އިންޓަޕޯލްގެ ވެރިޔާ މަޤާމުން އިސްތިއުފާ ދެއްވައިފި
8 އޮކްޓޯބަރު 2018 | ހޯމަ 02:08އޭނާ އަކީ ޗައިނާގެ ކުރީގެ ޑެޕިއުޓީ މިނިސްޓަރ ފޮރ ޕަބްލިކް ސެކިއުރިޓީ
އިންޓަޕޯލްގެ ރައީސް މެންގް ހޮންގްވެއި
ބައިނަލްއަޤްވާމީ ފުލުހުންގެ އިދާރާ, އިންޓަޕޯލްގެ ރައީސް މެންގް ހޮންގްވެއި މަޤާމުން އިސްތިއުފާ ދެއްވައިފި އެވެ.
ހޮންގްވެއި މަޤާމުން އިސްތިއުފާދީފައި މިވަނީ ގެއްލިގެން ހޯދަމުން ދަނިކޮށް 12 ދުވަސް ފަހުން، އޭނާގެ މައްސަލަތަކެއް ބަލަމުންދާ ކަމަށް ޗައިނާ އިން ބުނެފައިވާ ދަނޑިވަޅެއްގައެވެ. އާދިއްތަ ދުވަހު ޗައިނާއިން ބުނެފައިވަނީ ހޮންގްވެއި ޗައިނާގެ ޤާނޫނުތަކާއި ހިލާފުވެފައިވުމުގެ ސަބަބުން އޭނާ ހައްޔަރުކޮށް މައްސަލަ ތަހުޤީޤު ކުރުމުންދާ ކަމަށެވެ.
ހޮންގްވެއި އަކީ ޗައިނާގެ ކޮމިއުނިސްޓް ޕާޓީގެ އިސް މެމްބަރެކެވެ. އަދި އިންޓަޕޯލްގެ ރައީސްކަމަށް އިންތިޚާބުވުމުގެ ކުރިން އޭނާ ހުންނެވީ ޗައިނާގެ ޕަބްލިކް ސެކިއުރިޓީގެ ޑެޕިއުޓީ މިނިސްޓަރަކަށެވެ. އަދި ފުލުހުންގެ ޚިދުމަތުގައި އޭނާ އުުޅުއްވާތާ 40 އަހަރު ވަނީ ވެފައެވެ.
އޭނާ އިންޓަޕޯލްގެ ރައީސްކަމަށް އިންތިޚާބުކޮށްފައިވަނީ 2016 ވަނަ އަހަރުގެ ނޮވެމްބަރު މަހުއެވެ. އަދި އޭނާގެ ދައުރު ހަމަވާނީ 2020 ވަނަ އަހަރުއެވެ.
ހޮންގްވެއި އިންޓަޕޯލްގެ ރައީސްކަމަށް އިންތިޚާބުވުމުން އިންސާނީ ހައްޤުތަކަށް މަސައްކަތްކުރާ ފަރާތްތަކުން ވަނީ އެކަމަށް ފާޑުކިޔާފައެވެ. އެގޮތުން ހޮންގްވެއި އިންޓަޕޯލް މެދުވެރިކޮށް، ޗައިނާ ސަރުކާރުން އިންސާނީ ހައްޤުތަކަށް އަރައިގަތުމަށް ކުރާ މަސައްކަތްތަކަށް އޭނާ އެއްބާރުލުން ދެއްވާނެ ކަމަށް ޖަމްއިއްޔާތަކުން ބުންޏެވެ.
