ރައީސް ޔާމީނުގެ މައްޗަށް ޖިނާއީ ތަހުގީގު ކުރަންޖެހޭ، ފިލިޔަ ދީގެން ނުވާނެ: ހަސަން ލަތީފު
ސަރުކާރުގެ މުއައްސަސާތަކުން އެމަނިކުފާނުގެ މައްޗަށް ހެއްކާ އެކު މައްސަލަތައް ވަނީ ހުށައަޅާފައި
އެމްޑީޕީގެ ޗެއާޕާސަން ހަސަން ލަތީފު
ރައީސް އަބްދުﷲ ޔާމީނުގެ މައްޗަށް ޖިނާއީ ޝަރީއަތެއް ކުރަންޖެހޭ ކަމަށާއި އެމަނިކުފާނު ފިލިޔަ ދީގެން ނުވާނެ ކަމަށް އެމްޑީޕީގެ ޗެއާޕާސަން ހަސަން ލަތީފު ވިދާޅުވެއްޖެއެވެ.
އަލްޖަޒީރާއީން އަންގާރަ ދުވަހު ގެނެސްދިން "އިންތިޚާބަށް ކައިރިވެފައިވަނިކޮށް ރައީސް ޔާމީންގެ އެކައުންޓަށް 1.5 މިލިއަން ޑޮލަރު" ވަތް ކަމަށް ބުނާ ޚަބަރު އެޓޭޗްކުރައްވައި ކުރެއްވި ޓްވީޓެއްގައި ހަސަން ލަތީފު ވިދާޅުވީ ފުލުން ރައީސް ޔާމީންގެ މައްޗަށް ޖިނާއީ ތަހުގީގެއް ކުރިއަށް ގެންދަން ޖެހޭ ކަމަށެވެ. ސަރުކާރުގެ މުއައްސަސާތަކުން އެމަނިކުފާނުގެ މައްޗަށް ހެއްކާ އެކު މައްސަލަތައް ހުށައަޅާފައިވާ ކަމަށާއި އެހެންކަމުން އެމަނިކުފާނު ފިލިޔަ ނުދީ ހިފަހައްޓަން ޖެހޭ ކަމަށެވެ.
އެމްއެމްއޭގެ ފައިނޭންޝިއަލް އިންޓެލިޖެންސް ޔުނިޓުން ސެޕްޓެމްބަރު މަހުގެ 13 ވަނަ ދުވަހު އޭރުގެ އެސިސްޓެންޓް ކޮމިޝަނަރ އޮފް ޕޮލިސް އަބްދުﷲ ނަވާޒަށް ފޮނުވި ސިޓީއަކާ ހަވާލާދީ އަލްޖަޒީރާ އިން ރިޕޯޓްކޮށްފައި ވަނީ ދެ ފަހަރެއްގެ މަތިން ރައީސް ޔާމީންގެ އެކައުންޓަށް 1.5 މިލިއަން ޑޮލަރު ޖަމާކޮށްފައިވާ ކަމަށެވެ. އެ ހުރިހާ ފައިސާ ވެސް ޖަމާކޮށްފައި ވަނީ ނަގުދު ފައިސާގެ ގޮތުގައި ކަމަށް ވެސް އެ ނޫހުން ރިޕޯޓްކޮށްފައި ވެއެވެ.
