ހަވާ އަރުވައި ބޮޑު ރަސްމިއްޔާތަކާއި އެކު ބްރިޖް ހުޅުވުމުން ވެސް ހުޅުމާލޭ ޔޫތު ސިޓީއިން ރައީސް ޔާމީނަށް ނޫނެކޭ ބުނެފިއެވެ. 

ރިޔާސީ އިންތިޚާބުގެ ކެންޕޭނުގައި ރައީސް ޔާމީން އެންމެ ފަޚުރުވެރިކާމާއި އެކު ނެންގެވީ 25 ބުރީގެ އިމާރާތާއި ބްރިޖެވެ. އެމަނިކުފާނުގެ ކެންޕެއިންގެ ގިނަ ޖަލްސާތަކުގައި ވެސް އެވާހަކަ ދައްކަވައެވެ. އެތަށްބަޔަކަށް "ނުކުރެވޭނޭ" ބުނި ބްރިޖްގެ މަޝްރޫއު އެމަނިކުފާނަށް ކާމިޔާބު ކުރެވުނު ވާހަކައެވެ.

ރާއްޖޭގެ ރައްޔިތުން އެމަނިކުފާނަށް ވޯޓު ދޭންވީ ތަރައްގީ މި ގައުމަށް ގެންނެވުމުންކަމަށް އަބަދު ވެސް ކެންޕޭނުގައި ދިޔައީ ވިދާޅުވަމުންނެވެ. ރައީސް ޔާމީން ބްރިޖް ހުޅުއްވައި ދެއްވީ މިދިޔަ އޮގަސްޓް މަހުގެ 30 ގައެވެ.

އާދީއްތަ ދުވަހު ބޭއްވި ރިޔާސީ އިންތިޚާބުގެ ވަގުތީ ނަތީޖާއަށް ބަލާއިރު މާލެ ސިޓީގެ އަވަށެއްކަމުގައިވާ ހުޅުމާލެއިން އެމަނިކުފާނު ވަނީ ދެރަވެ ވަޑައިގެންފައެވެ. ހުޅުމާލޭގެ ވަގުތީ ނަތީޖާއަށް ބަލާއިރު ކުރީގައި އުޅުއްވަނީ ގުޅިފައިވާ ސިޔާސީ ޕާޓީތަކުގެ ކެންޑިޑޭޓް އިބްރާހިމް މުހައްމަދު ސޯލިހު(އިބޫ)އެވެ. 

މާލޭގެ ވަގުތީ ނަތީޖާ ދައްކާ ގޮތުން ވެސް ކުރީގައި އުޅުއްވަނީ އިބޫއެވެ. 

ބްރިޖް އެޅުމަށް ގާތްގަނޑަކަށް ތިން އަހަރު ދުވަސް ހޭދަވިއިރު އެ މަޝްރޫޢަށް 200 މިލިއަން ޑޮލަރު ވަނީ ޚަރަދުކޮށްފައެވެ. އޭގެތެރެ އިން 116 މިލިއަން ޑޮލަރަކީ ޗައިނާގެ ލޯނުއެހީއެވެ. އަދި 72 މިލިއަން ޑޮލަރަކީ އެގައުމުގެ ހިލޭ އެހީއެވެ. އަދި މި މަޝްރޫއަށް ދައުލަތުގެ ބަޖެޓުން 12 މިލިއަން ޑޮލަރު ވަނީ ޚަރަދުކޮށްފައެވެ.