ތައިލެންޑްގެ އަމްޕަޔަރުންތަކެއް ޓެނިސް މެޗުތަކުން ސަސްޕެންޑްކޮށްފި
އެމީހުން ސަސްޕެންޑް ކޮށްފައި ވަނީ ކޮރަޕްޝަންގެ މައްސަލަތަކެއްގައި
3 އަމްޕަޔަރުން ސަސްޕެންޑް ކޮށްފައި ވަނީ އުމުރު ދުވަހަށް
މެޗްތަކުގެ ނަތީޖާ އާއި ކުޅުނުކަމުގެ ތުހުމަތުގައި ތައިލެންޑަށް ނިސްބަތްވާ ޓެނިސް ތިން އަމްޕަޔަރަކު އުމުރު ދުވަހަށް ސަސްޕެންޑްކުރުމަށް ޓެނިސްގެ މައި އިދާރާއިން ނިންމައިފިއެވެ.
އިންޓަރނޭޝަނަލް ޓެނިސް ފެޑެރޭޝަނުން ސަސްޕެންޑްކުރި 3 ޗެއަރ އަމްޕަޔަރުންނަކީ އަނޫޗާ ޓޮންގްޕްލިއު، އަޕިސިޓް ޕްރޮމްޗާއީ އަދި ޗިޗާއީ ސްރިލިލާއީ އެވެ. އެމީހުންގެ މައްޗަށް ސާބިތުވެފައި ވަނީ 2017 ވަނަ އަހަރު ބޭއްވި މުބާރާތްތަކެއްގެ ސްކޯއަށް ބެޓް ކުރުމާއި، މެޗުތަކުގެ ސްކޯރ އާއި ކުޅެފައިވާކަމަށެވެ. އެގޮތުން ބައެއް މެޗުތަކުގެ ނަތީޖާ ސިސްޓަމަށް އެންޓަރ ކުރުމުގައި އޮޅުވާލާފައިވާ ކަމަށް ސާބިތުވެފައިވާ ކަމަށް ވެއެވެ.
މި 3 އަމްޕަޔަރުން ޕްރޮފެޝަނަލް ޓެނިސްގެ އެއްވެސް ހަރަކާތެއްގައި ބައިވެރިވުން ވަނީ މަނާކޮށްފައެވެ.
އެމީހުންގެ މައްސަލަ ބަލާފައި ވަނީ ޓެނިސްގެ މައްސަލަތައް ބަލާ ޓެނިސް އިންޓަގްރިޓީ ޔުނިޓުންނެވެ. އެ ޔުނިޓަކީ ޓެނިސްގެ ތެރޭގައި ހިނގާ ކޮރަޕްޝަންގެ މައްސަލަތައް ބެލުމަށް ޓެނިސްގެ ސަރަހައްދީ ޖަމްއިއްޔާތަކުން އުފައްދާފައިވާ ގުނަވަނެވެ.
