އައިއެމްއެފްގެ ފިޔަވަޅުތަކަށް އަމާޒު ހިފުމަށް އުރުދުންގެ ކެބިނެޓަށް ބަދަލު ގެނެސްފި

އުރުދުންގެ އިގްތިސާދަށް އަލުން ދިރުން ގެނެސް، ޚަރަދު ކުޑަކުރުމުގެ ފިޔަވަޅުތައް އެޅުމަށް ފެށުމުގެ ގޮތުން އެގައުމުގެ ވަޒީރުންގެ މަޖިލީހަށް ބޮޑުވަޒީރު އުމަރު އަލް-ރައްޒާޒު ބުރާސްފަތި ދުވަހު ބަދަލު ގެންނަވައިފިއެވެ.

ވަރލްޑް ބޭންކްގެ ކުރީގެ އިކޮނޮމިސްޓެއް ކަމަށްވާ ރައްޒާޒް އެ ގައުމުގެ ބޮޑުވަޒީރުގެ މަގާމަށް ރަސްގެފާނު އަބްދުﷲ ދެވަނަ އައްޔަން ކުރެއްވީ ކުރީގެ ބޮޑުވަޒީރު ހަނީ އަލް މުލްކީ އިސްތިއުފާ ދެއްވުމުންނެވެ.

މުލްކީ އިސްތިޢުފާ ދެއްވީ އުރުދުންގައި ތަކެތީގެ އަގު އުފުލިގެން ދިއުމާއި، އަދި މުލްކީގެ ސަރުކާރުން އެ ޤައުމުގެ އިންކަމް ޓެކްސް ޕޮލިސީއަށް ގެންނަން ނިންމި ބަދަލުތަކާ ގުޅިގެން އެ ޤައުމުގެ ރައްޔިތުން ވަރުގަދަ މުޒާހަރާތަކެއް ފެށުމުންނެވެ.

އިގްތިސާދީ ދަތިކަމާ ހުރެ ފުޅާވަމުންދިޔަ މުޒާހަރާތައް ފިނިކުރުމަށް ބޮޑުވަޒީރު ކަމަށް އައްޔަން ކުރެއްވި އުމަރު އަލް ރައްޒާޒް ވަނީ 100 ދުވަހަށް ފަހު އެ މަނިކުފާނުގެ ޓީމް އަލުން ރިވިއު ކުރައްވާނެ ކަމަށް ވިދާޅުވެ ވަޒީރުންގެ މަޖިލީހުގެ މެމްބަރުންގެ އަދަދު 29 އިން 27 އަށް ކުޑަކޮށްފައެވެ.

ނަމަވެސް މައި ވުޒާރާތައް ކަމަށްވާ ދާޚިލީވުޒާރާ އާއި، ފައިނޭންސް، އަދި ފޮރިން މިނިސްޓަރުގެ މަގާމަށް ބަދަލު ގެންނަވާފައެއް ނުވެއެވެ.

ބޮޑުވަޒީރު ވަނީ މިހާރު ހުށަހަޅުއްވާފައިވާ ޓެކްސްގެ ނިޒާމަށް އިސްލާހު ގެނައުމުގެ ބިލް މި އަހަރު ފާސް ނުވެއްޖެ ނަމަ އުރުދުން އިން ދައްކަން ޖެހޭ އަގު ބޮޑުވާނެކަމުގެ އިންޒާރު ދެއްވާފައެވެ.

އައިއެމްއެފްގެ އިރުޝާދުގެ މަތިން އެކުލަވާލެވުނު ބިލް ސެޕްޓެމްބަރު މަހު އެކުލަވާލާފައިވާއިރު ޔޫނިއަންތަކާއި މަދަނީ ޖަމްއިއްޔާތަކުން ތިބީ އެ ބިލާ މެދު ހިތްހަމަ ނުޖެހިފައެވެ. އޭގެ ސަބަބަކީ އެ ބިލަކީ މުލްކީ ހުށަހެޅުއްވި ހުށަހެޅުއްވުންތަކަށް ހަމައެކަނި ބޭރުފުށުން ގެނެވުނު ބަދަލުތަކެއް ގެނައުމަށް ފަހު ހުށަހަޅާފައިވާ ބިލަކަށް ވުމެވެ.

ކުރީގެ ސަރުކާރާއި އަޅާ ބަލާއިރު މުއާމަލާތްކުރެއްވުމުގެ ގާބިލުކަން ބޮޑު ރައްޒާޒް ވަނީ އާއްމުންގެ އިތުބާރު ހޯއްދަވާނެ ކަމަށް ވައުދުވެވަޑައިގެންފައެވެ.

އުރުދުންގެ އިޤުތިޞާދީ ސިޔާސަތުތަކަށް ބަދަލުގެނެސް، ފިޔަވަޅުތަކެއް އަޅަން މަޖުބޫރުވެފައި ވަނީ 2016 ވަނަ އަހަރު އިންޓަރނޭޝަނަލް މަނިޓަރީ ފަންޑުން އެ ޤައުމުން ހޯދި ތިން އަހަރުދުވަހުގެ ކްރެޑިޓް ލައިންގެ ސަބަބުންނެވެ. އެ ކްރެޑިޓް ލައިންގެ އަގު 723 މިލިއަން އެމެރިކާ ޑޮލަރަށް އަރައެވެ.

އުރުދުން އަކީ ޒަމާނުއްސުރެ އިޤުތިޞާދީ ގޮތުން ހީނަރު، އަދި ބޭރުގެ އެހީއަށް ބަރޯސާވަމުންދާ ޤައުމެކެވެ. އޭގެ ސަބަބުން އެ ޤައުމުގައި އެކި ދުވަސްވަރު ނިންމާފައިވާ އެކިއެކި އިޤުތިޞާދީ ނިންމުންތަކާއި ރައްޔިތުން ވަނީ ދެކޮޅުހަދާފައެވެ.

އެގޮތުން 37 ބިލިއަން އެމެރިކާ ޑޮލަރު (ޖީޑީޕީގެ 95 އިންސައްތަ) އަށް އަރާފައިވާ އުރުދުންގެ ދައުލަތުގެ ދަރަނި އަދާކުރުމަށް، އިޤުތިޞާދީ ސިޔާސަތަށް ގެންނަ ބަދަލުތަކުގެ ތެރެއިން ތަކެތީގެ އަގު މަތިވެ، ސޭލްސް ޓްކްސް އިތުރުވެގެން ގޮސްފައިވާ މައްސަލައިގައި ވެސް ރައްޔިތުން ވަނީ ނުރުހުން ފާޅުކޮށްފައެވެ.

ދި އިކޮނޮމިސްޓް މަޖައްލާއިން ޝާއިޢުކުރި ރިޕޯޓެއްގައި ވާގޮތުގައި އައްމާނަކީ މުޅި އަރަބި ދުނިޔޭގައި ވެސް ދިރިއުޅުމުގެ އަގު އެންމެ މަތި އެއް ޤައުމެވެ.