މަޔާމީ އޯޕަން ޓެނިސް މުބާރާތް ފެޑެރާ ކާމިޔާބުކޮށްފި

އަނިޔާއިން ސަލާމަތްވުމަށް ފަހު ރަނގަޅު ކުޅުނުމެއް ދައްކަމުން އަންނަ، ރޮޖަރ ފެޑެރާ އެމެރިކާގައި ކުރިއަށްދިޔަ މަޔާމީ އޯޕެން ޓެނިސް މުބާރާތުގެ ޗެމްޕިއަންކަން ހޯދައިފިއެވެ.

ޓެނިހުގެ ދުނިޔޭގައި މިހާރު 6 ވަނާގައި ރޭންކުކުރެވިފައިވާ ސްވިޒިލެންޑްގެ ފެޑަރާ މިއަހަރުގެ މަޔާމީ އޯޕެން ކާމިޔާބުކުރީ ދުނިޔޭގެ ރޭންކިން 7 ވަނާގައި ސީޑް ކުރެވިފައިވާ ސްޕެއިންގެ ރަފައެލް ނަޑާލް ބަލިކުރުމަށް ފަހުއެވެ.

ފެޑަރާއަށް އަނިޔާއާ ކުރިމަތިވީ މިދިޔަ އަހަރުގެ ތެރޭގައެވެ. އަދި ކަކުލަށް ލިބުނު އަނިޔާއެއްގެ ސަބަބުން ކުޅުމާއި ދުރުގައި އޭނާއަށް ވަނީ މަޑުކުރަން ޖެހިފައެވެ.

މަޔާމީ އޯޕެންގެ ފައިނަލުގައި ނަޑާލްގެ މައްޗަށް ފެޑެރާ ކުރި ހޯދީ 6-3 6-4 އިން ސެޓުތައް ގެންގޮސްގެންނެވެ.

މަޔާމީ އޯޕެންގެ އިތުރުން ފެޑެރާ ވަނީ މި އަހަރުގެ ފުރަތަމަ ގްރޭންޑް ސްލޭމް މުބާރާތް ކަމަށްވާ އޮސްޓްރޭލިއަން އޯޕަން ޓެނިސް މުބާރާތް ކާމިޔާބުކޮށްފައެވެ.

މީގެ އިތުރުން މިދިޔަ މަހު އޮތް އިންޑިއަން ވެލްސް މުބާރާތް ވެސް ކާމިޔާބު ކޮށްފައި ވަނީ ފެޑަރާއެވެ. އޮސްޓްރޭލިއަން އޯޕަންގެ ފައިނަލުގައި ވެސް ފެޑެރާ ކުޅެފައިވަނީ ނަޑާލްއާ ދެކޮޅަށެވެ.

މިހިނގާ 2017 ވަނަ އަހަރުގެ ފެޑެރާގެ ޕަރފޯމަންސްއަށް ބަލާއިރު މިހާތަނަށް ކުޅުނު20 މެޗުގެ ތެރެއިން ފެޑެރާ ވަނީ 19 މެޗުން މޮޅުވެފަ އެވެ.

މަޔާމީ އޯޕަން ފައިނަލް މެޗަކީ ފެޑަރާއަށް ވަރަށް ޚާއްސަ މެޗެކެވެ. އެއީ ނަޑާލް އަތުން މިދިޔަ 13 އަހަރުގެ ތެރޭގައި ފެޑެރާ ޖެހިޖެހިގެން ހަތަރު މެޗުން މޮޅުވި ފުރަތަމަ ފަހަރު ކަމަށްވާތީއެވެ.

ފެޑެރާ ބުނެފައިވާ ގޮތުގައި މިއަހަރަކީ ހުރިހާ ގޮތަކުން ވެސް އޭނާއަށް ވަރަށް ގިނަ ކާމިޔާބީތައް ހާސިލްކުރެވެމުންދާ އަހަރެކެވެ.

މިއީ މަޔާމީ އޯޕަން ފައިނަލަކުން ނަޑާލް ބަލިވި ފަސް ވަނަ ފަހަރެވެ. އަދި ނަޑާލާއި ފެޑެރާ އެންމެ ފުރަތަމަ ވާދަކުރީ 2004 ވަނަ އަހަރުގެ މަޔާމީ އޯޕަންގަ އެވެ.