ފަރަންސޭސި ސަފީރު އިންތިޚާބީ ރައީސް ސޯލިހްގެ އަރިހަށް އިހްތިރާމްގެ ޒިޔާރަތެއް ކުރައްވައިފި
9 އޮކްޓޯބަރު 2018 | އަންގާރަ 12:54ބައްދަލު ކުރެއްވުން އޮތީ އާދީއްތަ ދުވަހު ހަވީރު
ފަރަންސޭސި ސަފީރު ސަފީރު ޖޯން-މައިން ޝުހް، އިންތިޚާބީ ރައީސް ސޯލިހްއާ ބައްދަލު ކުރައްވަނީ
ފަރަންސޭސިވިލާތުން ދިވެހިރާއްޖެއަށް ކަނޑައަޅުއްވާފައި ހުންނަވާ ސަފީރު ހިޒް އެކެސެލެންސީ ޖޯން-މައިން ޝުހް، އިންތިޚާބީ ރައީސް އިބްރާހީމް މުހައްމަދު ސޯލިހްގެ އަރިހަށް އިހްތިރާމްގެ ޒިޔާރަތެއް ކުރައްވައިފިއެވެ.
އިންތިޚާބީ ރައީސުލް ޖުމްހޫރިއްޔާގެ އޮފީހުން ހާމަކުރެއްވި ގޮތުގައި އާދީއްތަ ދުވަހު އޮތް މި ބައްދަލުވުމުގައި ނިމިދިޔަ ރިޔާސީ އިންތިޚާބުގައި އެމަނިކުފާނު ހޯއްދެވި ކާމީޔާބީއަށް ސަފީރު ވަނީ މަރުޙަބާ ދަންނަވާފައެވެ.
އަދި ފަރަންސޭސި ވިލާތާއި ދިވެހިރާއްޖެއާ ދެމެދު އޮންނަ ގުޅުން އިތުރަށް ވަރުގަދަ ކުރުމަށާއި، ފަރަންސޭސި ވިލާތުން ދިވެހިރާއްޖެއަށް ޒިޔާރަތްކުރާ ފަތުރުވެރިން އިތުރުކުރުމާ ގުޅޭ ގޮތުން މަޝްވަރާ ކުރެއްވިއެވެ.
މީގެ އިތުރުން ދުނިޔެ ހޫނުވުމުން ތިމާވެށްޓަށް އަންނަ ބަދަލުތަކާއި ސަލާމަތީ ޚިދުމަތްތަކުގެ ދާއިރާއިން ފަރަންސޭސި ވިލާތުން ދިވެހިރާއްޖެއަށް އެހީތެރިކަން ފޯރުކޮށްދެމުން ގެންދާނެ ކަމަށް ފަރަންސޭސި ސަފީރު ވިދާޅުވި ކަމަށްވެސް އިންތިޚާބީ ރައީސްގެ އޮފީހުން ވަނީ ހާމަކޮށްފައެވެ.
