އިންޑިއާގެ ތާރީޚީ ސިޓީ، އައްލާއާބާދުގެ މުސްލިމް ނަން ބަދަލުކޮށްފި
އައްލާއާބާދުގެ ނަން ބަދަލުކުރީ ޕްރަޔަގްރާޖްއަށް
ގަންގާ ކޯރާއި ޖަމްނާ ކޯރު ގުޅެނީ އައްލާއާބާދު ނުވަތަ މިހާރުގެ ޕްރަޔަގްރާޖްއިން
އިންޑިއާގެ އެންމެ އާބާދީ ބޮޑު ތާރީޚީ ސްޓޭޓަށް ކިޔަމުންދިޔަ މުސްލިމް ނަން ހިންދޫ ނަމަކަށް އެ ގައުމުގެ އިދާރާތަކުން ބަދަލުކޮށްފިއެވެ.
ވެރިކަންކުރާ ބާރަތިޔާ ޖަނަތަ ޕާޓީ(ބީޖޭޕީ) އިސް ލީޑަރަކު އަންގާރަ ދުވަހު ރިޕޯޓަރުންނަށް ވިދާޅުވީ މިލިއަނަކަށްވުރެ ގިނަ މީހުން އުޅެމުންދާ އުއްތަރު ޕްރަދޭޝްގެ ސިޓީއެއްކަމަށްވާ އައްލާއާބާދުގެ ނަން ޕްރަޔަގްރާޖްއަށް ބަދަލުކޮށްފައިވާކަމަށެވެ.
އުއްތަރު ޕްރަދޭޝްގެ ހެލްތު މިނިސްޓަރ ސިދާރތު ނާތު ސިންހު ވިދާޅުވީ ސިޓީގެ ނަން ބަދަލުކުރަން ނިންމީ ސްޓޭޓްގެ ޗީފް މިނިސްޓަރ ޔޯގީ އަދިޔަނާތު ކެބިނެޓަށް ހުށަހެޅުއްވި ހުށަހެޅުމަކަށްފަހުކަމަށެވެ.
"ކެބިނެޓްގެ ހުރިހާ މެމްބަރުންވެސް ތިއްބެވީ ވަރަށް އުފަލުން އަދި މިއަދުން ފެށިގެން އައްލާއާބްދުގެ ނަމަކަށްވާނީ ޕްރަޔަގްރާޖް" އޭނާ ވިދާޅުވިކަމަށް އިންޑިއަން އެކްސްޕްރެސްގައި ރިޕޯޓްކޮށްފައިވެއެވެ.
އިންޑިއާގެ ވެރިރަށް ދިއްލީގެ އިރުދެކުނުން 650 ކިލޯމީޓަރު ދުރުގައި އޮންނަ އަދި އެ ގައުމުގެ ފުރަތަމަ ބޮޑުވަޒީރު ޖަވާހަރްލާލް ނެހްރޫގެ އުފަން ސިޓީ އައްލާ އާބާދަށް އެނަން ދެވިފައިވަނީ 16 ވަނަ ގަރުނުގައި އޮތް މުސްލިމް މުގަލް ވެރިކަމުގައެވެ.
