އެޗްއާރްސީއެމްގެ ކުރީގެ ނާއިބު ރައީސް އެ ކޮމިޝަނުގެ މެމްބަރުންނަށް ބަހުސްއަކަށް ވަޑައިގަތުމަށް ގޮވާލައްވައިފި
20 ސެޕްޓެމްބަރު 2018 | ބުރާސްފަތި 12:40ބަޔާނުގައި ހިމަނާފައިވަނީ ހަޤީޤަތާ ޚިލާފް ވާހަކަތަކެއް
ތޮލާލް ރާއްޖެޓީވީގެ ޕްރޮގްރާމެއްގައި
ރާއްޖޭގައި މިނިވަން އިންސާފުވެރި އިންތިޚާބެއް ބޭއްވުމަށް އެކަށީގެންވާ މާހައުލެއް އޮތް ކަމަށް ބުނެ ހިއުމަން ރައިޓްސް ކޮމިޝަން އޮފް މޯލްޑިވްސް (އެޗްއާރްސީއެމް) އިން ނެރެފައިވާ ބަޔާނުގައި ހާމަކޮށްފައިވާ ވާހަކަތަކަކީ ހަޤީޤަތާއި ޚިލާފް ވާހަކަތަކެއް ކަމަށާއި އެކަމާ ގުޅޭ ގޮތުން އެ ކޮމިޝަންގެ މެންބަރުންނަށް ބަހުސްއަކަށް ވަޑައިގަތުމަށް އެ ކޮމިޝަންގެ ކުރީގެ ނާއިބު ރައީސް އަހްމަދު ތޮލާލް ގޮންޖައްސަވައިފިއެވެ.
ރާއްޖެ ޓީވީން ގެނެސްދޭ "އިލެކްޝަން ރޫމް" ގައި ވާހަކަ ދައްކަވަމުން ތޮލާލް ވިދާޅުވީ އެޗްއާރްސީއެމްއިން އޮގަސްޓް 30 ވަނަ ދުވަހު ނެރެފައިވާ ބަޔާނުގައި ހުރި ހަޤީޤަތާއި ޚިލާފް ވާހަކަތަކާ ގުޅޭ ގޮތުން، ކޮމިޝަނުގެ މެމްބަރުންނާ އެކު ބަހުސަކަށް އަރާވަޑައިގަތުމަށް ތައްޔާރަށް ހުންނެވި ކަމަށާއި، ކޮމިޝަނުގެ މެމްބަރުންނަށް އެކަމަށް ދައުވަތު އަރުވާ ކަމަށެވެ.
ތޮލާލް ވިދާޅުވީ އާއްމު ގޮތެއްގައި އިންތިޚާބުގެ މާހައުލު ވަޒަންކުރުމަށްޓަކައި އެޗްއާރްސީއެމް އިން ދުރާލާ ބަލާ ކަންތައްތައް ރަނގަޅަށް އެގިވަޑައިގަންނަވާ ކަމަށެވެ. ނަމަވެސް މިހާރު ރާއްޖޭގައި މި އޮތް ހާލަތަށް ސަނާ ކިޔައި، އެޗްއާރްސީއެމްއިން ނެރެފައިވާ ބަޔާނަކީ، އެ މިންގަނޑުތަކަށް އެކަށީގެންވާ މިންވަރަށް ބެލުމަށް ފަހު ނެރެފައިވާ ބަޔާނެއް ކަމަށް ޤަބޫލުނުކުރައްވާ ކަމަށެވެ.
ޓްރާންޕޭރަންސީ މޯލްޑިވްސްގެ ސީނިއާ ޕްރޮޖެކްޓް ކޯޑިނޭޓަރުގެ މަގާމު ފުރުއްވާ ތޮލާލު ވިދާޅުވީ "ޓީއެމް" އިން ހެދި ދިރާސާއަށް ބަލާއިރު ރާއްޖޭގައި އިންތިޚާބު ބާއްވަން އެކަށޭނެ މާހައުލެއް ނެތް ކަމަށެވެ. އެހެންކަމުން ރާއްޖޭގެ ހާލަތު އޮތް ގޮތް ދެ ބަޔަކު ހާމަކުރާ ގޮތުގައި އެހާބޮޑު ތަފާތެއް އުޅެގެންވާނެ ކަމަކަށް ޤަބޫލެއް ނުކުރެވޭނެ ކަމަށް ތޮލާލް ވިދާޅުވިއެވެ
"މިހާރު މި އޮތް ހާލަތަށް ސަނާ ކިޔައި ދައުލަތުގެ ހުރި މައްސަލަތައް ފަހަރުގައި ޓްރާންސްޕޭރެންސީ މޯލްޑިވްސް އިން ބުނާ ގޮތަކަށް އެޗްއާރްސީއެމްއިން ބުނަން ބޭނުން ނުވެދާނެ. އެހެންނަމަވެސް އަޅުގަނޑުމެންނަށް އިނގޭ އެއްޗަކީ، ކަށަވަރުވާ އެއްޗަކީ ހަމަގައިމު ވެސް މިއޮތް މާހައުލަށް ސަނާ ކިޔާފައި މި އޮތް މާހައުލަކީ އިންތިޚާބު ބޭއްވުމަށް އެންމެ ރަގަޅު މާހަލުކަމުގައި ބުނަންޏާމު އެއީ ހަޤީޤަތާއި ހިލާފް ވާހަކައެއް. ހަމަގައިމު ވެސް މިހާރު ވެސް މި ތަނުގައި އަޅުގަނޑު މިހިރީ ހަމަ ކޮންމެ ގަޑިއެއްގައި ވެސް އެޗްއާރްސީއެމް އިން މި ބަޔާން ދިފާއުކުރައްވާ ކަމުގައި ވަންޏާމު އަޅުގަނޑު މިހިރީ މި ބަޔާނުގައި ހުރި އެއްޗަކަށް ގޮންޖަހާ އޭގައި ހުރި މައްސަލަތައް ފާހަގަކުރަން ތައްޔާރަށް" ތޮލާލް ވިދާޅުވިއެވެ.
އެޗްސީއާރއެމް. އިން މިއަހަރުގެ އޮގަސްޓްމަހުގެ 30 ވަނަ ދުވަހު ނެރުނު ބަޔާނެއްގައި ބުނެފައި ވަނީ މިހާތަނަށް އެ ކޮމިޝަންގެ ފަރާތުން ކުރެވުނު މަސައްކަތުގެ އަލީގައި މިނިވަން އިންސާފުވެރި އިންތިހާބެއް ބޭއްވޭނެ ކަމަށް ފެންނަ ކަމަށެވެ. އަދި ރާއްޖޭގެ އެކި ސަރަހައްދުތަކަށް ކޮމިޝަނުގެ ޓީމްތަކުން ޒިޔާރަތްކޮށް އެ ރަށްރަށުގައި އިންތިޚާބު ބޭއްވޭނެ މާހައުލެއް ޤާއިމުވެފައިވޭތޯ ދެނެގަނެވިފައިވާ ކަމަށެވެ.
ނަމަވެސް ޓްރާންސްޕޭރެންސީ މޯލްޑިވްސްއިން މިމަހުގެ 17 ވަނަ ދުވަހު ބޭއްވި ނޫސްވެރިންގެ ބައްދަލުވުމުގައި ބުނެފައި ވަނީ އިންތިޚާބާ ދިމާކޮށް ކަންކަން ހިނގަމުންދާ ގޮތުން އިންތިޚާބުގައި ވޯޓުލާ ފަރާތްތަކުގެ ހައްގުތަކަށް ވަރަށް ބޮޑަށް އުނިކަން އައިސްފައިވާ ކަމަށެވެ.
ގުޅިފައިވާ ސިޔާސީ ޕާޓީތަކުން ވެސް އިންތިޚާބުގެ ކަންތައްތަކާ ގުޅޭ ގޮތުން އެ ޕާޓީތަކުގެ ގިނަ ކަންބޮޑުވުންތައް ހުރިކަން ފާހަގަކޮށްލެވެއެވެ.
