ރައީސް އަބްދުﷲ ޔާމީން ބައިވެރިވެވަޑައިގެން، ޕީޕީއެމް އޮފީސް ކުރިމަތީގައި ކުރި މުޒާހަރާ ކަވަރު ކުރަން ދިޔަ ރާއްޖެޓީވީގެ ނޫސްވެރިޔާއަށް ޕީޕީއެމްގެ އެކްޓިވިސްޓުން ހުރަސް އަޅައި، ފުރައްސާރަކޮށްފިއެވެ.
ޕީޕީއެމް އޮފީސް ކުރިމަތީގައި ކުރި މުޒާހަރާގެ ވާހަކަތައް ގެނެސްދިނުމަށް ހޯމަ ދުވަހުގެ ރޭ ރާއްޖެޓީވީގެ ނޫސްވެރިޔާ ހުސައިން ހަސަން، ކެމެރާ ކުރިމަތީގައި ހުއްޓާ، ޕީޕީއެމްގެ އެކްޓިވިސްޓުންތަކެއް ވަނީ އޭނާއަށް ފުރައްސާރަކޮށް، މަސައްކަތަށް ހުސް އަޅާފައެވެ. އަދި ޕީޕީއެމް އެކްޓިވިސްޓުން ވަނީ ބޭއަދަބީ ބަސްތައް ބޭނުންކޮށް އަވަގުރާނަ ގޮވާފައި ވެއެވެ.
ޕީޕީއެމްގެ އެކްޓިވިސްޓުން ހުސައިންގެ މަސައްކަތަށް ހުރަސް އަޅަން ފެށުމުން، އެކްޓިވިސްޓުންތައް އެ ސަރަހައްދުން ދުރަށް ޖެއްސީ އެތަނުގައި އެ ވަގުތު ހަރަކާތްތެރިވި ފުލުހުންނާއި އާންމުންނެވެ. ފުލުހުން އެ މައްސަކަތް ކުރަމުންދިޔަ ވަގުތު ޕީޕީއެމްގެ އެކްޓިވިސްޓުންތަކެއް ވަނީ ހުސައިންގެ ގަޔަށް އަތްލައި މާރާމާރީ ހިންގުމަށް މަސައްކަތްކޮށްފައެވެ.
ޕީޕީއެމްގެ އެކްޓިވިސްޓުން ހުސައިންއަށް ހުރަސް އެޅި ވަގުތު އޭނާ ވަނީ ކެތްތެރިކަމާ އެކު، އެތަނުގައި މަޑުކޮށްގެން ހުރެ މުޒާހަރާގައި ހިނގައިދިޔަ ކަންތައްތައް ރިޕޯޓުކޮށްފައެވެ.
ޕީޕީއެމުން މީގެ ކުރިން ހިންގި ހަރަކާތްތައް ކަވަރު ކުރުމަށް ދިޔަ ރާއްޖެޓީވީގެ ނޫސްވެރިންނަށް އެ ޕާޓީން ވަނީ އެކި ފަހަރުމަތިން ހުރަސް އަޅައި، ފުރައްސާރަކޮށްފައެވެ. މުޒާހަރާ ކަވަރު ކުރަން ހަރަކާތްތެރިވާ ރާއްޖެޓީވީގެ ނޫސްވެރިންނަށް ތަކުރާރުކޮށް ހުރަސް އަޅައި، ފުރާނައަށް ނުރައްކާވާ ގޮތަށް ދީފައިވާ ހަމަލާތަކާ ގުޅިގެން ކަމާގުޅޭ މުއައްސަސާތަކުން މިހާތަނަށް އެއްވެސް ފިޔަވަޅެއް އަޅާފައެއް ނުވެއެވެ.
