ރިޔާސީ އިންތިޚާބުގައި ރައީސް ޔާމީން ވެސް ސާފު ކެންޑިޑޭޓް އިބޫއަށް ވޯޓު ދޭން ޖެހޭ: އާޒިމް
18 ސެޕްޓެމްބަރު 2018 | އަންގާރަ 07:56ފ. އަތޮޅު ވިއްކާލުމަށް މި ސަރުކާރުން ކުރި މަސައްކަތް ނާކިޔާބުކޮށްލީ އިބޫ އިސްވެ ހުންނަވާ ކުރެއްވި މަސައްކަތްފުޅުން
ޖުމްހޫރީ ޕާޓީގެ އެޑްވައިޒަރ އާދަމް އާޒިމް ވާހަކަދައްކަވަނީ
މިއަހަރުގެ ރިޔާސީ އިންތިޚާބުގައި ރައީސުލްޖުމްހޫރިއްޔާ އަބްދުﷲ ޔާމީން އަބްދުލްގައްޔޫމް ވެސް ސާފު ކެންޑިޑޭޓް އިބްރާހިމް މުހައްމަދު ސޯލިހު (އިބޫ) އަށް ވޯޓު ދެއްވުމަށް ޖުމްހޫރީ ޕާޓީގެ އެޑްވައިޒަރ އާދަމް އާޒިމް ގޮވާލައިފިއެވެ.
ކޯލިޝަނުން ފ. ބިލެއްދޫގައި ބޭއްވި ޖަލްސާގައި އާޒިމް ވިދާޅުވީ ރައީސް ޔާމިން ވިދާޅުވާ ސާފު ކެންޑިޑޭޓަކީ އިބޫ ކަމަށާއި، އެމަނިކުފާނަކީ ރައްޔިތުންގެ ލޯބި ލިބިފައިވާ އިހުލާސްތެރި ލީޑަރެއް ކަމަށެވެ.
އާޒިމް ވިދާޅުވީ ދިވެހިންނަށް އެންމެ ބޮޑު މާޔޫސް ކަމެއް ލިބިގެން ދިޔައީ ނުހައްގުން މީހުންނަށް އަނިޔާދިނުމަށް ފަހު ހައްޔަރު ކުރުމުގެ އިތުރުން ރާއްޖޭގެ ތަންތަން ވިއްކާލުމަށް މި ސަރުކާރުން މަސައްކަތްކުރަން ފެށި ހިސާބުން ކަމަށެވެ. ފ. އަތޮޅު ވިއްކާލުމަށް ގިނަ މަސައްކަތްތަކެއް މިސަރުކާރުން ކުރި ކަމަށާއި، ނަމަވެސް އެކަން ނާކިޔާބު ކޮށްލީ މިއަދުގެ ކޯލިޝަން ކެންޑިޑޭޓް އިބޫ އިސްވެ ހުންނަވާ ކުރެއްވި މަސައްކަތްފުޅުން ކަމަށް އާޒިމް ވިދާޅުވިއެވެ. މިއީ ރައްޔިތުންގެ ހައްގުގައި އިބޫ ކުރެއްވި މަސައްކަތެއް ކަމަށާއި، އެހެންވީ އިރު މި ގައުމުގެ ސާފު ކެންޑިޑޭޓަކީ އިބޫ ކަމަށް އޭނާ ވިދާޅުވިއެވެ.
އާޒިމް ވިދާޅުވީ އިބޫއަށް އިންތިޚާބު ކާމިޔާބު ކުރެވިއްޖެ ނަމަ ރާއްޖޭގެ ސަރަހައްދުތައް ވިއްކާލުމަށް ގާނޫނު އަސާސީއަށް ގެނައި ބަދަލުތައް އިސްލާހުކޮށް ރައްޔިތުންނަށް އޯގާތެރި ވެރިކަމަށް ކޮށްދެއްވާނެ ކަމަށެވެ.
ކޯލިޝަންގެ އޮޑި ދުވަހަކުން ދުވަހެއް ބޮޑު ވަމުން އަންނަކަން ފާހަގަކުރައްވައި އާޒިމް ވިދާޅުވީ ރައީސް ޔާމިންގެ އަރިހުގައި އެއްވެސް ބޭފުޅަކު ނެތް ކަމަށެވެ. އަދި ތަރައްގީގެ ނަމުގައި ރައްޔިތުންގެ ލޮލުގައި އަދުން އަޅުވަން މިސަރުކާރުން މަސައްކަތް ކުރި ނަމަވެސް އެކަން ކާމިޔާބު ނުވާނެ ކަމަށް އާޒިމް ވިދާޅުވިއެވެ.
"މީގެން ޕްރޮޖެކްޓަކުން ތިބޭފުޅުންގެ ޖީބަށް ބޮޑުވިތޯ. އެންމެ ބޮޑު ލާރިއެއް ވެސް ބައްލަވާ ދައްކަވާ. އެބްރިޖްމަތިން ދާ ބޭފުޅަކު ވެސް ބައްލަވާ ލައްވާ. ތިބޭފުޅުން ހިތަށް ގެންނަވާ އެންމެ ލާރިއެއް އެންމެ ފައިދާއެއް ކުރިތޯ ތިޔަ ބްރިޖެއް އަޅައިގެން. އެއެޅި 25 ބުރީގެ އިމާރާތެއް އަޅައިގެން ދިވެހިރައްޔިތަކަށް ވީފައިދާ ކޮބައިތޯ. އެންމެ ފައިދާއެއް. އެންމެ ލޯލާރިއެއް ވެސް ތިބޭފުޅުންގެ ވޮލެޓަށް އިތުރުވިތޯ. ރައްޔިތުންނަށް އުފާވެރިކަމާއި ފާގަތިކަމާއި އެއިހުސާސްތައް އަންނަ ކަންތައްތަކަކީ ތަރައްގީ. މީގެން އެއިން އެއްވެސް ކަމަކީ ތަރައްގީއެއް ނޫން،" އާޒިމް ވިދާޅުވިއެވެ.
އާޒިމް ވިދާޅުވީ ރައީސް ޔާމީންގެ ފަސް ދައުރުގައި ތަރައްގީ ނުގެނެސްދެވުނު ކަމަށާއި، ގައުމު ދަރުވައި ރައްޔިތުންނަށް ގެއްލުން ލިބޭ ގޮތަށް ގެންނަ ޕްރޮޖެކްޓްތަކަކީ ތަރައްގީ ނޫން ކަމަށެވެ.
އާޒިމް ވިދާޅުވީ ރައްޔިތުންނަށް ފައިދާ ލިބޭ ތަރައްގީ ބޭނުންވާ ނަމަ މި މަހުގެ 23 ވަނަ ދުވަހު ނުކުމެ އިބޫއަށް ވޯޓު ދޭން ޖެހޭ ކަމަށާއި، ދެން އަންނަ ފަސް ދައުރަށް އެމަނުކުފާނު ރައީސް ކަމަށް ހޮވަންޖެހޭ ކަމަށެވެ.
