އިންތިހާބީ ރައީސް އިބޫ މަޖިލީޙުގެ މާލިއްޔަތު ކޮމެޓީއަށް ވަޑައިގެން ބަހުސްގައި ބައިވެރިވެވަޑައިގެންފި
ދައުލަތުގެ ބަޖެޓް ދިރާސާ ކުރާއިރު އަންނަ ސަރުކާރުގެ ސިޔާސަތުތައް ހިމެނެން ޖެހޭ
މަޖިލީހުގެ މާލިއްޔަތު ކޮމެޓީގައި އިންތިހާބީ ރައީސް އިބޫ އާއި އިންތިހާބީ ނާއިބު ރައީސް ފައިސަލް ބައިވެރިވެވަޑައިގަންނަވަނީ
އިންތިހާބީ ރައީސް އިބްރާހީމް މުހައްމަދު ސޯލިހު (އިބޫ)އާއި އިންތިހާބީ ނާއިބު ރައީސް ފައިސަލް ނަސީމު ރައްޔިތުންގެ މަޖިލީހުގެ މާލިއްޔަތު ކޮމެޓީން ބުރާސްފަތި ދުވަހު ބޭއްވި ބައްދަލުވުުގައި ބައިވެރިވެވަޑައިގެން އެޖެންޑާގައިވާ ކަންކަމާއިމެދު ބަހުސް ކުރައްވައިފި އެވެ.
ބުރާސްފަތި ދުވަހުގެ ހަވީރު މާލިއްޔަތު ކޮމެޓީން ބޭއްވި ބައްދަލުވުމަށް ގުޅިފައިވާ ސިޔާސީ ޕާޓީތަކުގެ ކެންޑިޑޭޓް އަދި އިންތިހާބީ ރައީސް އިބްރާހީމް މުހައްމަދު ސޯލިހު އާއި އިންތިހާބީ ނާއިބު ރައީސް ފައިސަލް ނަސީމު މާލިއްޔަތު ކޮމެޓީއަށް ވަޑައިގެންނެވުމަށް ކޮމެޓީގެ މެމްބަރުން ވަނީ އެ ދެ ބޭފުޅުންނަށް ވަރަށް ހޫނު މަރުހަބާއެއް ދަންނަވާފަ އެވެ.
އެގޮތުން މިހާރު ހިނގަމުންދާ ސަރުކާރު ހިންގާ ޕީޕީއެމް-އެމްޑީއޭގެ މެމްބަރުން ވަނީ މިހާރު އިންތިހާބު ކުރެވިފައިވާ އިބޫގެ ސަރުކާރަށް އެއްބާރުލުން ދެއްވާނެ ކަމަށާއި އަދި މަޖިލީހުގެ ކުރިއަށްމިދާ ދައުރުގައި އެންމެ ބޮޑު މަސައްކަތްތަކެއް ކުރެވޭ އަންނަ އަހަރަށް ލަފާ ކުރާ ދައުލަތުގެ ބަޖެޓް ދިރާސާ ކުރުމާއި ފާސް ކުރުމުގައި ވެސް އިބޫގެ ސަރުކާރުގެ ސިޔާސަތުތައް ތަންފީޒު ކުރުމަށް ބޭނުންވާ ކަންކަން ކުރުމަށް މަޖިލީހުގެ ތެރެއިން ދޭންޖެހޭ އެއްބާރުލުން ދެއްވާނެ ކަމަށް ވިދާޅުވެފަ އެވެ.
އިންތިހާބީ ރައީސް އިބްރާހީމް މުހައްމަދު ސޯލިހު ވިދާޅުވީ ދައުލަތުގެ ދަރަނި ވަރަށް ބޮޑު ވެފައިވާ ކަމަށާއި އެކަމަށް ވަރަށް ބޮޑަށް ސަމާލުކަން ދޭންޖެހޭ ކަމަށެވެ. އެގޮތުން މިހާރު ނަގާފައިވާ ލޯނުތައް އަނބުރާ ދެއްކުމުގެ މުއްދަތު އިތުރުކޮށް، ދައްމާލައި، ދައުލަތުގެ އާމްދަނީ އިތުރު ކުރެވޭނެ ގޮތަށް މަސައްކަތް ކުރަންޖެހޭ ކަމަށެވެ.
އިބޫ އާއި ފައިސަލް ވެސް ވިދާޅުވީ އެ ދެ ބޭފުޅުން ސަރުކާރާ ހަވާލުވެ، މަގާމުގެ ހުވާ ކުރައްވާ ދުވަހާ ހަމައަށް މަޖިލީހުގެ ޖަލްސާތަކުގައި ބައިވެރިވެވަޑައި ގަންނަވާނެ ކަމަށާއި އަންނަ އަހަރަށް ލަފާކުރާ ދައުލަތުގެ މަޖިލީހުގައި ދިރާސާ ކުރަމުންދާއިރު، މިހާރުގެ ސަރުކާރުގެ އެއްބާރުލުން ވަރަށް މުހިއްމު ކަމަށް ވެސް އިންތިހާބީ ރައީސް އިބްރާހީމް މުހައްމަދު ސޯލިހު ވިދާޅުވި އެވެ.
އިންތިހާބީ ރައީސް އިބްރާހީމް މުހައްމަދު ސޯލިހުއާއި އިންތިހާބީ ނާއިބު ރައީސް ފައިސަލް ނަސީމްއަކީ މަޖިލީހުގެ މާލިއްޔަތު ކޮމެޓީގެ މެމްބަރުންނެވެ. އަދި މިހާރުގެ ރައީސް އަބްދުﷲ ޔާމީން އަބްދލްގައްޔޫމްއަކީ ވެސް މާލިއްޔަތު ކޮމެޓީގެ ކުރީގެ މެމްބަރެކެވެ.
