ރައީސް ޔާމީން އިންތިޚާބުން ފެއިލްވީ ލީޑަރޝިޕުގެ އަމިއްލަ އެދުމާހުރެ: ޑޭވް
މިއީ އަމިއްލަ އެދުމާއި އަންބޮނޑި ބޮޑު ކުރުމުގެ ނަތީޖާ
އަހުމަދު ނަޝީދު (ޑޭވް) ރައީސް ޔާމިންއާ ސަލާމް ކުރަނީ
ރައީސް ޔާމީން އިންތިޚާބުން ފެއިލްވީ ލީޑަރޝިޕްގެ އަމިއްލަ އެދުމާހުރެ ކަމަށް ރައީސް ޔާމީން ކެމްޕެއިންގައި ހަރަކާތްތެރިކޮށް ފެނު އަދި މިސަރުކާރުގެ ކުރީގެ ސްޕޯޓްސް ކޮމިޝަނަރ އަހުމަދު ނަޝީދު (ޑޭވް) ބުނެފިއެވެ.
އޭނާ މިއަދު ކުރި ޓްވީޓެއްގައި ލީޑަރ ޝިޕަށް އިޝާރާތްކޮށް ބުނެފައިވަނީ ރިޔާސީ އިންތިޚާބުން ރައީސް ޔާމީން ފެއިލްކޮށްލީ ހަމަ "ކަލޭމެން" ކަމަށެވެ. އަދި މިއީ އަމިއްލަ އެދުމާއި އަންބޮނޑި ބޮޑު ކުރުމުގެ ނަތީޖާ ކަމަށެވެ.
ޑޭވް ބުނީ މީހަކު އިޚްލާސްތެރިވެގެން ހޮވޭނެނަމަ ރައީސް ޔާމީން ހޮވުނީސް ކަމަށާއި އެސެސްމެންޓް ހަދައި ނިންމާފައިވާ ކަމަށެވެ.
ޑޭވް ބުނީ ރައީސް ޔާމީން ފެއިލްވުމުގެ ޒިންމާ ނަގަން ޖެހެނީ ލީޑަރޝިޕްއާއި މެޑަމް އަރިހުގައި އުޅުނު ވަކި ބައެއް ކަމަށެވެ.
ޑޭވްގެ އިތުރުން ޕީޕީއެމަށް ނިސްބަތްވާ ރައްޔިތުންގެ މަޖިލީހުގެ ބައެއް މެމްބަރުންވެސް ވަނީ ރައީސް ޔާމިން ފެއިލްވުމަކީ ވަރަށްބޮޑަށް ލީޑަރޝިޕް ލަދުގަންނަން ޖެހޭނެ ކަމެއްކަމަށް ވިދާޅުވެ ލިޑަރޝިޕަށް ފާޑު ވިދާޅުވެފައެވެ.
2013 ވަނަ އަހަރުގެ ރިޔާސީ އިންތިޚާބުގެ ކެމްޕެއިންގައި ރައީސް ޔާމީނަށް ތާއީދު ހޯދައިދިނުމަށް ގިނަ މަސައްކަތްތަކެއް ކުރި ޑޭވް، މި އަހަރުގެ ރިޔާސީ އިންތިޚާބުގެ ކެމްޕެއިން ފެށެން ކައިރިވެފައި ވަނިކޮށް، ޕީޕީއެމްގެ ލީޑަރޝިޕްގައި މިހާރު ތިބި ބައެއް ފަރާތްތަކާއި ޖެހުނު މައްސަލަތަކެއްގެ ސަބަބުން މި އަހަރުގެ ކެމްޕެއިންގައި އެއްވެސް ވަރަކަށް ހަރަކާތްތެރި ވެފައެއް ނުވެއެވެ.
