ރައީސް އަބްދުﷲ ޔާމީނުގެ ސަރުކާރާ ގާތް ގުޅުމެއް ބާއްވާ ޗައިނާގެ ރައީސް ޝީ ޖިންޕިންގް ވެސް އިންތިޚާބީ ރައީސް އިބްރާހިމް މުހައްމަދު ސޯލިހު (އިބޫ)އަށް މަރުހަބާ ވިދާޅުވެއްޖެއެވެ.
އިންތިޚާބީ ރައީސަށް ފޮނުއްވި މެސެޖުގައި ޝީ ވިދާޅުވީ ރާއްޖެ އާއި ޗައިނާއަކީ ޒަމާންވީ ރަހްމަތްތެރި ދެ ގައުމު ކަމަށެވެ. ދެ ގައުމުގެ ދެމެދުގައި ބަދަހިވެފައިވާ ގުޅުން ކުރިއަށް އޮތް ދުވަސްތަކުގައި ދެމެހެއްޓުމަށް ޗައިނާގެ އޮތީ ތައްޔާރަށް ކަމަށް ޝީ ފޮނުއްވެވި މެސެޖުގައިވެއެވެ. އަދި އެކީގައި މަސައްކަތްކޮށް ރަހްމަތްތެރިކަން އިތުރު ހަރުފަތަކަށް ގެންދިއުމަށް ޝައުގުވެރިވާ ކަމަށް ވެސް ޝީ ވިދާޅުވެފައިވެއެވެ. ދެ ގައުމު ގުޅިގެން މަސައްކަތް ކުރުމުން އޭގެ ފޮނި މީރުކަން ލިބޭނީ ދެ ގައުމުގެ ވެސް ރައްޔިތުންނަށްކަން ޝީ ފާހަގަ ކުރައްވާފައިވެއެވެ. ޝީ އެހެން ވިދާޅުވިއިރު މިދިޔަ އަހަރު ރާއްޖެއަށް އެންމެ ގިނައިން ފަތުރުވެރިން އައިސްފައި ވަނީ ވެސް ޗައިނާއިންނެވެ.
ޗައިނާއިން ވަނީ ރައީސް ޔާމީންގެ ސަރުކާރާ ގުޅިގެން ތަރައްގީގެ މަޝްރޫއުތަކެއް ހިންގާފައެވެ. އަދި އަވަށްޓެރި އިންޑިއާގެ ބަދަލުގައި ރައީސް ޔާމީނާއެކު ބާއްވަމުން ގެންދިޔަ ގުޅުމުގެ ސަބަބުން، ގިނަ ބައެއްގެ ފާޑުކިޔުން ރައީސް ޔާމީންގެ ސަރުކާރަށް އާމަޒުވިއެވެ.
ޗައިނާއިން އިބޫއަށް މަރުހަބާ ކިޔާފައިވާއިރު، އަވަށްޓެރި ގައުމުތަކުންނާއި ދުނިޔޭގެ ބޮޑެތި ބާރުތަކުން ދަނީ އެމަނިކުފާނު ހޯއްދެވި ކާމިޔާބީއަށް މަރުހަބާ ކިޔަމުންނެވެ.
