އިބޫގެ ސަރުކާރާއެކު ގުޅުން ބަދަހި ކުރާނަން: ސިރިސޭނާ
4 އޮކްޓޯބަރު 2018 | ބުރާސްފަތި 02:30ރިޔާސީ އިންތިޚާބުން ރައްޔިތުންގެ ނިންމުން ވަރަށް ސާފުކޮށް ވަނީ ފެނިގެން ގޮސްފައި
ސްރީ ލަންކާގެ ރައީސް މައިތިރިޕާލާ ސިރިސޭނާ
މިދިޔަ މަހު 23 ވަނަ ދުވަހު ބޭއްވި ރިޔާސީ އިންތިޚާބު ބޮޑު ތަފާތަކުން ކާމިޔާބު ކުރެއްވި އިންތިހާބީ ރައީސް އިބްރާހިމް މުހައްމަދު ސޯލިހްގެ ސަރުކާރާއެކު ގުޅުން އިތުރަށް ބަދަހި ކުރަން ބޭނުންފުޅުވާ ކަމަށް ސްރީ ލަންކާގެ ރައީސް މައިތިރިޕާލާ ސިރިސޭނާ ވިދާޅުވެއްޖެއެވެ.
އިބޫގެ ތަރުޖަމާނު މާރިޔާ އަހުމަދުދީދީ ވިދާޅުވީ ރިޔާސީ އިންތިޚާބު ކާމިޔާބު ކުރެއްވުމާއި ގުޅިގެން ސިރިސޭނާ، އިބޫއަށް ގުޅުއްވައި މަރުހަބާ ދަންނަވާފައިވާ ކަމަށާއި، ރިޔާސީ އިންތިޚާބުން ރައްޔިތުންގެ ނިންމުން ވަރަށް ސާފުކޮށް ފެނިގެން ގޮސްފައިވާ ކަމަށެވެ. އަދި އިބޫގެ ސަރުކާރާއެކު ގުޅުން އިތުރަށް ބަދަހި ކުރަން ބޭނުންވާ ވެސް ވިދާޅުވެފައިވާ ކަމަށް މާރިޔާ ވިދާޅުވިއެވެ.
ސިރިސޭނާ މަރުހަބާ ވިދާޅުވެފައިވާއިރު، ނޮވެމްބަރު 17 ގައި އިބޫ ރައީސް ކަމުގެ ހުވާކުރައްވާ ރަސްމިއްޔާތަށް ސްރީ ލަންކާގެ ބޮޑުވަޒީރު ރަނިލް ވިކްރަމަސިންހައަށް ވެސް ވަނީ ދައުވަތު ދެއްވައިފަ އެވެ.
އިންތިޚާބީ ރައީސް ހުވާކުރައްވާނެ ދުވަހަށް ގިނަ ބަޔަކު އިންތިޒާރު ކުރަމުންދާއިރު މި ރަސްމިއްޔާތުގެ ދުނިޔޭގެ އެކިކަންކޮޅުތަކުގެ ވެރިން ވަނީ ދައުވަތު ދެއްވައިފަ އެވެ.
