ސޯމާލިއާގައި އައިއެސްގެ ހަނގުރާމަވެރިންނަށް އަމާޒުކޮށް އެމެރިކާގެ އަސްކަރިއްޔާ އިން ވައިގެ ހަަމަލާތަކެއް ދީފި

ސޯމާލިއާގެ އުތުރުއިރުމަތީގައި ހަރަކާތްތެރިވާ އިސްލާމިކް ސްޓޭޓް (އައިއެސް)ގެ ހަނގުރާމަވެރިންނަށް އަމާޒުކޮށް އެމެރިކާގެ އަސްކަރިއްޔާ އިން ދިން ވައިގެ ހަމަލާތަކެއްގައި ގިނަ އަދަދެއްގެ އައިއެސް ހަނގުރާމަވެރިން މަރާލައިފިއެވެ.

އެމެރިކާގެ އަސްކަރިއްޔާ އިން ބުނެފައި ވަނީ ހުކުރު ދުވަހު އައިއެސްގެ ހަނގުރާމަވެރިންނަށް ހަމަލާ ދީފައި ވަނީ ސޯމާލިއާގެ ސަރުކާރުގެ ސިފައިންނާ ގުޅިގެން ކަމަށެވެ.

އެމެރިކާގެ "ދަ ޔޫއެސް އެފްރިކާ ކޮމާންޑް" އިން ބުނެފައި ވަނީ ހުކުރު ދުވަހު ދެ ގަޑިއެއްގައި އައިއެސްގެ ހަނގުރާމަވެރިންނަށް އަމާޒުކޮށް ހަމަލާދީފައިވާ ކަމަށެވެ.

އެމެރިކާގެ އަސްކަރިއްޔާ އިން ނެރެފައިވާ ބަޔާނެއްގައި ބުނީ "ހަމާލާތަކުން އައިއެސް އަށް ލިބުނު ގެއްލުން" މިހާރު ވަޒަންކުރަމުން ދާ ކަމަށެވެ.

ރިޕޯޓުތައް ބުނާ ގޮތުން އައިއެސް އިން ދަނީ ސޯމާލިއާ އިން އެ ޖަމާއަތަށް މީހުން ރެކްރޫޓު ކުރަމުންނެވެ.

އައިއެސްގެ ހަނގުރާމަވެރިން ވަނީ ސޯމާލިއާގެ ޕަންޓްލޭންޑް ސަރަހައްދުގައި އޮންނަ ޕޯޓް ޓައުނެއް މިދިޔަ އަހަރު ހިފާފައެވެ.

އެމެރިކާގެ އަސްކަރިއްޔާގެ 6,000 ސިފައިން ދަނީ އެފްރިކާ ސަރަހައްދުގައި ހަރަކާތްތެރިވަމުންނެވެ.