އެމްއެމްޕީއާރްސީގެ ވައްކަމުގެ މައްސަލަ އަދީބާ ހިސާބުން ނިންމާލެވޭކަށް ނެތް!

ދިވެހިރާއްޖޭގެ ތާރީޚުގައި ހިނގާފައިވާ އެންމެ ބޮޑު އެއް ވައްކަމަކީ ސަރުކާރުގެ ކުންފުނި މޯލްޑިވްސް މާކެޓިންގ އެންޑް ޕަބްލިކް ރިލޭޝަންސް ކޯޕަރޭޝަން (އެމްއެމްޕީއާރްސީ)ގެ ޚިޔާނާތުގެ މައްސަލައެވެ. ސަރުކާރުން އާއްމުކޮށްފައިވާ ތަފާސް ހިސާބުތަކަށް ބަލާއިރު، އެޚިޔާނާތުގެ އަގު 1.2 ބިލިއަން ރުފިޔާއަށް އަރައެވެ. މަސްދަރުތަކުން ލިބޭ މައުލޫމާތަށް ބަލާއިރު، ސަރުކާރުން ސިއްރުކޮށްފައިވާ މުއާމަލާތްތަކާއި، ރަނގަޅަށް ތަހުޤީޤު ނުކުރެވުމުގެ ސަބަބުން ހޯދިފައިނުވާ ފައިސާ އެއްކޮށްލުމުން، މި ޚިޔާނާތުގެ އަގު މި އަށް ވުރެ ދެގުނަ ބޮޑު ވާނެއެވެ.

އެމްއެމްޕީއާރްސީގެ އެ ބޮޑު ޚިޔާނާތް އަޅުގަނޑުމެންނަށް ފެނުނީ އެންމެ ދެތިން މީހަކާ ހަމައިން ނިންމާލިތަނެވެ. ކުރީގެ ނާއިބު ރައީސް އަހުމަދު އަދީބާއި، އެމްއެމްޕީއާރްސީގެ އޭރުގެ މެނޭޖިންގ ޑިރެކްޓަރ ޒިޔަތުގެ ބޮލުގައި ހުރިހާ ކަމެއް އަޅުވައި، އެކަން ހިންދާލިއެވެ. އެހެންނަމަވެސް، އެމްއެމްޕީއާރްސީގެ މައްސަލަ މިހާ ހިސާބުން އަދި ނިންމާލެވޭކަށް ނެތެވެ. އެކުންފުނީގައި އޭރު މަސައްކަތް ކުރި އެހެން ވެރިން ކޮބައިތޯއެވެ؟ ގައިމު ބިލިއަނަކަށް ވުރެ ބޮޑު އަދަދެއް ބަޔަކު ވަގަށް ނެގިއިރު، އެކަން ހިނގި ގޮތް ރޭކާލާނެ ބަޔަކު އެތާ ތިބެންވާނެއެވެ.

އެމްއެމްޕީއާރްސީގެ ޗެއަރމަންގެ ގޮތުގައި މިހާރު ވެސް ހުންނެވި މުހައްމަދު ޚަލީލަކީ އޭރު ވެސް އެކުންފުނީގެ ޗެއަރމަނެވެ. ދުވަހުން ދުވަހަށް ހިނގާ ކުންފުނީގެ ކަންކަން އެނގިނުލެއްވިޔަސް، ގައިމު ކުންފުންޏެއްގެ ޗެއަރމަނަކަށް އެވަރުވާއިރު އެނގިލައްވަން ޖެހޭނެ ނޫންތޯއެވެ؟ ނޫން ނަމަ އެމަޤާމަށް ކުފޫ ހަމަނުވަނީ ކަމަށް ބެލުމުގެ ފުރުސަތު އެބަ އޮތެވެ. އެހެންނަމަވެސް ޚަލީލަކީ އެހާ 'ގަމާރު' ބޭފުޅެއް ނޫނެވެ. އެހާ ތަންދޮރު ނުދަންނަ ނަމަ، ބޮޑު އެއަރލައިނެއް ފެއްޓެވުމުގެ މަސައްކަތުގައި ނޫޅުއްވާނެއެވެ. އެހެން ނަމަ ދ. އެއަރޕޯޓާއި އެ ނޫން ވެސް މަސައްކަތްތައް ނުކުރެއްވޭނެއެވެ. ރައްޔިތުންގެ ހައްޤުގައި، އެމްއެމްޕީއާރްސީގެ ޚިޔާނާތުގެ މައްސަލައިގައި އެނގިވަޑައިގެން ހުންނެވި މައުލޫމާތެއް ރައްޔިތުންނަށް ސާފުކޮށްދެއްވަން ވާނެއެވެ. ރައްޔިތުން ސުވާލުކުރާނެއެވެ. އެއީ ދ. އަތޮޅުގެ އެއް ފަޅުތެރޭގައި އޮތް އެތައް ރަށެއް ޚަލީލުގެ މަސްލަހަތު އޮންނަ ކުންފުންޏަކަށް ލިބުނީ ކިހިނެއްކަމާ މެދު ރައްޔިތުން ސުވާލު އުފައްދާ ފަދައިންނެވެ. އަދި މާލެ އަތޮޅުން ލިބުނު ކަމަށް ބުނާ ފަޅުގެ ވާހަކަ ވެސް އަހާ ފަދައިންނެވެ. އަނެއްކޮޅުން އެމްއެމްޕީއާރްސީގެ ޚިޔާނާތް ހިނގިއިރު އެތަނުގެ ޗެއަރމަނަކަށް ހުންނެވި ބޭފުޅާ މިއަދު ވެސް އެތަނުގެ ޗެއަރމަނަކަށް ހުންނެވުމުން، ރައީސް ޔާމީން އެބޭފުޅާ އަށް ކުރައްވާ އިތުބާރު އެ ފެންނަނީއެވެ. ރައީސް ޔާމީން އިތުބާރު ކުރައްވާ ބޭފުޅުންނާ މެދު ރައްޔިތުން ދެކޭ ގޮތް އެންމެން ދަނެއެވެ.

އެމްއެމްޕީއާރްސީގެ ޗެއަރމަންގެ މަސްލަހަތު އޮންނަ ކުންފުންޏަކަށް ރަށްތައް ދިން ދ. އަތޮޅު ފަޅު

އެވަރުގެ ބޮޑު ކަމެއް ހިނގުމުން ދުނިޔޭގެ ތަރައްޤީވެފައިވާ ޤައުމުތަކުގައި ކަންކުރާ ގޮތަކީ އެކަމުގައި ޒިންމާވާ އެންމެންނާއިއެކު ޒިންމާ އުފުލަން ފެއިލްވި ފަރާތްތަކުން ވެސް މަޤާމުން އިސްތިއުފާ ދެއްވުމެވެ.

ރާއްޖެއެމްވީ އިން ކުރި ސުވާލުތަކަކަށް ޖަވާބު ދެއްވަމުން ޚަލީލު ވިދާޅުވީ ދ. އަތޮޅު ޕްރޮޖެކްޓްތަކަކީ ޤަވާޢިދާ އެއްގޮތަށް ހިންގާ ޕްރޮޖެކްޓްތަކެއް ކަމަށާއި، އެ މަސައްކަތްތައް ލިބިވަޑައިގަތީ އޭނާ އެމްއެމްޕީއާރްސީގެ ޗެއަރމަންކަމާއި ހަވާލުވުމުގެ ކުރިން ކަމަށެވެ. އެހެން ނަމަވެސް އެމްއެމްޕީއާރްސީގެ ކޮރަޕްޝަނުގެ މައްސަލަތަކާ ގުޅޭ ގޮތުން ދެންނެވި ސުވާލުތަކަށް ޚަލީލު ޖަވާބު ދެއްވާފައެއް ނުވެއެވެ.

އެމްއެމްޕީއާރުސީގެ ޗެއަރމަން ހަލީލް

ޚިޔާނާތުގެ ބޮޑު ކަންތައްގަނޑަކަށް ފަހު، ކުންފުނި ރީސްޓްރަކްޗަރކޮށް، ކަންކަން އިސްލާހުކުރަން ވުމުން، ރައީސް ޔާމީން އެތަނަށް ފޮނުއްވީ ހާރިސް މުހައްމަދާއި އިލެކްޝަންސް ކޮމިޝަންގެ މިހާރުގެ ރައީސް އަހުމަދު ޝަރީފްމެން ފަދަ ބޭބޭފުޅުންނެވެ. އެވަރުގެ ބޮޑު ކަމެއް ހިނގުމުން، ރައީސް ޔާމީން އެންމެ އިތުބާރު ކުރައްވާ ބޭފުޅެއްގެ ގޮތުގައި ޝަރީފް އެތަނުގެ ބޯޑަށް އައްޔަން ކުރެއްވުމުން، އަނެއްކާ ވެސް ރައްޔިތުން އެކަމުގައި ކުރަން ޖެހޭ ސުވާލުތަކާއި، އިންތިޚާބު ބޯމަތިވުމުން ޝަރީފް އިލެކްޝަންސް ކޮމިޝަންގެ ރައީސްކަމަށް ފޮނުއްވުމުން ރައްޔިތުން ކުރަން ޖެހޭ ސުވާލުތަކުގައި މާބޮޑު ތަފާތެއް ނެތެވެ.

ދެން ހުންނެވީ ހާރިސްއެވެ. ރާއްޖޭގެ މަލްޓިބިލިއަން ޑޮލަރުގެ ފަތުރުވެރިކަމުގެ ސިނާޢަތު ޕްރޮމޯޓްކުރަން ހަވާލުކުރަން ވާނީ އެކަމަށް ޤާބިލް ބޭފުޅަކާއެވެ. ޚާއްސަކޮށް އެފަދަ ބޮޑު ޚިޔާނާތެއް ހިންގުމުން ދެން އެކުންފުންޏާއި ހަވާލުވާން ޖެހޭނީ ކަމަށް ޤާބިލް ބޭފުޅެކެވެ. އެހެންނަމަވެސް ފަތުރުވެރިކަން ޕްރޮމޯޓްކުރުމުގެ މާބޮޑު ތަޖުރިބާއެއް ނެތް ހާރިސް އެތަނަށް ލެއްވިއިރު، އޭނާ ހުންނެވީ އެއަރޕޯޓުގެ ސެކިއުރިޓީއިން މެނޭޖްކުރައްވާ ބޭފުޅެއްގެ ގޮތުގައި ކަމަށް ވެއެވެ.

އެމްއެމްޕީއާރްސީގެ ބޯޑުގައި މިހާރު ތިއްބެވި ބޭފުޅުން

ހާރިސްގެ އިތުރަށް މިހާރު ބޯޑުގައި ތިއްބެވީ އައިޝަތު ދީނާ މުހައްމަދާއި ޝިޒްލީން މުހައްމަދެވެ.

ޚަލީލާއި، ޝަރީފާއި، ޙާރިސްއާ މި ބޭބޭފުޅުންނާ ސުވާލުކުރަން ޖެހެއެވެ. އެބޭފުޅުންނަކީ ޚިޔާނާތުގައި ބައިވެރިވި ބޭފުޅުންނަށް ނުވެދާނެއެވެ. އެހެން ނަމަވެސް، ބޯޑުގައި ތިއްބަވައިގެން އެނގިވަޑައިގެންނެވި އެކައްޗެއް ވެސް ނެތިއްޔާ ދެން އެތަނުގެ ބޯޑަށް ގްރޭޑް 7 ގައި ކިޔަވާ ދެތިން ކުދިން ލާފައި ބޭތިއްބިޔަސް މާ ރަނގަޅުވާނެ ނޫންތޯއެވެ. ސުވާލު ކުރެވޭނެ ދުވަހެއް އަންނާނެއެވެ. ކަންކަން ބެލޭނެ ދުވަހެއް އަންނާނެއެވެ. އަދީބާ ހަމައިންނެއް އެމްއެމްޕީއާރްސީގެ މައްސަލަ އަދިއެއް ނުނިމެއެވެ. ނެރެމުންދާ ރިޕޯޓުތަކުން ދައްކަނީ އެފަދަ މަންޒަރެކެވެ.