ރިޔާސީ އިންތިޚާބުގެ ވޯޓް ފޮށި ދެ ވަނަ ފަހަރަށް ދިއްދޫގައި ނުބެހެއްޓޭނެ:އަލީ ހާސިމް

ރިޔާސީ އިންތިޚާބުގެ ވޯޓް ފޮށި ދެން އަލުން ދިއްދޫގައި ނުބެހެއްޓޭނެ ކަމަށް ދިއްދޫ ކައުންސިލްގެ ރައީސް އަލީ ހާޝިމް ވިދާޅުވެއްޖެއެވެ.

ރިޔާސީ އިންތިޚާބުގެ ނަތީޖާ ބާތިލްކުރަން ޕީޕީއެމްގެ ރިޔާސީ ކެންޑިޑޭޓް ރައީސް އަބްދުﷲ ޔާމީން ސުޕްރީމް ކޯޓަށް ހުށަހަޅުއްވާފައިވާ ދުސްތޫރީ މައްސަލައަށް އިޝާރާތް ކުރައްވަމުން ހާޝިމް ވިދާޅުވީ ސުޕްރީމް ކޯޓުން ރިޔާސީ އިންތިޚާބުގެ ނަތީޖާ ބާތިލްކޮށް އަލުން އިންތިޚާބު ބާއްވަން މަސައްކަތްކުރި ނަމަވެސް، ދިއްދޫގައި ދެން އަލުން ވޯޓް ފޮއްޓެއް ނުބެހެއްޓޭނެ ކަމަށެވެ.

ތިން މަސްދުވަސް ވަންދެން ރާއްޖޭން ބޭރުގައި އަމިއްލައަށް އަރުވާލެވިގެން ހުންނެވުމަށްފަހު އެބުރި ރާއްޖެވަޑައިގެން ކައުންސިލްގެ ވަޒީފާއަށް ނިކުތީ މަސައްކަތް ކުރެވޭނެ ކަމުގެ އަމާން މާހައުލެއް މިހާރު ރާއްޖޭގައި އޮތް ކަމަށް ޤަބޫލުކުރެވިގެން ކަމަށް އޭނާ ވިދާޅުވި އެވެ.

މަސައްކަތް ކުރެވޭނެ އެކަށީގެންވާ މާހަލެއް ނެތިގެން ޖުލައި މަހުގެ 13 ވަނަ ދުވަހު އަމިއްލައަށް ރާއްޖެއިން ބޭރަށް އަރުވާލެވިގެން ހުންނެވުމަށްފަހު މި މަހުގެ 13 ވަނަ ދުވަހު ހާޝިމްވަނީ ކައުންސިލްގެ މަސައްކަތަށް އެބުރި ވަޑައިގެންފައެވެ.

ރައީސް ޔާމީންގެ ސަރުކާރަށް ވަރަށް ބޮޑަށް ފާޑުވިދާޅުވަމުން ގެންދަވާ ހއ. ދިއްދޫ ކައުންސިލްގެ ރައީސް އަލީ ހާޝިމް އެކި ފަހަރު މަތިން ސަސްޕެންޑްކޮށްފައިވެ އެވެ. އަދި ފުލުހުންގެ ބެލުމުގެ ދަށަށް ގެންގޮސްފައިވެއެވެ.

އިދިކޮޅު މައި ޕާޓީ، އެމްޑީޕީއަށް ނިސްބަތްވާ ހާޝިމް އަކީ ލޯކަލް ގަވަރމަންޓް އޮތޯރިޓީއަށާއި، މިހާރުގެ ސަރުކާރުގެ ސިޔާސަތުތަކަށް ވަރަށް ބޮޑަށް ފާޑުވިދާޅުވާ، ހއ ގައި އެމްޑީޕީގެ ޙަރަކާތްތަކުގައި އިސްކޮށް މަސައްކަތްކުރައްވާ ބޭފުޅެކެވެ. ދިއްދޫ ކައުންސިލްގައި ތިއްބަވާ 5 މެމްބަރުންނަކީވެސް އެމްޑީޕީއަށް ނިސްބަތްވާ ކައުންސިލަރުންނެވެ.