އެކްސިޑެންޓްވި އެމެރިކާ މަނަވަރުން ގެއްލުނު އެންމެންގެ ހަށިތައް ހޯދައިފި
ސިންގަޕޫރުގެ އިރުމަތީ އައްސޭރި ފަށުން މަނަވަރު އެކްސިޑެންޓްވީ ލައިބީރިއާގެ އޮއިލް ޓޭންކަރަކާ
އެކްސިޑެންޓްވި އެމެރިކާގެ ނޭވީ ބޯޓު
ދާދިފަހުން އެެމެރިކާގެ ނޭވީ މަނަވަރު "ދަ ޔޫއެސްއެސް ޖޯން މެކޭން" އެކްސިޑެންޓްވި ހާދިސާގައި އޭގެން ދަތުރުކުރި މީހުންގެ ތެރެއިން ގެެއްލުނު 10 ސެއިލަރުންގެ ހަށިގަނޑު ފެނިފައިވާ ކަމަށް އެމެރިކާގެ ނޭވީން ހޯމަ ދުވަހު ބުނެފިއެވެ.
ސިންގަޕޫރުގެ އިރުމަތީ އައްސޭރިފަށުން "ދަ ޔޫއެސްއެސް ޖޯން މެކޭން" ދަތުރު ކުރަނިކޮށް އެކްސިޑެންޓްވީ ލައިބީރިއާގެ އޮއިލް ޓޭންކަރަކާއެވެ. އެމެރިކާގެ ނޭވީގެ މަނަވަރު އެކްސިޑެންޓްވި އިރު އެ އުޅަނދު ދަތުރު ކުރަމުން ދިޔައީ ސިންގަޕޫރުގެ ބަނދަރަށް ވަނުމަށެވެ.
ސިންގަޕޫރުގެ ވަށައިގެންވާ ކަނޑުގެ ސަރަހައްދަކީ ދުނިޔޭގެ އެންމެ ކާރޫބާރޫ ބޮޑު ކަނޑުގެ ސަރަހައްދުތަކުގެ ތެރޭގައި ހިމެނޭ ސަރަހައްދެކެވެ. އެ ސަރަހައްދުން ގިނަ މުދާތަކެއް އަބަދުވެސް އެކިގައުމުތަކަށާއި އަދި ސިންގަޕޫރަށް ގެންދެއެވެ.
"ދަ ޔޫއެސްއެސް ޖޯން މެކޭން" އަކީ އެމެރިކާގެ ސެވަންތް ފްލީޓްގައި ހިމެނޭ މަނަވަރަކެވެ. މަނަވަރު ހަރަކާތްތެރިވާ މަރުކަޒަކީ ޖަޕާންގެ ޔޮކުސުކާއެވެ.
މަނަވަރު އެކްސިޑެންޓް ވި ހާދިސާ މިހާރު ތަހުގީގު ކުރަމުންދާއިރު "ދަ ޔޫއެސްއެސް ޖޯން މެކޭން" ނިސްބަތްވާ އެމެރިކާގެ ސެވަންތް ފްލީޓްގެ ކޮމާންޑަރު ވައިސް އެޑްމިރަލް ޖޯސެފް އޯކެއިން ވަނީ ހާދިސާއަށް ފަހު މަގާމުން ވަކިކޮށްފައެވެ.
އެކްސިޑެންޓްވި މަނަވަރު ބަނދަރުކޮށްފައި އޮތީ ސިންގަަޕޫރުގެ ޗަންގި ނޭވަލް ބޭސްގައެވެ.
