤާނޫނުގެ ތެރެއިން ފުލުހުންގެ މުއައްސަސާ އަށް އެ ބާރު ލިބިދީފައި އެބައޮތް ކަމަށެވެ.
ރައީސް ޔާމީންގެ މައްސަލަތަކެއް ފުލުހުންގެ އިދާރާ އަށް ހުށަހެޅި އަދި އެ މައްސަލަތައް ތަހްގީގް ކުރެވެމުން ދަނިކޮށް އެ މަނިކުފާނަށް ފުރާވަޑައި ގެންނެވިގެން ނުވާނެ ކަމަށާއި، ޤާނޫނީ އިމުގެ ތެރެއިން ފުލުހުންގެ މުއައްސަސާ އަށް ހުށަހަޅުއްވާފައިވާ މައްސަލަ ބައްލަވައި، ރައީސް ޔާމީން އަށް ފުރާވަޑައި ނުގެންނެވޭ ގޮތަށް ފުލުހުންގެ އިދާރާ އިން އެ މަނިކުފާނު ހުއްޓުވާނެ ކަމަށް އުއްމީދު ކުރައްވާ ކަމަށް ހަސަން ލަތީފް ވިދާޅުވިއެވެ.
ރައީސް ޔާމީން ފިއްލެވިޔަ ނު ދީ ރާއްޖޭގައި އެ މަނިކުފާނު ބަހައްޓަވައި، ފުލުހުންގެ އިދާރާ އަށް ހުށަހެޅިފައިވާ ރައީސް ޔާމީން އާއި ގުޅުން ހުރި މައްސަލަތައް ތަހްގީގްކޮށް ފުލުހުންގެ އިދާރާއިން އިންސާފު ގާއިމް ކޮށްދެއްވާނެ ކަމަށް އުއްމީދުކުރައްވާ ކަމަށް ހަސަން ލަތީފް ވިދާޅުވިއެވެ.
" ގާނޫނުގެ ތެރެއިން ރައީސް ޔާމީން ފުރާވަޑައި ނު ގެންނެވޭނެ ގޮތަށް ރައީސް ޔާމީން ހިފެހެއްޓުމަކީ މިހާރު ކޮންމެހެން ކުރަންޖެހޭ ކަމެއް. ތަހްގީގީ މަރްހަލާގައި ހުށަހެޅިފައި ހުރި މައްސަލަތައް އެބަހުރި.ރައީސް ޔާމީނަކީ ވައްކަމާއި ކޮރަޕްޝަންގެ މައްސަލަތައް އަމިއްލައަށް އިއުތިރާފްވެވަޑައިގެން ހުންނެވި ބޭފުޅެއް.މި މައްސަލަތައް ސަރުކާރުގެ މުވައްސަސާތަކަށް ހުށަހެޅުމަކީ އަޅުގަނޑުމެންގެ ޒިންމާ އެއް" ހަސަން ލަތީފް ވިދާޅުވިއެވެ.
ހަސަން ލަތީފް ވިދާޅުވީ ރައީސް ޔާމީން ފުރާވަޑައި ނު ގެންނެވޭނެ ގޮތަށް ކުރެވެން ހުރި ހުރިހާ ކަމެއް ގުޅިފައިވާ ޕާޓީތަކުން ކުރައްވާނެ ކަމަށެވެ.
ރައީސް ޔާމީން ރާއްޖެ ދޫކުރައްވައި ފިއްލަވަން އުޅުއްވާ ކަމުގެ ތުހުމަތު ކޮށް ފުލުހުންގެ އިދާރާ އަށް ގުޅިފައިވާ ޕާޓީތަކުން މައްސަލަ އެއް ހުށަހަޅުއްވާފައި ވާއިރު، އެ މަނިކުފާނާއި ގުޅުންހުރި ފައިސާގެ ގިނަ މައްސަލަތައް ފުލުހުންގެ އިދާރާއަށް ގުޅިފައިވާ ޕާޓިތަކުން ހުށަހަޅުއްވާފައި ވާކަން ފާހަ ގަކޮއްލެވެއެވެ.
އެގޮތުން ރައީސް ޔާމީންގެ އެކައުންޓަށް އެއް މިލިޔަން ޑޮލަރު ވަން މައްސަލަ އާއި އެމްއެމްޕީއާރްސީ ގެ ވައްކަމުގެ މައްސަލަ ތަހްގީގް ކޮށް ދިނުމަށް އެދި ގުޅިފައިވާ ޕާޓީތަކުން ވަނީ ފުލުހުންގެ އިދާރާއަށް ހުށަހަޅާފައެވެ. މީގެ އިތުރުން ރައީސް ޔާމީނާ ގުޅުން ހުރި މަނީ ލޯންޑްރިންގެ މައްސަލަ އެއް ތަހްގީގްކޮށް ދިނުމަށް އެދި އެމްއެމްއޭ އިން ވެސް ވަނީ ފުލުހުންގެ އިދާރާ އަށް މައްސަލަ އެއް ހުށަހަޅުއްވާ ފައިވެއެވެ.
މައުލޫމާތު ލިބިފައިވާ ގޮތުގައި މި ހުރިހާ މައްސަލަތަކެއް ފުލުހުންގެ އިދާރާ އިން ދަނީ ތަހްގީގް ކުރަމުންނެވެ.
ރައީސް ޔާމީން ފިއްލަވައިގެން މާދަމާ ރާއްޖެ އިން ބޭރަށް ފުރާ ވަޑައިގަންނަ ވަން އުޅުއްވާ ކަމަށް އަޑު ފެތުރިފައިވީ ނަމަވެސް އެކަން ރަސްމީ އެއްވެސް ފަރާތަކުން ހާމަކޮށްފަ އެއް ނުވެ އެވެ.
