ރައީސް ޔާމީންގެ ކެމްޕޭންގައި އުޅުއްވި ފަނޑިޔާރަކު އިންތިޚާބް ބާތިލްކުރަން ހުށަހަޅުއްވާފައިވާ މައްސަލަ ބަލާ ފަނޑިޔާރުންގެ ބެންޗުގައި!
16 އޮކްޓޯބަރު 2018 | އަންގާރަ 14:43ރައީސް ޔާމީން މިއަދު ދިވެހި ރައްޔިތުން މަގުމަތިކޮއްފައިވާ ކަމަށް ވިދާޅުވި
ވިލިގިނލީ ދާއިރާގެ މެމްބަރު ސައުދު ހުސެއިން
ރައީސް ޔާމީންގެ ކެމްޕޭންގައި ބައިވެރިވި ފަނޑިޔާރަކު ރައީސް ޔާމީންގެ ފަރާތްޕުޅުން އިންތިޚާބް ބާތިލްކުރެއްވުމަށް ހުށަހަޅުއްވާފައިވާ މައްސަލަ ބައްލަވަން ސުޕްރީމް ކޯޓްގެ ބެންޗުގައި އެބަ އިންނެވި ކަމަށް ވިލިގިނލީ ދާއިރާގެ މެމްބަރު ސައުދު ހުސެއިން ވިދާޅުވެއްޖެއެވެ.
ރާއްޖެޓީވިގެ "ރައްޔިތުންގެ ހުކުމް" ޕްރޮގްރާމްގައި ވާހަކަފުޅު ދައްކަވަމުން ސައުދު ވިދާޅުވީ ރައީސް ޔާމީންގެ ފަރާތްޕުޅުން އިންތިޚާބް ބާތިލްކުރަން ސުޕްރީމް ކޯޓަށް ހުށަހަޅުއްވާފައިވާ މައްސަލަ ބައްލަވަން ސުޕްރީމް ކޯޓްގެ ބެންޗުގައި ހިމެނޭ ފަނޑިޔާރުންގެ ތެރެއިން ފަނޑިޔާރަކު ސިޔާސީ ގޮތުން ރައީސް ޔާމީން އަށް ރިޔާސީ އިންތިޚާބް ކާމިޔާބުކޮށް ދިނުމައްޓަކައި ވިލިގިނލީގެ ގޭގެއަށް ވަދެ ކެމްޕޭން ކޮށްފައިވާ ކަމަށެވެ.
ސައުދު ވިދާޅުވީ އެހެންކަމުން ރައީސް ޔާމީންގެ ފަރާތްޕުޅުން ރިޔާސީ އިންތިޚާބް ބާތިލް ކުރަން ހުށަހަޅާފައިވާ މައްސަލަ ބައްލަވާ ސުޕްރީމް ކޯޓްގެ ބެންޗުގެ ނަޒާހަތްތެރިކަމާ މެދު ސުވާލުއުފެދޭ ކަމަށެވެ. ފަނޑިޔާރުގެ ނަން ހާމަނުކުރައްވާ ވާހަކަފުޅު ދައްކަވަމުން ސައުދު ވިދާޅުވީ އިންތިޚާބްގެ މައްސަލަ ބައްލަވާ ބެންޗުގައި ހިމެނޭ ފަނޑިޔާރުންގެ ތެރެއިން ފަނޑިޔާރަކު ވިލިގިލީގެ ގޭގެއަށް ވަޑައިގެން ރައީސް ޔާމީން އަށް ކެމްޕޭން ކޮށްދެއްވުމަށް މަސައްކަތް ކުރެއްވި ކަން ހެކިދޭނެ ކިތަންމެ ބަޔަކު ވިލިގިނލީގައި އެބަތިބި ކަމަށެވެ.
"200 ކީއްކުރަން 1000 މީހުންވެސް އެބަތިބި. ވިލިގިލީން ހެކިދޭނެ މީހުން އެބަތިބި. ފާޅުގައި ކޯޓަށް ގެންނަންވީ ނޫންތޯ؟ މިއަދު އިންޓަގްރިޓީ އަކީ ކޮބައިތޯ؟ މަސްލަހަތަކީ ކޮބައިތޯ؟ ކިހިނެއްތޯ އެ ބެންޗުގައި އިންނެވީ؟ އަޅުގަނޑުމެންނަށް ދެއްކޭނެ ވާހަކަތައް އެބަހުރި" ސައުދު ވިދާޅުވިއެވެ.
ސައުދު ވިދާޅުވީ ވޯޓުން ބަލިވީމާ ހިތު ހުރި ގޮތަކަށް ހިތު ހުރި އެއްޗެއް ކިޔާފައި ސުޕްރީމް ކޯޓްގެ ތެރެއަށް އިންތިޚާބް ބާތިލް ކުރަން އެދި ދުސްތޫރީ މައްސަލަ ހުށަހަޅުއްވައި، ރައީސް ޔާމީން މިއަދު ދިވެހި ރައްޔިތުން މަގުމަތިކޮށްފައިވާ ކަމަށެވެ.
ޚުދު ރައީސް ޔާމީން އަމިއްލަފުޅަށް އިންތިޚާބީ ރައީސް އިބްރާހިމް މުހައްމަދު ސޯލިހު ގެންނަވައި އެ މަނިކުފާނަށް ރިޔާސީ އިންތިހާބުގައި ލިބިވަޑައިގެންނެވި ބޮޑު ކާމިޔާބީ އަށް މަރްހަބާ ދެންނެ ވުމަށްފަހު، އަދި ޚުދު އެ މަނިކުފާނުގެ ފޮރިން މިނިސްޓްރީއިން ވެސް އިންތިޚާބް ބަލިގަނެފައިވާ ކަމަށް ބައިނަލްއަޤްވާމީ މުޖްތަމައު އަށް އެންގެވުމަށްފަހު މިއަދު އިންތިޚާބް ބާތިލްކުރަން ރައީސް ޔާމީން ކުރައްވަމުން ގެންދަވާ މަސައްކަތްތައް ސައުދު ވަނީ ބޮޑު ޖޯކެއްގެ ގޮތުގައި ސިފަކުރައްވާފައެވެ.
ރައީސް ޔާމީންގެ ފަރާތްޕުޅުން ރިޔާސީ އިންތިކާބް ބާތިލްކޮށް ދިނުމަށް އެދި ސުޕްރީމް ކޯޓަށް ހުށަހަޅުއްވާފައިވާ ދުސްތޫރީ މައްސަލައިގެ ދެވަނަ އަޑުއެހުން މިއަދު ބާއްވާފައިވާއިރު، މި މައްސަލައިގެ ފަހު އަޑުއެހުން މާދަމާ ހެދުނު ބޭއްވުމަށް ވަނީ ނިންމާފައެވެ.
