ނޯބެލް ސުލްހައިގެ އިނާމު ރޭޕްއާއި ދެކޮޅު ދެ އެކްޓިވިސްޓުންނަށް

ސުލްހައިގެ ރޮނގުން މުޅި ދުނިޔޭގެ ނިސްބަތުން ދެވޭ އެންމެ ޝަރަފުވެރި އިނާމު ނޯބެލް ސުލްހައިގެ މިއަހަރުގެ އިނާމު ރޭޕްއާ ދެކޮޅަށް ކެމްޕޭން ކުރަމުން ދިޔަ ދެ އެކްޓިވިސްޓުން ކަމަށްވާ ކޮންގޯގެ ގައިނޮކޮލޮޖިސްޓް ޑޮކްޓަރު ޑެނިސް މުކްވެގެ އާއި އިރާގުގެ ޔަޒީދީ އަންހެނެއް ކަމަށްވާ ނާދިއާ މުރާދަށް ލިބިއްޖެ އެވެ.

މީގެ ތެރެއިން 25 އަހަރުގެ ނާދިޔާ މުރާދަކީ އިސްލާމިކް ސްޓޭޓް(އައިއެސް)ގައި ޖިންސީ ޝިކާރައަކަށްވެ އެތައް ފަހަރެއްގެ މަތިން އަނިޔާ ލިބިފައިވާ ފަރާތެކެވެ. އޭނާ ވަނީ ފިލައިގެން ދިއުމަށް ފަހު ޖިންސީ ޝިކާރައަށް ވެފައިވާ އެތައް އަންހެނުންނެއް ސަލާމަތް ކޮށްދީފައެވެ. އޭގެ ފަހުން ފާޅުކަން ބޮޑުކޮށް އޭނާއަށް ޖިންސީ ޝިކާރައަށް ކުރިމަތިވި ކަންތައްތަކާއި ބެހޭގޮތުން ވަނީ ވާހަކަ ދައްކާފައެވެ. އޭނާއަށް ވަނީ 2016 ވަނަ އަހަރު އދ.ގެ ގުޑްވިލް އެންބެސެޑަރ އޮފް ސަރވައިވާރަސް އޮފް ހިއުމަން ޓްރެފިކިން ކަމުގެ މަގާމު ލިބިފައެވެ. ހަމަ އެއަހަރު ވަނީ ކައުންސިލް އޮފް ޔޫރަޕްގެ ހިއުމަން ރައިޓްސް ޕްރައިޒް އެވޯޑް ލިބިފައެވެ.

އުމުރުން 63 އަހަރުގެ ކޮންގޯގެ ޑޮކްޓަރު ޑެނިސް މުކްވެ ވަނީ ޖިންސީ ޝިކާރައަށް ވެފައިވާ އެތައް އަންހެނުންނަށް ފަރުވާ ދީފައެވެ. އޭނާގެ ބެލުމުގެ ދަށުން ރޭޕްގެ ޝިކާރަައަށް ވެފައިވާ 30،000އަށް ވުރެ ގިނަ އަންހެން ކުދިންނާއި އަންހެނުންނަށް ވަނީ ފަރުވާ ދީފައެވެ. އޭނާއަށް ވަނީ އދ.ގެ ހިއުމަން ރައިޓްސް އެވޯޑް 2008 ގައި ލިބިފައެވެ. އަދި އެފްރިކަން އޮފް ދަ އިޔާ 2009 ވަނަ އަހަރު ވަނީ ލިބިފައެވެ.

މިއަހަރުގެ ނޮބަލް ސުލްހައިގެ އިނާމަށް އަމިއްލަ ފަރާތްތަކުންނާއި އަމިއްލަ ޖަމިއްޔާ ޖަމާއަތްތަކުން 331 ފަރާތަކުން ވަނީ ނޮމިނޭޓްވެފައެވެ.

ނާދިއާ މުރާދާއި ޑޮކްޓަރު ޑެނިސް މުކްވެއަށް ނޯބެލް ސުލްހައިގެ އިނާމު ލިބުނުކަން ހާމަކޮށް އެ އޮގަނައިޒޭޝަނުން ބުނީ އެދެމީހުން ވަނީ ނުރައްކާތެރިކަން އެނގިތިބެ އަމިއްލަ ސެކިއުރިޓީގައި ފުރާނަ އަތްމައްޗަށްލާ ރޭޕްއާއި ދެކޮޅަށް އެތަކެއް މަސައްކަތްތަކެއް ކޮށްފައި ކަމަށެވެ. އަދި ރޭޕާއި ދެކޮޅަށް އެދެމީހުން ވަރުގަދަ ކެންޕޭންތަކެއް ކޮށްފައިވާ ކަމަށެވެ.

T