އެ ތިން ބޭފުޅުން ވަގުތުން ދޫކޮށްލުމަށް އެދި ކްރިމިނަލް ކޯޓަށާއި ހައި ކޯޓަށް މިއަދު ލިޔެކިޔުންތައް ވަނީ ހުށަހަޅާފައި
ކުރީގެ ރައީސް މައުމޫން އަބްދުލް ޤައްޔޫމް: އެމަނިކުފާނު ހުންނެވީ އަދިވެސް ޖަލުގައި
ކުރީގެ ރައީސް މައުމޫން އަބްދުލްގައްޔޫމާއި އެމަނިކުފާނުގެ ދަރިކަލުން، ރައްޔިތުންގެ މަޖިލީހުގެ ދިއްގަރު ދާއިރާގެ މެންބަރު އަހުމަދު ފާރިސް އަދި ދަރިކަލުން ޔުމްނާ މައުމޫންގެ ފިރިކަލުން މުހައްމަދު ނަދީމް ދޫކޮށްލުމަށް އެދި ކޯޓަށް ލިޔެކިޔުންތައް ހުށަހަޅާފައިވާ ކަމަށް ވަކީލް މައުމޫން ހަމީދު ވިދާޅުވެއްޖެއެވެ.
މައުމޫން ހަމީދު ހޯމަ ދުވަހު ކުރެއްވި ޓުވީޓެއްގައި ވިދާޅުވީ އެ ތިން ބޭފުޅުން ވަގުތުން ދޫކޮށްލުމަށް އެދި ކްރިމިނަލް ކޯޓަށާއި ހައި ކޯޓަށް މިއަދު ލިޔެކިޔުންތައް ހުށަހަޅާފައިވާ ކަމަށެވެ. އަދި އެ ޓުވީޓްގައި މައުމޫން ހަމީދު ވަނީ ރައީސް މައުމޫން ވީއެންމެ އަވަހަށް ޑޮކްޓަރުންދީފައިވާ ލަފަޔާ އެއްގޮތަށް ގެއަށް ބަދަލުކޮށްދިނުމަށް މޯލްޑިވްސް ކަރެކްޝަނަލް ސަރވިސްގެ ފަރާތުން އެދިވަޑައިގެންފައެވެ.
ރައީސް މައުމޫން ހައްޔަރުކޮށްފައި ވަނީ ފެބުރުއަރީ މަހުގެ 6 ވަނަ ދުވަހު އެވެ. އޭގެ ފަހުން ރައީސް މައުމޫން އެކި ޖަލުތަކުގައި ގެންގުޅެފައިވާ އިރު އެމަނިކުފާނަށް ސިއްހީ ފަރުވާ ދިނުމަށް ސަރުކާރުން ވަނީ ހުރަސްތަކާއި ކުރިމަތި ކުރުވާފައެވެ. އަދި އެމަނިކުފާނުގެ ދަރިކަލުން ފާރިސްގެ މައްޗަށް ޓެރަރިޒަމާއި ޝަޚްސު އޮޅުވާލުމާއި އަދިވެސް ގިނަ މައްސަލަތަކެއްގައި ވަނީ ދައުވާކުރަމުންނެވެ. ޝަހްސް އޮޅުވާލި ކަމަށް ބުނެ އުފުލި ދައުވާ ސާބިތުވާ ކަމަށް ކަނޑައަޅައި ފާރިސްގެ މައްޗަށް ވަނީ 4 މަހާއި 24 ދުވަހުގެ ޖަލު ހުކުމެއް އިއްވާފައެވެ.
ރިޔާސީ އިންތިޚާބު ކާމިޔާބު ކުރެއްވި ގުޅިފައިވާ އިބްރާހިމް މުހައްމަދު ސޯލިހު (އިބޫ) ވަނީ ހުރިހާ ސިޔާސީ ހައްޔަރީން ވަގުތުން ދޫކޮށްލުމަށް ރައީސުލް ޖުމްހޫރިއްޔާ އަބްދުﷲ ޔާމީން އަބްދުލް ޤައްޔޫމަށް ގޮވާލައްވާފައެވެ.
