ސުލަވެސީއަށް އެރި ސުނާމީ: ހަށިތައް ހޯދުމުގެ މަސައްކަތް 11 ވަނަ ދުވަހު ހުއްޓާލަނީ

އިންޑޮނީޝިއާގެ ސުލަވެސީއަށް އައި ބިންހެލުމާއި ސުނާމީއަށްފަހު މީހުން ހޯދުމަށް ކުރަމުންގެންދާ މަސައްކަތް އޮކްޓޯބަރު މަހުގެ 11 ވަނަ ދުވަހު ހުއްޓާލުމަށް ނިންމާފައިވާކަމަށް އެގައުމުގެ ސަރުކާރުން ބުނެފިއެވެ.

ސަރުކާރުން އެގޮތަށް ނިންމީ މީހުންނަށް އާންމު ދިރިއުޅުމައިގެން އުޅެން އުނދަގޫވާނެތީއެވެ.

ސެޕްޓެމްބަރު މަހުގެ 28 ވަނަ ދުވަހު އައި މި ބިންހެލުމާއި އެއަށްފަހު އެރި ސުނާމީގައި މަރުވި މީހުންގެ އަދަދުވަނީ 1،948 އަށް އަރާފައިކަމަށް ނޭޝަނަލް ބޯޑް ފޮރ ޑިޒާސްޓަރ މެނޭޖްމެންޓުން ހޯމަ ދުވަހުވަނީ ބުނެފައެވެ.

އަދި 2،500 އަށްވުރެ ގިނަ މީހުން ޒަޚަމްވެ، 70،000 އަށްވުރެ ގިނަ ގެވެސް މި ހާދިސާގައި ވަނީ ހަލާކުވެފަވެއެވެ. މީގެ އިތުރުން 75،000 އެއްހާ މީހުންގެ ގެދޮރުވަނީ ގެއްލިފައެވެ.

ސުލަވެސީގެ ޕާލޫ ސިޓީއަށް އެންމެ ބޮޑަށް އަސަރުކުރި މި ސުނާމީ އަރާފައިވަނީ ރިކްޓަރ މިންގަނޑުން 7.5ގެ ބާރުމިނުގައި އައި ބިންހެލުމަކަށްފަހުއެވެ.

އިންޑޮނޭޝިއާގެ އެޑިއުކޭޝަން މިނިސްޓްރީން ހާމަކޮށްފައިވާ ގޮތުގައި މި ހާދިސާގައި 3،000 އެއްހާ ސްކޫލު ވަނީ ހަލާކުވެފައެވެ. އޭގެ ތެރެއިން އެންމެ ގިނަ ސްކޫލް ތަކަކީ އެންމެބޮޑަށް ގެއްލުންވި ސިގީ ޑިސްޓްރިކްޓްގެ ސްކޫލްތަކެވެ.

ދިހަ ދުވަހަށްފަހު ހޯމަ ދުވަހު ދަރިވަރުން ސްކޫލަށް ނުކުންނަން ފަށާފައިވާއިރު އެކުދިންގެ ފުރަތަމަ މަސައްކަކަތަކަށް ވެގެންދިޔައީ ކްލާސްރޫމުތައް ސާފުކުރުމެވެ.

އެތައްހާސް ބަޔަކަށް ބޯހިޔާވަހިކަމެއް ނެތްއިރު، ސުނާމީ އެރި ސަރަޙައްދުގައި ހުރި ޕާކުތައް މިހާރު ބޭނުންކުރަމުންދަނީ ރެފިއުޖީ ކޭމްޕްތަކެއްގެ ގޮތުގައެވެ. އެހީގެ ތަކެއްޗަށް އިންތިޒާރުކޮށްގެން އެތަންތަނުގައި ތިބި ރައްޔިތުން ނިދަންް ޖެހިފައިވަނީ ހިޔާވަހިކަމެއް ނެތިއެވެ.