އިންތިޚާބީ ރައީސް އިބްރާހިމް މުހައްމަދު ސޯލިހަށް އިންޑިއާ އިން މަރުހަބާ ކިޔައިފި
ރައީސް ޔާމީންގެ ވެރިކަމުގައި އިންޑިއާ އާއި ރާއްޖޭގެ ގުޅުން ވަނީ ހީނަރުވެފައި
އިންތިޚާބުގެ ކާމިޔާބީ އިއުލާނު ކުރެއްވުމަށް ޝައިން ޓްރީ ބިލްޑިންގގައި ހުންނަ އޮފީހުގައި ހުންނަވައި އިބޫ ނޫސްވެރިންގެ ސުވާލުތަކަށް ޖަވާބުދެއްވަނީ
އާދީއްތަ ދުވަހު ބޭއްވި ރިޔާސީ އިންތިޚާބު ކާމިޔާބު ކުރެއްވި ގުޅިފައިވާ ސިޔާސީ ޕާޓީތަކުގެ ކެންޑިޑޭޓް އިބްރާހިމް މުހައްމަދު ސޯލިހަށް އިންޑިއާ ސަރުކާރުން މަރުހަބާ ކިޔައިފިއެވެ.
އިންޑިއާގެ އެކްސްޓަރނަލް އެފެއަރޒް މިނިސްޓްރީ އިން ހޯމަ ދުވަހު ނެރުނު ބަޔާނެއްގައި ވަނީ ރިޔާސީ އިންތިޚާބު ކާމިޔާބު ކަމާ އެކު ނިންމާލާފައި ވާތީ މަރުހަބާ ކިޔާ ކަމަށެވެ.
މީގެ އިތުރުން ރަސްމީ ނަތީޖާ ވީހާ ވެސް އަވަހަކަށް އިލެކްޝަންސް ކޮމިޝަނުން ކަށަވަރުކޮށްދޭނެ ކަމަށް އުއްމީދުކުރާ ކަމަށް ބުނެފައެވެ.
މި އިންތިޚާބަކީ ހަމައެކަނި ކާމިޔާބެއް ނޫން ކަމަށާއި ޑިމޮކްރަސީގެ އުސޫލުތަކާއި ގާނޫނުގެ ވެރިކަން ހިންގުމަށް ބޭނުންވާ މިންވަރު ހާމަކޮށްދީފައިވާ އިންތިޚާބެއް ކަމަށް އިންޑިއާ އިން ވަނީ ބުނެފައެވެ.
"ފުރަތަމަ އަވަށްޓެރިޔާ" ސިޔާސަތުގެ ދަށުން ދިވެހިރާއްޖެއާ ގާތުން މަސައްކަތްކޮށް އިތުރަށް ގުޅުން ބަދަހިކުރެވޭނެ ކަމަށް ދެކޭ ކަމަށް ވެސް އިންޑިއާ އިން ވަނީ ބުނެފައެވެ.
ރިޔާސީ އިންތިޚާބުގެ ވަގުތީ ނަތީޖާ އިލެކްޝަންސް ކޮމިޝަނުން އާއްމުކޮށްފައިވާއިރު އިބްރާހިމް މުހައްމަދު ޞޯލިހު ވަނީ 58.3 އިންސައްތަ ވޯޓު ހޯއްދަވާފައެވެ. ދެވަނަ ދައުރެއް ކަށަވަރުކުރެއްވުމަށް ނުކުންނެވި އަބްދުﷲ ޔާމީން އަބްދުލް ގައްޔޫމަށް ލިބިވަޑައިގެންފައި ވަނީ 41.7 އިންސައްތަ ވޯޓެވެ.
