އިދިކޮޅު ހަނގުރާމަވެރިންގެ ލީޑަރާ އެކު 40 ހަނގުރާމަވެރިން މަރާލާފައިވާ ކަމަށް ޔަމަނުގެ ސިފައިން ބުނެފި
3 އޮކްޓޯބަރު 2018 | ބުދަ 19:04އެ އޮޕަރޭޝަން ހިންގީ ސައުދީ ކޯލިޝަނުގެ އެއްބާރުލުމާ އެކު
ޔަމަނުގެ ހަނގުރާމަ ފަށާފައި ވަނީ 2014 ވަނަ އަހަރު
އިދިކޮޅު ހަނގުރާމަވެރިންގެ ލީޑަރާ އެކު 40 ހަނގުރާމަވެރިން މަރާލާފައިވާ ކަމަށް ޔަމަނުގެ ސިފައިން ބުނެފިއެވެ.
އެ އޮޕަރޭޝަން ހިންގީ ސައުދީ ކޯލިޝަނުގެ އެއްބާރުލުމާ އެކު ކަމަށާއި އިދިކޮޅު ހަނގުރާމަވެރިންނާ ކުރިމަތިލީ ހުދައިދާގެ ހުޅަނގުން ކަމަށް ޔަމަނުގެ ސިފައިން ބުނެއެވެ.
ސިފައިންގެ އިންޓެލިޖެންސް ރިޕޯޓްތަކަށް ބަލާއިރު މަރުވި ލީޑަރަކީ އިދިކޮޅު ހަނގުރާމަވެރިންގެ އެންމެ އިސް އެއް ލީޑަރެވެ. އޭނާއަކީ ގޮވާ މައިންތަކާއި އެކި ކަހަލަ ބޮން ތައްތައްޔާރު ކުރުމުގެ މާހިރެކެވެ.
އޭނާއަކީ މީގެ ހަތް ވަރަކަށް އަހަރު ކުރިން ލުބުނާނުގަޔާއި އީރާނުގައި ސިފައިންގެ ތަމްރީން ހެދި މޮޅު މީހެކެވެ.
ޔަމަނުގައި 2014 އިިން ފެށިގެން ދާހިލީ ހަނގުރާމަ ހިނގަމުންދާއިރު، އެ ހަނގުރާމަ ފެށެން ދިމާވީ ހޫޘީންގެ ޝީއީ ހަނގުރާމަވެރިން ވެރިރަށް ސަންޢާ އަށް އަރައި، ބައިނަލްއަގްވާމީ މުޖުތަމައު އިން ބަލައިގެންފައިވާ ރައީސް އަބްދުއް-ރައްބޫ މަންސޫރު ހާދީގެ ސަރުކާރު ވެރިކަމުން ވައްޓާލުމާ ގުޅިގެންނެވެ.
ސައުދީ އިން އިސްވެ އޮވެ، 2015 ގައި ހަނގުރާމައިގެ ހާއްސަ ކޯލިޝަނެއް އުފައްދައި ހޫޘީންނާ ދެކޮޅަށް ހަނގުރާމަ ކުރަން ފެށިއެވެ.
