ޕޮލިސް ކުލަބާ ދެކޮޅަށް ފައިނަލުގައި ނުކުންނާނީ ފޮނަދޫ

ކްލަބް ވެމްކޯ ބަލިކޮށް ގައުމީ ވޮލީބޯޅަ މުބާރާތުގެ އަންހެން ޑިވިޝަނުގެ ފައިނަލުގައި ޕޮލިސް ކުލަބާ ދެކޮޅަށް ނުކުންނަން ލ. ފޮނަދޫ މެދު އަވަށު ސްޕޯޓްސް ކްލަބް ތައްޔާރުވެއްޖެއެވެ.

ހޯމަ ދުވަހުގެ ހަވީރު ކުޅުނު ސެމީ ފައިނަލު މެޗުން ފޮނަދޫ މޮޅުވީ 3-1 ސެޓުންނެވެ. ތިން ސެޓު އެއް ސެޓުން ފޮނަދޫ މެޗު ގެންދިޔަ ނަމަވެސް ދެ ޓީމުގެ ފަރާތުން ފެނިގެން ދިޔައީ ވަރަށް ވެސް ވާދަވެރި ކުޅުމެކެވެ.

އެގޮތުން ފުރަތަމަ ސެޓުގައި ފޮނަދޫ އަށް ކުރި ލިބުނީ31-29 އިންނެވެ. އެއާ ޚިލާފަށް ދެވަނަ ސެޓުގައި ވެމްކޯގެ ފަރާތުން އާދައިގެ ކުޅުމެއް ފެނިގެންދިޔުމުގެ ނަތީޖާއަކަށް ވީ25-16 ފޮނަދޫ ސެޓު ގެންދިޔުމެވެ.

ތިން ވަނަ ސެޓަށް ދެ ޓީމުން ނުކުތް އިރު ބެލިވިފައި އޮތީ ފޮނަދޫ އިން ފަސޭހަކަމާ އެކު މި ސެޓު ގެންދާނެ ކަމަށެވެ. ނަމަވެސް ހީކުރި ގޮތާއި ޚިލާފަށް16-25 އިން މި ސެޓު ގެންދިޔައީ ވެމްކޯ އިންނެވެ.

ފައިނަލްގެ ފަހު ޖާގަ ފޮނަދޫ އިން ކަށަވަރު ކުރި ހަތަރު ވަނަ ސެޓު ގެންދިޔައީ 25-20 އިން ކާމިޔާބުކޮށްގެންނެވެ. މި ސެޓުގައި ފޮނަދޫ ޓީމުން ތަފާތު ދެއްކީ މެޗުގެ މޮޅު ކުޅުންތެރިއަކަށް ހޮވުނު ޝައްފައެވެ.

މުބާރާތުގެ އަންހެން ޑިވިޝަނުގެ ފައިނަލް އޮންނާނީ ބުދަ ދުވަހުގެ ރެއެވެ. މި މުބާރާތުގައި މި ދެ ޓީމު ކުޅުނު މެޗުން ފޮނަދޫ ވަނީ ޕޮލިސް އަތުން ބަލިވެފައެވެ.

ވީއޭއެމް އެސޯސިއޭޝަން ކަޕްގެ ފިރިހެން ޑިވިޝަނުގައި ހޯމަ ދުވަހުގެ ރޭ ކުޅުނު މެޗުގައި ބައްދަލުކުރީ ހޯކްސް ސްޕޯޓްސް ކްލަބާއި، އާއި ސްޕޯޓްސް ކްލަބެވެ. މި މެޗު 3-1 ސެޓުން ކާމިޔާބުކުރީ އާއި ސްޕޯޓްސް ކްލަބުންނެވެ.

މެޗުގެ ސެޓުތައް ދިޔައީ 17-25، 25-23، 14-25 އަދި 18-25 އިންނެވެ. މެޗުގެ މޮޅު ކުޅުންތެރި އަކީ އާއިގެ އަރިޒް މުހައްމަދެވެ.

އެސޯސިއޭޝަން ކަޕްގައި އަންގާރަ ދުވަހުގެ ރޭ ކުޅޭ މެޗުގައި ބައްދާލު ކުރާނީ ގުޑީސް ސްޕޯޓްސް ކްލަބާއި މަލްސާން ސްޕޯޓްސް ކްލަބެވެ.