ފޯމް ބަލައިގަތުމަށް ހައުސިންގ މިނިސްޓްރީން ދޫކުރާ ނަމްބަރު 5000ރ. ރުފިޔާ އަށް ވިއްކަނީ

ހުޅުމާލޭ ދެވަނަ ފިޔަވަހިން ދޫކުރުމަށް ހަމަޖެހިފައިވާ 400 ގޯއްޗަށް އެދި ހުށަހަޅަންޖެހޭ ފޯމް ލުމަށް ހައުސިންގ މިނިސްޓްރީން ދޫކުރާ ނަމްބަރު ބޮޑު އަގުގައި ބައެއް ފަރާތްތަކުން ވިއްކަމުންދާ ކަމުގެ މައުލޫމާތު ރާއްޖެ އެމްވީއަށް ލިބިއްޖެއެވެ.

ރާއްޖެ އެމްވީއަށް މައުލޫމާތު ލިބިފައިވާ ގޮތުގައި 10,000 (ދިހަ ހާސް) ރުފިޔާ އިން 5000 (ފަސް ހާސް) ރުފިޔާއާ ދެމެދުގެ އަގުތަކެއްގައި ދަނީ ނަންބަރު ވިއްކަމުންނެވެ. މި ކަމުގައި ދިވެހިންނާއި ބިދޭސީން ވެސް ހަރަކާތްތެރިވާ ކަން ވަނީ އެނގިފައެވެ.

ރާއްޖެއެމްވީ އަށް މައުލޫމާތު ދިން މީހަކު ބުނީ ހައުސިން މިނިސްޓްރީގެ ބައެއް އޮފިޝަލުން ވެސް ނަންބަރު ވިއްކަމުން ގެންދާ ކަމަށެވެ. ކިޔޫގައި ނުޖެހި ހައުސިން މިނިސްޓްރީގެ މުވައްޒަފުންނަށް ނަންބަރު ދަނީ ދޫކުރަމުންނެވެ. އެކަމާ ބެހޭ ގޮތުން އެ މިނިސްޓްރީގެ ބަހެއް ވަނީ ލިބޭ ގޮތް ނުވެފައެވެ.

ދުވާލެއްގެ މައްޗަށް 500 ނަމްބަރު ދޫކުރުމަށް ހަމަޖެހިފައިވާއިރު، ދޫކުރާ ނަމްބަރަށް ވުރެ އިތުރަށް ކޮންމެ ދުވަހަކު ވެސް ހައުސިންގ މިނިސްޓްރީގައި މީހުން ކިޔޫގައި ޖެހެއެވެ.

ފޯމް ލުމަށް އެކަށީގެންވާ މުއްދަތެއް ނުދީ، އެއްވެސް އިންތިޒާމެއް ނެތި ހައުސިންގ މިނިސްޓްރީ އިން މިކަން ކުރަމުން ދާތީ ގިނަ ރައްޔިތުންތަކެއް ދަނީ ހިތްހަމަ ނުޖެހުން ފާޅުކުރަމުންނެވެ.

ހުޅުމާލެ ދެވަނަ ފިޔަވަހިން 1000 އަކަފޫޓްގެ 400 ގޯތި ދޫކުރުމަށް ހަމަޖެހިފައިވާއިރު، ގޯއްޗެއްގެ ޖުމްލަ އަގަކީ 400،000 (ހަތަރުލައްކަ) ރުފިޔާއެވެ. ޑައުން ޕޭމަންޓްގެ ގޮތުގައި 25،000ރ. ދައްކަންޖެހޭ އިރު ބާކީ ބައި ދެއްކުމަށް 10 އަހަރު ލިބިގެންދާނެއެވެ. އެހެންކަމުން ގޯއްޗަކަށް މަހަކު ދައްކަންޖެހޭނީ 3،125ރ. އެވެ.

ގޯއްޗަށް ޝަރުތު ހަމަވާ ކޮންމެ މީހަކަށް 100 މާކްސް ލިބި، އެ ހުރިހާ އެންމެންގެ މެދުގައި ގުރުއަތުން ނަގާ ގޮތަށް ހަމަޖައްސާފައި ވާއިރު، ގުރުއަތުލުން ބާއްވާނީ ވީހާ ވެސް ހާމަކަން ބޮޑު ގޮތެއްގައި ކަމަށް ހައުސިންގ މިނިސްޓަރ މުހައްމަދު މުއިއްޒު ވަނީ ވިދާޅުވެފައެވެ. އެ ގޮތުން ގޯތި ލިބޭ 400 މީހުން ނެގުމަށް ފަހު ރިޒާވް ލިސްޓަށް އިތުރު 100 މީހުން ގުރުއަތުން ނެގުމަށް ވަނީ ހަމަޖައްސާފައެވެ. އަދި 400 މީހުންގެ ތެރެއިން އެކި ސަބަބުތަކާ ހުރެ ގޯތި ނުލިބޭ މީހުން އުނިކޮށް ގުރު ނެގި ތަރުތީބުން ރިޒާވް ލިސްޓުން ފުރުސަތު ދޭނެ ކަމަށް ހައުސިން މިނިސްޓްރީން ބުނެފައި ވެއެވެ.