އިންތިޚާބުގެ ނަތީޖާ ނައިބު ރައީސް ޖިހާދު ގަބޫލުކުރައްވައިފި
4 އޮކްޓޯބަރު 2018 | ބުރާސްފަތި 14:55އިބޫ އާއި ފައިސަލަށް ޖިހާދު ވަނީ މަރުޙަބާ ވިދާޅުވެފައި
ރައީސް ޔާމީނާއި ނައިބު ރައީސް ޖިހާދު: އިންތިޚާބުގެ ނަތީޖާ ރައީސް ޔާމީން ގަބޫލު ނުކުރެއްވި ނަމަވެސް، ޖިހާދު ގަބޫލުކުރައްވާ
ސެޕްޓެމްބަރު 23 ގައި ބޭއްވި ރިޔާސީ އިންތިޚާބުގެ ނަތީޖާ ގަބޫލުފުޅު ކުރައްވާ ކަމަށް، ނައިބު ރައީސް އަބްދުﷲ ޖިހާދު ވިދާޅުވެއްޖެ އެވެ.
އިންތިޚާބާ ގުޅޭ ގޮތުން މީގެ ކުރިން އެއްވެސް ބަސްފުޅެއް ވިދާޅު ނުވެ ހުންނެވުމަށް ފަހު، ވޯޓްގެ ނަތީޖާ ގަބޫލުކުރައްވާ ކަމަށް ޖިހާދު މި ވިދާޅުވީ، ރައީސް ޔާމީން ބަލި ގަބޫލު ކުރެއްވުމަށް ފަހު، އިންތިޚާބާ މެދު ސުވާލު އުފައްދަވައި ޕީޕީއެމް. އިން މުޒާހަރާތައް ކުރަމުންދާ ދަނޑިވަޅެއްގަ އެވެ.
ނައިބު ރައީސް ޖިހާދު ވިދާޅުވީ ނިމިދިޔަ ރިޔާސީ އިންތިޚާބުގައި ރައްޔިތުން ނިންމި ގޮތް ބަލައި ގަންނަ ކަމަށާއި އަދި އިންތިޚާބު ކާމިޔާބު ކުރެއްވި އިބްރާހިމް މުހައްމަދު ސޯލިހާއި ފައިސަލް ނަސީމަށް މަރުހަބާ ވިދާޅުވާ ކަމަށެވެ.
އިންތިޚާބުގެ ސައްހަ ކަމާމެދު ސުވާލު އުފައްދައި ޕީޕީއެމް އިން ކުރަމުންދާ މުޒާހަރާތަކާމެދު ކެދެވަޑައިގަންނަވަނީ ކިހިނެތްތޯ ސުވާލު ކުރުމުން ނައިބު ރައީސް ޖިހާދު ވިދާޅުވީ "އެކަމުގައި ދާންޖެހޭނީ އިލެކްޝަން ކޮމިޝަނަށް" ކަމަށެވެ.
"އެ ކޮމިޝަން ޖަވާބުދާރީ ކުރަންޖެހޭނީ ދެއްތޯ" ޖިހާދު ވިދާޅުވި އެވެ.
ކޮންމެ ގޮތަކުން ވިޔަސް ވެރިކަމުގައި ހުންނަވާނީ ރައީސް ޔާމީން ކަމަށް އެމަނިކުފާނުގެ ސަޕޯޓަރުން ބުނަމުން ދިޔަ ނަމަވެސް، އިންތިޚާބުގައި އެ މަނިކުފާނަށް ލިބިވަޑައިގަތީ ވަރަށް ބޮޑު ނާކާމިޔާބެކެވެ. ގުޅިފައިވާ ޕާޓީތަކުގެ ކެންޑިޑޭޓް އިބްރާހިމް މުހައްމަދު ސޯލިހަށް އިންތީޚާބުގައި 58.4 ޕަސެންޓް ވޯޓް ލިބިވަޑައިގެންނެވި އިރު، އާރާއި ބާރު އަދި ދައުލަތުގެ ވަސީލަތްތައް ބޭނުން ކުރައްވައިގެން ރައީސް ޔާމީން ކެމްޕޭން ކުރެއްވި ކަމަށް ތުހްމަތު ކުރެވޭއިރު، އެކަނިކުފާނަށް ލިބިވަޑައިގަތީ 41.6 ޕަސެންޓް ވޯޓެވެ.
އެ ނަތީޖާ ގަބޫލުކުރައްވާ ކަމަށް ސެޕްޓެމްބަރު 24 ވަނަ ދުވަހު ރައީސް ޔާމީން ވިދާޅުވި އެވެ. އަދި ވެރިކަން ބަދަލުކުރުމުގެ މަރުހަލާ ކުރިއަށް ގެންދިއުމަށް ފުރިހަމަ އަށް އެއްބާރުލުން ދެއްވާނެ ކަމަށް ވިދާޅުވުމަށް ފަހު، އޭގެ ހަފުތާއެއްގެ ފަހުން އެ މަނިކުފާނު ވަނީ ނަތީޖާ ގަބޫލު ނުކުރައްވާ ކަމަށް ވިދާޅުވެފަ އެވެ.
