އަންނަ ހަފްތާގައި މަޖިލިސް ޖަލްސާތައް ފަށަނީ
26 ސެޕްޓެމްބަރު 2018 | ބުދަ 07:19މިހާރު މިހިނގަނީ މަޖިލީހުގެ މިއަހަރުގެ ފަހު ދައުރު، ނުވަތަ ތިން ވަނަ ދައުރު
ރައްޔިތުންގެ މަޖިލީހުގެ ޖަލްސާއެއްގެ ތެރެއިން
އަންނަ ހަފްތާ އިން ފެށިގެން ރައްޔިތުންގެ މަޖިލީހުގެ ޖަލްސާތައް ބޭއްވުމަށް މަސައްކަތް ކުރަމުން އެބަދެއެވެ.
ރައްޔިތުންގެ މަޖިލީހުގެ ޖަލްސާތައް ހުއްޓިފައިވާތީ އާއި މަޖިލީހުގެ ޖަލްސާތައް ބާއްވާނެ ދުވަހެއް އޮލުން ފިލުވުމަށް މަޖިލީހުގެ ރައީސް ކަމުގެ މަގާމުގައި ހުންނެވި އަބްދުﷲ މަސީހު މުހައްމަދަށް ގުޅަން ކުރި މަސައްކަތް ކާމިޔާބުވާގޮތް ވަނީ ނުވެފައެވެ. އަދި މަޖިލީހުގެ އަމީން އާއްމު ނިއުޝާއަށް ގުޅިފައިނުވާތީ އެ މައުލޫމާތު ވަނީ މަޖިލީހުގެ އިދާރާއިން ލިބޭގޮތް ނުވެފައެވެ.
ނަމަވެސް ޕީޕީއެމް ޕާލަމެންޓްރީ ގްރޫޕްގެ ލީޑަރ އަހުމަދު ނިހާނު ހުސައިންމަނިކުއަށް ގުޅާލުމުން ވިދާޅުވީ އަންނަ ހަފްތާގެ ހޯމަ ނުވަތަ ބުރާސްފަތި ދުވަހު މަޖިލީހުގެ ޖަލްސާއެއް ބޭއްވޭނެ ކަމުގެ މައުލޫމާތު ލިބިފައިވާ ކަށެވެ.
ގުޅިފައިވާ ސިޔާސީ ޕާޓީތަކުގެ ޖޮއިންޓް ޕާލަމެންޓްރީ ގްރޫޕްގެ ބައްދަލުވުމެއް އަންގާރަ ދުވަހު މ. ކުނޫޒުގައި ވަނީ ބާއްވާފައެވެ. މައުލޫމާތު ލިބިފައިވާ ގޮތުގައި ގުޅިފައިވާ ސިޔާސީ ޕާޓީތަކުގެ ޖޮއިންޓް ޕާލަމެންޓްރީ ގްރޫޕުން ވެސް ދަނީ މަޖިލީހުގެ ޖަލްސާއެއް ބޭއްވޭތޯ މަސައްކަތް ކުރަމުންނެވެ.
މަޖިލީހުގެ ރައީސް ކަމުގެ މަގާމުގައި ހުންނެވި މަސީހުގެ އިތުބާރު ނެތްކަމުގެ މައްސަލައެއް މިދިއަ އަހަރު މަޖިލީހަށް ހުށަހެޅި ހިސާބުން މަޖިލީހުގެ ޖަލްސާތައް އެކަށީގެންވާ ގޮތެއްގައި ކުރިއަށް ގެންދެވިފައެއް ނުވެއެވެ. ގިނަ އަދަދެއްގެ ސިފައިން މަޖިލީހުގެ އިދާރާގައި ހަރަކާތްތެރިވެފައިވާއިރު، މަޖިލީސް އޮތީ ވެސް ސިފައިން "ހިސޯރު" ކޮށްފައެވެ.
އޭގެ ފަހުން ދެން ފެންމަތިވީ އިލެކްޝަންސް ކޮމިޝަނުން މަޖިލީހުގެ 12 މެމްބަރެއްގެ ގޮނޑި ގެއްލިފައިވާ ކަމަށް ބުނާ މައްސަލައެވެ. އެމައްސަލަ ސުޕްރީމް ކޯޓަށް ހުށަހަޅާފައި އޮންނަތާ އެތައް ދުވަހެއް ވެފައިވާއިރު، މިއަދާ ހަމައަށް އެ މެމްބަރުންގެ ގޮނޑި ގެއްލިފައިވާ ކަމަށް ނިންމާފައިވާ ސާފު ހުކުމެއް އިއްވާފައެއް ނުވެއެވެ. ނަމަވެސް އެ 12 މެމްބަރުން މަޖިލީހަށް ވަނުމުގެ ފުރުސަތު މަޖިލީހުގެ އިދާރާއިންނާއި ސަލާމަތި ހިދުމަތްތަކުން ދީފައެއް ނުވެއެވެ.
