ރައީސް މައުމޫނާއި ގާސިމްގެ އިސްތިއުނާފް މައްސަލައިގެ އަޑުއެހުމެއް މާދަމާ!
11 އޮކްޓޯބަރު 2018 | ބުރާސްފަތި 14:30ރައީސް މައުމޫންގެ މައްސަލަ މާދަމާ 13:30 ގައި
ރައީސް މައުމޫން އާއި އިންތިހާބީ ރައީސް އިބްރާހީމް މުހައްމަދު ސޯލިހު އަދި ގާސިމް އިބްރާހީމް
ކުރީގެ ރައީސް މައުމޫން އަބްދުލްގައްޔޫމް އާއި ޖުމްހޫރީ ޕާޓީގެ ފައުންޑަރ ގާސިމް އިބްރާހީމްގެ ފަރާތުން ހައިކޯޓަށް ހުށަހަޅާފައިވާ އިސްތިއުނާފުގެ ޝަރީއަތުގެ އަޑުއެހުމެއް ބުރާސްފަތި ދުވަހަށް ތާވަލުކޮށްފިއެވެ.
ރައީސް މައުމޫންގެ މައްޗަށް އުފުލި އަދުލުއިންސާފު ގާއިމުކުރުމަށް ހުރަސްއެޅުމުގެ ދައުވާ އާ ގުޅިގެން ކްރިމިނަލް ކޯޓުން އިއްވާފައިވާ އެއް އަހަރާއި ހަތް މަހުގެ ޖަލުހުކުމްގެ އިސްތިއުނާފު ޝަރީއަތުގެ އަޑުއެހުމެއް ހައިކޯޓުގައި ތާވަލް ކޮށްފައި ވަނީ ބުރާސްފަތި ދުވަހުގެ މެންދުރުފަހު 13:30 އަށެވެ. ގާސިމް އިބްރާހީމްގެ މައްޗަށް އުފުލި ރިޝްވަތު ހުށަހެޅުމުގެ ދައުވާއާ ގުޅިގެން ކްރިމިނަލް ކޯޓުން އިއްވާފައިވާ ތިން އަހަރާއި ދެ މަހާއި 12 ދުވަހުގެ ޖަލުހުކުމްގެ އިސްތިއުނާފުގެ ޝަރީއަތުގެ އަޑުއެހުމެއް ހައިކޯޓުގައި ތާވަލް ކޮށްފައި ވަނީ ބުރާސްފަތި ދުވަހުގެ 11:15 އަށެވެ.
ރައީސް މައުމޫން އާއި ގާސިމް އިބްރާހީމްގެ އިސްތިއުނާފުގެ ޝަރީއަތުގެ އަޑުއެހުމެއް ބުރާސްފަތި ދުވަހު ހައިކޯޓުގައި ތާވަލް ކޮށްފައިވާއިރު، އެ ދެ ބޭފުޅުން ވެސް ވަނީ ހައިކޯޓުގައި އިސްތިއުނާފުކޮށްފައިވާ މައްސަލައާމެދު ގޮތެއް ނިމެންދެން ކަފާލާތުގެ ދަށުން މިނިވަން ކުރައްވާފަ އެވެ. އެ ދެ ބޭފުުޅުން މިނިވަން ކުރައްވާފައި ވަނީ މިދިއަ ސެޕްޓެމްބަރު މަހުގެ 30 ވަނަ ދުވަހު ހައިކޯޓުން ނެވެ.
ރައީސް މައުމޫން ކަފާލާތުގެ ދަށުން މިނިވަން ކުރައްވާފައި ވަނީ 60،000ރ ބަހައްޓައިގެން ނެވެ. އަދި ގާސިމް އިބްރާހީމް ކަފާލާތުގެ ދަށުން މިނިވަން ކުރައްވާފައި ވަނީ 70،000ރ ބަހައްޓައިގެން ނެވެ. ރައީސް މައުމޫން ހައްޔަރުކޮށް، އެމަނިކިފާނުގެ މައްޗަށް ޓެރަރިޒަމްގެ ދައުވާ ވެސް އުފުލާފައި ވެއެވެ. އެއީ އެކެއް ފެބްރުއަރީގައި ސުޕްރީމް ކޯޓުން ނެރުނު އަމުރާ ގުޅިގެން ރައީސް އަބްދުﷲ ޔާމީންގެ ސަރުކާރު ގާނޫނާ ހިލާފަށް ވައްޓާލަން އުޅުނު ކުށުގެ ތުހުމަތުގަ އެވެ. ގާސިމްގެ މައްޗަށް ރިޝްވަތުގެ ދައުވާ އުފުލާފައި ވަނީ ރައްޔިތުންގެ މަޖިލީހުގެ ރައީސް އަބްދުﷲ މަސީހު މުހައްމަދުގެ އިތުބާރު ނެތްކަމުގެ މައްސަލައެއް ރައްޔިތުންގެ މަޖިލީހަށް ހުށަހެޅުމުގެ މަސައްކަތް ކުރަމުންދިޔަ ދުވަސްވަރު ރައްޔިތުންގެ މަޖިލީހުގެ މެމްބަރުންތަކަކަށް ރިޝްވަތު ހުށަހެޅުއްވި ކަމަށްބުނާ މައްސަލައެއްގަ އެވެ.
