ދިވެހި ރައްޔިތަކާއި އިންޑިޔާގެ ރައްޔިތެއް ކައިވެނިކޮށްގެން ލިބިފައިވާ ކުދިން ޔަތީމްޚާނާ އަށް ލީ މައްސަލައާއި ގުޅިގެން ފޮރިން މިނިސްޓްރީން ނެރުނު ބަޔާނާއި އެކުދިންގެ އާއިލާއަށް ދީފައިވާ ޖަވަބާއި ދިމާނުވާކަން ހާމަވެއްޖެއެވެ.
އިންޑިއާގެ ކެރަލާ ސްޓޭޓްގެ ޔަތީމްހާނާއެއްގައި އެއް އަހަރު ދުވަހު އަނިޔާލިބިފައި ވަނީ އއ.އުކުޅަސް، ރައްޔިތެއް ކަމަށްވާ އަބްދުﷲ ބަޝީރާއި އިންޑިއާ ރައްޔިތެއް ކަމަށްވާ ސައީދަލީ ފާތިމާ ލަތީފް އަށް ލިބިފައިވާ ތިން ކުދިންނެވެ. ޔަތީމްޚާނާގައި އެކުދިން ދިރިއުޅެން ޖެހި، ރާއްޖެ ނުގެނެވި އިންޑިއާގައި ތާށިވެފައިވާ މައްސަލައާއި ގުޅިގެން 2007 ވަނަ އަހަރު ފޮރިން މިނިސްޓްރީން އެ އާއިލާއަށް ދީފައިވާ ޖަވާބުގައި ބުނެފައި ވަނީ އެ މައްސަލަ އަކީ މިނިސްޓްރީގެ އިޙްތިސާސްގެ ތެރޭގައި ހިމެނޭ ކަމެއް ނޫން ކަމުގައެވެ. އަދި މިއްސަލަ ކަމާބެހޭ މުއްސަސާތަކަށް ހުށައަޅާއިގެން ކުރިއަށް ގެންދިއުމަށް އެ މިނިސްޓްރީން ވަނީ އާއިލާއަށް އެދިފައެވެ.
ޔާތީމްޚާނާގައި އަނިޔާލިބިފައިވާ ތިން ކުދިން އެތަނުން ނެރެފައި ވަނީ އިންޑިއާގައި ހުންނަ ދިވެހިރާއްޖޭގެ ކޮންސިއުލޭޓް އޮފީހުގެ އެހީތެރިކަމާ އެކުގައެވެ. އެހެން ނަމަވެސް އިންޑިއާގައި ހުންނަ ދިވެހިރާއްޖޭގެ ކޮންސިއުލޭޓް އޮފީހުން މައްސަލަ ބެލުމަށް ފަހު އެކުދިން މަންމަ ފާތުމާ ކައިރީގައި ބޭތިއްބުމަށް މައްސަލަ ނިންމާފައި ވަތީ މިހާރު އެކުދިން ތިބީ ރާއްޖެ ނުގެނެވި އެ ގައުމުގައި ތާށިވެފައެވެ.
އެކުދިން ގޮވައިގެން ފާތިމާ ޗުއްޓީއަށް އިންޑިއާއަށް ގޮސްފައި ވަނީ 2013 ވަނަ އަހަރުގެ މާޗް މަހުއެވެ.
އެހެންނަމަވެސް ރާއްޖެޓީވީން "ހިތްދަތި އާދޭސް" ޑޮކިއުމެންޓްރީން ގެނެސްދިނުމަށް ފަހު ފޮރިން މިނިސްޓްރީން ހޯމަ ދުވަހު ނެރުނު ނޫސްބަޔާނެއްގައި ބުނެފައި ވަނީ އިންޑިޔާ އާއި ބަންގްލަދޭޝްގައި ތިބި ދިވެހި ދެ ޢާއިލާއަށް ދާދިފަހުން ކުރިމަތިވި ކަންތައްތަކުގައި އެ މިނިސްޓްރީގެ އެހީތެރިކަމާއި އެއްބާރުލުން ފުރިހަމައަށް ދީފައި ވާނެ ކަމަށެވެ.
ޔަތީމުޚާނާގައި ކުދިންނަށް އަނިޔާ ލިބިފައިވާ ކަމަށް ބަޝީރު ބުނާއިރު އެކުދިންގެ ގައިން އެފަދަ ނިޝާންތައް ފެންނަން ހުއްޓެވެ. ރާއްޖެ ޓީވީގެ މުހައްމަދު ވިސާމް ވަނީ އެ ތަނަށް ޒިޔާރަތްކޮށް އެ ކުދިންނާ ވާހަކަ ދައްކައި ފޮޓޯ އާއި ވީޑިއޯ ވެސް ނަގާފައެވެ.
ޔަތީމްޚާނާގައި އަނިޔާ ލިބުމުގެ އިތުރުން އެކުދިންގެ ޕާސްޕޯޓު މުއްދަތު ހަމަވެ އަދި ވިސާގެ ވެސް މުއްދަތު ވަނީ ހަމަވެފައެވެ. އެހެން ކަމުން އެ ކުދިން މިހާރު ތިބީ ދަތުރު ކުރެވޭނެ ގޮތެއްނެތި "ބަންދެއްގަ" އެވެ.
އިންޑިއާގެ ރައްޔިތުންނާ ދިވެހި ފިރިހެނުން ކައިވެނިކޮށްގެން ދިމާވާ މިފަދަ މައްސަލަތަކުގެ ޚާއްސަ ތަފާސްހިސާބެއް ނެތް ނަމަވެސް މިއީ ހިނގަމުން އަންނަ ކަމެކެވެ. މީގެ ކުރިން ވެސް މިފަދަ ކަންކަން ވަނީ ހިނގާފައެވެ. މި ކަމާ ބެހޭ ގޮތުން ރާއްޖޭގެ ފޮރިން މިނިސްޓްރީގެ ބަހެއް ވަނީ ލިބޭ ގޮތް ނުވެފައެވެ.
