ޕާކިސްތާނުގެ ފުލުހުންނަށް އަމާޒުކޮށް ދިން ހަމަލާއެއްގައި މަދުވެެގެން 26 މަރު
25 ޖުލައި 2017 | އަންގާރަ 05:57ޕާކިސްތާނުގައި ހަރަކާތްތެރިވާ ތާލިބާން އިން ވަނީ ހަމަލާގެ ޒިންމާ ނަގާފައި
ހަމަލާގައި ޒަޚަމްވި މީހަކަށް ފަރުވާ ދިނުމަށް ގެންދަނީ
ޕާކިސްތާނުގެ ފުލުހުންނަށް އަމާޒުކޮށް ހޯމަ ދުވަހު ދިން ބޮމުގެ ހަމަލާއެއްގައި މަދުވެެގެން 26 މީހުން މަރުވެއްޖެއެވެ.
މި ބޮމުގެ ހާދިސާ ހިނގާފައި ވަނީ ލާހޫރުގެ ތަރުކާރީ ވިއްކާ މާރުކޭޓެެއްގައެެވެ. މި ތަރުކާރީ ވިއްކާ މާރުކޭޓު ހުންނަނީ ލާހޫރުގެ މަޝްހޫރު އަރްފާ ސޮފްޓްވެއާ ޓެކްނޮލޮޖީ ޕާކް އަށް ވަންނަ އެންޓްރެންސްގައެވެ.
ހޯމަ ދުވަހު ދިން ބޮމުގެ ހާދިސާގައި 54 މީހުން ޒަޚަމްވިއިރު މަރުވި މީހުންގެ ތެރޭގައި ނުވަ ފުލުހުން ވެސް ހިމެނެއެވެ.
ޕާކިސްތާނުގައި ހަރަކާތްތެރިވާ ތާލިބާން ނުވަތަ ތެހްރީކް- އެ-ތާލިބާން އިން ހަމަލާގެ ޒިންމާ ނަގާފައިވާއިރު އެ ޖަމާއަތުން ބުނެފައި ވަނީ ދިން ހަމަލާއަކީ ޖާނުންފިދާވުމުގެ ހަމަލާއެއް ކަމަށެވެ.
ޕާކސްތާނުގެ ބޮޑުވަޒީރު ނަވާޒް ޝަރީފް ހަމަލާ ކުށްވެރިކުރައްވާފައިވާއިރު އެމަނިކުފާނު ވަނީ ހަމަލާގައި ޒަޚަމްވި މީހުންނަށް "އެންމެ ރަނގަޅު ބޭސްފަރުވާ ދިނުމަށް" އަންގަވާފައެވެ.
