އަމީތު ޕީޕީއެމްއިން ވަކި ކުރުމަށް ނިންމައިފިން: ނިހާން
ފަހަކަށް އައިސް އަމީތު ގެންދަވަނީ ސަރުކާރުގެ ބައެއް ސިޔާސަތުތަކަށް ފާޑު ވިދާޅުވަމުން
ރައްޔިތުންގެ މަޖިލީހުގެ މެމްބަރު މުހައްމަދު އަމީތު
ރައްޔިތުންގެ މަޖިލީހުގެ ރައީސް އަބްދުﷲ މަސީހުގެ އިތުބާރު ނެތްކަމަށް ވޯޓާ ގުޅިގެން ޕީޕީއެމްއަށް ފާޑުވިދާޅުވަން ފެއްޓެވެމުން ޕީޕީއެމްގެ ޕާލިމެންޓްރީ ގުރޫޕުގެ މެމްބަރު މުހައްމަދު އަމީތު އެޕާޓީން ވަކިކުރަން ނިންމާފައިވާ ކަމަށް ޕާލިމެންޓްރީ ގުރޫފުގެ ލީޑަރު އަހްމަދު ނިހާން ހުސެއިން މަނިކް ވިދާޅުވެއްޖެ އެވެ.
މުލިއާގެ ކައިރީގައި ހުންނަވައި ހޯމަ ދުވަހު ނޫސްވެރިންނާ ވާހަކަދައްކަވަމުން ނިހާން ވިދާޅުވީ އަމީތުގެ އަމަލުތައް ހުރި ގޮތުން ޕީޖީ ގްރޫޕުން ވަކިކުރަން އެ ގްރޫޕުން ނިންމާފައިވާ ކަމަށާއި އެ ނިންމުން ސްލޫކީ ކޮމިޓީ އަށް ހުށަހަޅުއްވާނެ ކަމަށެވެ. އަދި އެކަމުގެ ސިޓީ ވެސް ތައްޔާރުކުރެވިފައިވާ ކަމަށް ވެސް ނިހާން ވިދާޅުވިއެވެ. ނަމަވެސް އެކަން ނިންމެވީ ކޮން އިރަކު ބޭއްވި ބައްދަލުވުމަކުން ކަމެއް ނިހާނެއް ވިދާޅެއް ނުވެއެވެ.
އަމީތު ވަނީ ރޭގެ ވަގުތެގައި ޕީޕީއެމްގެ ޕާލަމަންޓްރީ ގްރޫޕްގެ ވައިބާ ގްރޫޕުން ވެސް ބޭރުކޮށްފައެވެ.
އަމީތަކީ ޕީޕީއެމް ޕާލިމެންޓްރީ ގުރޫޕަށް ނިސްބަތްވެވަޑައިގަންނަވާ މެންބަރެއް ނަމަވެސް ފަހަކަށް އައިސް އަމީތު ވަނީ ސަރުކާރުގެ ބައެއް ސިޔާސަތު ތަކަށް ފާޑު ވިދާޅުވެފައެވެ. އެ ގޮތުން ސައުދީ ޝާހީ އާއިލާ އަށް ފ. އަތޮޅު ވިއްކާލުމަށް ކުރާ މަސައްކަތަށް އަމީތު ވަނީ ފާޑު ވިދާޅުވެފައެވެ. އަދި މަސީހްގެ އިތުބާރު ނެތްކަމަށް ހުށަހެޅި މައްސަލައިގަ ވެސް އިދިކޮޅު ފަރާތްތަކާ އެކު މަސީހްގެ އިތުބާރު ނެތް ކަމަށް ވޯޓު ދެއްވާނެ ކަމަށް އޭނާ ވަނީ އާދީއްތަ ދުވަހުގެ ރޭ އިއުލާންކުރައްވާފައެވެ. އަދި މިއަދު މަޖިލީހުގައި ވޯޓަށް އެހި ވަގުތު އޭނާ ވަނީ އިދިކޮޅު ފަރާތްތަކާ އެކު މަޖިލީހުން ނިކުމެވަޑައިގެންފައެވެ.
ވޯޓު ނެގުން ކުރިއަށް ގެންދިޔަ ވަގުތު ރާއްޖެޓީވީ ކައިރީގައި ނޫސްވެރިނާ ވާހަކަ ދައްކަވަމުން އަމީތު ވިދާޅުވެފައި ވަނީ މިއަދުގެ މަޖިލީހުގެ ޖަލްސާ ކުރިއަށްދިޔަ ގޮތުން ވެސް މަޖިލީހުގެ ރިޔާސަތަށް ބަދަލު އަންނަން އެބަޖެހޭ ކަމަށް ޤަބޫލު ކުރެއްވޭ ކަމަށާއި މަޖިލިސް ކުރިއަށް ގެންދަން ފުރުޞަތު ލިބެން އެބަޖެހޭ ކަމަށެވެ. އަމީތުގެ އިތުރުން ޕީޕީއެމްގެ މުސްތަޝާރު، ރައީސް އަބްދުﷲ ޔާމީންގެ ފެކްޝަނުން އާދީއްތަ ދުވަހު ވަނީ އެ ޕާޓީ އުފެއްދެވި އަދި އެ ޕާޓީގެ ރައީސް މައުމޫން އަބްދުލް ގައްޔޫމާއި ތުލުސްދޫ ދާއިރާގެ މެންބަރު މުހައްމަދު ވަހީދު އިބްރާހީމް (ލޯޔަރު ވައްޑެ) ވެސް ޕާޓީން ވަކިކޮށްފައެވެ.
ނޫސްވެރިންނާ ވާހަކަ ދައްކަވަމުން ނިހާން ވިދާޅުވީ ރައްޔިތުންގެ މަޖިލީހުގެ ރައީސް އަބްދުﷲ މަސީހު މުހައްމަދުގެ އިތުބާރު ނެތްކަމުގެ މައްސަލާގައި ނަގަން ހަމަޖެހުނު ވޯޓްގައި ރޯލް ކޯލް ވޯޓަކަށް ދާން ނިންމީ ސިސްޓަމްގައި މައްސަލަ ހުރިކަން ދުރާލާ އެނގިފައިވުމުން ކަމަށެވެ. ނަމަވެސް ކުރިން އެކަން ކަމާ ބެހޭ ފަރާތްތަކަށް އަންގާފައި ވާނެތޯ ނޫސްވެރިން ކުރި ސުވާލަށް ނިހާން ޖަވާބު ދެއްވާފައެއް ނުވެއެވެ.
ނިހާން ވިދާޅުވީ ރޯލް ކޯލް ވޯޓަކަށް ދިޔުމާ ބެހޭ ގޮތުން ނެގި ވޯޓު ސައްހަ ނޫން ކަމަށެވެ. އެ ވޯޓުގައި ރިޔާސަތުގައި އިންނެވި ރީކޯ މޫސާ މަނިކާއި ޖަލުގައި ހުންނެވި އަހްމަދު މަހްލޫފް ވެސް ވޯޓު ލައްވާފައިވާ ކަމަށް ދައްކާ ކަމުގެ މައުލޫމާތު ލިބިފައިވާ އިރު އެއީ ވެސް ވޯޓު ސިސްޓަމާ ބަޔަކު ކުޅޭކަމުގެ ހެއްކެއް ކަމަށް ނިހާން ވިދާޅުވިއެވެ. އަދި އެ ދެ ބޭފުޅުންގެ މޭޒުކޮޅު ވަށައިގެން ތިއްބެވީ އިދިކޮޅު މެންބަރުން ކަމަށާއި އެކަން ހިނގި ގޮތެއް ބަލަންޖެހޭ ކަމަށް ނިހާން ވިދާޅުވިއެވެ.
