މިސަރުކާރުން މަސައްކަތްކުރަނީ އިންސާފަށް ފިލަން: އަމީތު
2 އޮކްޓޯބަރު 2018 | އަންގާރަ 09:40އިންސާފު ގާއިމް ކުރެވޭތަން ފެންނާތީ ދަރުބާރުގެ ފެކްޝަން މީހުން އުޅެނީ ބިރުން
ރައްޔިތުންގެ މަޖިލީހުގެ މަޑުއްވަރީ ދާއިރާގެ މެމްބަރު މުހައްމަދު އަމީތު | ރާއްޖެއެމްވީ
ރައީސުލްޖުމްހޫރިއްޔާ އަބްދުﷲ ޔާމީން އަބްދުލްގައްޔޫމާއި، އެމަނިކުފާނަށް ތާއީދުކުރާ މަދު ފަރާތްތަކުން ރިޔާސީ އިންތިޚާބުގެ ނަތީޖާ ގަބޫލުނުކޮށް ހަމަނުޖެހުމަށް މަސައްކަތް ކުރަމުންދަނީ އިންސާފަށް ފިލަން ބޭނުންވާތީ ކަމަށް ރައްޔިތުންގެ މަޖިލީހުގެ މަޑުއްވަރީ ދާއިރާގެ މެމްބަރު މުހައްމަދު އަމީތު ވިދާޅުވެއްޖެއެވެ.
ރާއްޖެޓީވީގެ ފަލަ ސަރުހީ ޕްރޮގްރާމުގައި އަމީތު ވިދާޅުވީ ގާނޫނު އަރާ ހަމަކޮށް އިންސާފު ގާއިމް ކުރެވޭތަން މިހާރު ފެންނަމުންދާ ކަމަށާއި، ދަރުބާރު ފެކްޝަން މީހުން އުޅެނީ އެކަމާ ބިރުން ކަމަށެވެ. ސަރުކާރުގެ މަތީ މަގާމުތަކުގައި މި ތިއްބެވި ގިނަ މީހުންނަކީ ބޮޑެތި ޖަރީމާތައް ފަސް އަހަރު ދުވަހު ހިންގާފައި ތިބި މީހުން ކަމަށްވާއިރު, ގާނޫނު އަރާ ހަމަކޮށްގެން ނުވާނެ ކަމަށް އެމީހުން ގަބޫލުކުރާ ކަމަށް އަމީތު ވިދާޅުވިއެވެ.
އަމީތު ވިދާޅުވީ އެ ބޭބޭފުޅުންގެ މައްޗަށް މާދަމާ ވެސް ޝަރީއަތް ހިންގޭވަރު ކިތާބީ ހެކިތައް އެބަހުރި ކަމަށާއި، މުޅި ދައުލަތުގެ ތެރޭގައި އެކަންކަން ފެންނަން އެބަހުރި ކަމަށެވެ. ރައީސް ޔާމީން ހިންގަވާފައިވާ ޖަރީމާތަކަށް އަލިއަޅުއްވާލައްވަމުން އަމީތު ވިދާޅުވީ ރައީސް ޔާމީން ގިނަ ޖަރީމާތަކަށް އަމިއްލަ ދުލުން އިއުތިރާފް ވެފައިވާ ކަމަށާއި، މާދަމާ ރައީސް ޔާމީންގެ މައްޗަށް ޝަރީއަތް ހިންގޭއިރު އެޝަރީއަތްތައް ކުރިއަށްދާނީ ޔާމީންގެ އަމިއްލަ އިއުތިރާފްގެ މައްޗަށް ކަމަށެވެ.
އަމީތު ވިދާޅުވީ އިންސާފު އަރާ ހަމަކުރާނެކަން ޔަގީންވާތީ މިހާރު މަސައްކަތް ކުރަނީ ފިލަން ކަމަށާއި، ނަމަވެސް ރައްޔިތުން ނުކުމެ ހުކުމް އިއްވާފައިވާއިރު އެއަށް ނުފިލޭނެ ކަމަށެވެ. އަދި އެހުކުމް ބޮލާލައި ޖަހާފައި ވެރިކަމުގައި ބަކުޑި ބައްދައިގެން ނުތިބެވޭނެ ކަމަށް އޭނަ ވިދާޅުވިއެވެ.
"ފާއިތުވެގެންދިޔަ ހަފްތާއެއްހާ ދުވަހުގެ ތެރޭގައި ވެސް އެބޭފުޅުން މަސައްކަތް ކުރަމުންދިޔައީ ވޯޓު އޮޅިވާލިކަމަށް ބުނެ އެކަމުގެ ހުއްޖަތް ގާއިމްކޮށްގެން އިތުރަށް ވެރިކަމުގައި ދެމިހުރެވޭނެ މަގެއް ހޯދުމަށްޓަކައި ހަގީގަތުގައި މަސައްކަތް ކުރަމުން މިއައީ. މިއީ އަޅުގަނޑުމެންނަށް އެނގޭ ޔާމީން އަކީ ބަލީ ގަބޫލުކުރެވޭނެ މީހެއް ނޫން. ޔާމީން އަކީ ބަލި ގަބޫލުކުރާނެ މީހެއް ވެސް ނޫން. އަދި އެކަންކަމެއް ޔާމީން އަކަށް ހަޖަމެއް ނުވާނެ ކަން ވެސް އަޅުގަނޑުމެނަށް އެނގޭ،" އަމީތު ވިދާޅުވިއެވެ.
އަމީތު ވިދާޅުވީ ހުދުމުހުތާރު ވެރިން އިންތިޚާބުގެ ނަތީޖާ ގަބޫލު ނުކުރާނެ ކަމަށާއި، އެ މީހަކު ވެރިކަމުން ދުރުކުރަން ޖެހޭނީ ރައްޔިތުން ނުކުމެގެން ކަމަށެވެ. އަދި އެއީ މިހާތަނަށް ދުނިޔޭގެ އެހެން ގައުމުތަކުން ދެކެފައިވާ ހަގީގަތް ކަމަށް ވެސް އޭނާ ވިދާޅުވިއެވެ.
އަމީތު ވިދާޅުވީ ފާއިތުވެގެންދިޔަ ފަސް އަހަރުގެ ހުދުމުތާރުގެ ވެރިކަމަށް ރައްޔިތުން ނޫނެކޭ ބުނެފައިވާއިރު ވޯޓުން ގަދަވުމަށް މަސައްކަތް ކުރި ނަމަވެސް ކާމިޔާބު ނުވާނެ ކަމަށެވެ.
ރައީސް ޔާމީންގެ ވެރިކަން ނިމި މަޒީވެ ހިނގައްޖެ ކަމަށާއި، ކުރިއަށް އޮތް ފަސް އަހަރު ވެރިކަން ކުރާނީ އިންތިޚާބީ ރައީސް އިބްރާހިމް މުހައްމަދު ސޯލިހު (އިބޫ) ކަމަށެވެ.
