ރައީސް ޔާމީންގެ އެކައުންޓަށް ވަދެވަފައިވާ 1 މިލިއަން ޑޮލަރު ވަނީ ބޭނުންކޮށްފަ: އަދީބު
ރައީސް ޔާމީން ވިދާޅުވެފައި ވަނީ އަދީބު ޖަމާކުރި ފައިސާ ކަމަށް، ނަމަވެސް އަދީބު ވިދާޅުވަނީ ޖަމާ ނުކުރައްވާ ކަމަށް
ރައީސް އަބްދުﷲ ޔާމީން: ކޮރަޕްޝަނުގެ ބޮޑެތި ތުހުމަތުތަކެއް މިސަރުކާރަށް ކުރެވޭ
މޯލްޑިވްސް އިސްލާމިކް ބޭންކުގައިވާ ރައީސް އަބްދުﷲ ޔާމީން އަބްދުލްގައްޔޫމްގެ އެކައުންޓަށް ޖަމާކޮށްފައިވާ 1 މިލިއަން ޑޮލަރު ވަނީ އެމަނިކުފާނު ބޭނުން ކުރައްވާފަ ކަމަށް ކުރީގެ ނައިބު ރައީސް އަހުމަދު އަދީބު ވިދާޅުވެއްޖެ އެވެ.
ހޯމަ ދުވަހު އަދީބު ނެރުއްވާފައިވާ ބަޔާނެއްގައި ވިދާޅުވެފައި ވަނީ އެންޓި ކޮރަޕްޝަން ކޮމިޝަން (އޭސީސީ)އިން ރައީސް ޔާމީންގެ އިސްލާމިކް ބޭންކުގެ އެކައުންޓަށް 1 މިލިއަން ޑޮލަރު ވަދެފައިވާ މައްސަލައިގައި އަދީބުއާ ސުވާލުކުރިއިރު ރައީސް ޔާމީން އޭސީސީއަށް ދެއްވާފައިވާ ބަޔާން އަދީބަށް ދެއްކެވި ކަމަށެވެ. އަދި އެ ބަޔާނުގައި ރައީސް ޔާމީން ވިދާލުވެފައި ވަނީ އިސްލާމިކް ބޭންކުގައި ހުޅުވާފައިވާ އެ އެކައުންޓަކީ އެމަނިކުފާނުގެ އެކައުންޓެއް ކަމަށާއި 1 މިލިއަން ޑޮލަރު ވަދެފައިވާ ކަމަށާއި އަދި އެފައިސާ އެމަނިކުފާނު ބޭނުން ކުރައްވާފައިވާ ކަމަށް އިއުތިރާފު ވެވަޑައިގަންނަވާފައިވާ ކަމަށް އަދީބުގެ ބަޔާނުގައި ވެއެވެ.
ނަމަވެސް އެއީ ރައީސް ޔާމީންގެ ކެމްޕެއިން ފައިސާކަމަށް ވިދާޅުވެފައިވާއިރު، އެފައިސާ ދެއްވާފައި ވަނީ އަދީބު ކަމަށް ރައީސް ޔާމީން އޭސީސީއަށް ދެއްވާފައިވާ ބަޔާނުގައި ވިދާޅުވެފައިވާ ކަމަށް އަދީބުގެ ބަޔާނުގައި ވެއެވެ.
އެކަމާ އޭސީސީން ސުވާލު ކުރުމުން އެ 1 މިލިއަން ޑޮލަރު ޖަމާކޮށްފައި ވަނީ އަދީބު ނޫން ކަަމަށާއި އަދި ކެމްޕެއިނަށް ހެޔޮއެދޭ ފަރާތްތަކުން ދެނީ މަހަކު ގިނަ ވެގެން ލައްކައެއް ނުވަތަ ދެ ލައްކައެއްހާ ރުފިޔާ ކަމަށާއި ދުވަހަކު ވެސް ކެމްޕެއިނަށް 1 މިލިއަން ޑޮލަރު ލިބިފައި ނުވާނެ ކަމަށާއި ރައީސް ޔާމީން އެ ހައްދަވަނީ ކަނޑައެޅިގެން އިތުރުފުޅެއް ކަމަށް އޭސީސީއަށް އަދީބު ދެއްވާފައިވާ ބަޔާނުގައި ވިދާޅުވެފައި ވާނެ ކަމަށް އަދީބު ހޯމަ ދުވަހު ނެރުއްވާފައިވާ ބަޔާނުގައި ވިދާޅުވެފައި ވެއެވެ.
އަދީބުގެ ބަޔާނުގައި ވިދާޅުވެފައި ވަނީ ރައީސް ޔާމީންގެ އެކައުންޓަށް ޖަމާކޮށްފައިވާ 1 މިލިއަން ޑޮލަރަކީ ދައުލަތުގެ ފައިސާ ކަމަށް އެމަނިކުފާނު ގަބޫލުފުޅު ނުކުރައްވާ ކަމަށާއި އެއީ އެމަނިކުފާނުގެ އަމިއްލަ ފައިސާ ކަމަށާއި އެ ފައިސާ އަނބުރާ ދައުލަތަށް ދައްކަން ނުޖެހޭނެ ކަމަށް ރައީސް ޔާމީން ގަބޫލުފުޅު ކުރައްވާ ކަމަށްވެސް އަދީބުގެ ބަޔާނުގައި ވެއެވެ.
"މީގެން ދޭހަވަނީ ރައީސް ޔާމީންގެ ވެރިކަމުގައި ގެއްލިފައިވާ ބައި ރުފިޔާއެއް ވެސް ރައީސް ޔާމީންގެ ވެރިކަން އޮތްހާ ހިނދަކު ދައުލަތަކަށް އަނބުރާ ނުހޯދޭނެ ކަމަށެވެ." އަދީބުގެ ބަޔާނުގައި ވިދާޅުވެފައި ވެއެވެ.
ރައީސް ޔާމީންގެ އެކައުންޓަށް ޖަމާކޮށްފައިވާ 1 މިލިއަން ޑޮލަރު ބޭނުން ކުރައްވާފައިވާ ކަމަށް އަދީބު ވިދާޅުވެފައިވާއިރު، "ރާއްޖެއެމްވީ"އަށް ވެސް އިތުބާރުކުރެވޭ ފަރާތަކުން ވަނީ ރައީސް ޔާމީން އެފައިސާ ބޭނުން ކުރައްވާފައިވާ ކަމުގެ މައުލޫމާތު ލިބިފަ އެވެ.
ނަމަވެސް ސަރުކާރު ހިންގާ ޕީޕީއެމްގެ ޕާލަމެންޓްރީ ގްރޫޕްގެ ލީޑަރު އަހުމަދު ނިހާނު ހުސައިންމަނިކު ވިދާޅުވެފައި ވަނީ ރައީސް ޔާމީންގެ އެކައުންޓަށް ޖަމާކޮށްފައިވާ 1 މިލިއަން ޑޮލަރު، އެ ހުރިގޮތަށް ބޭނުން ނުކޮށް އެބަހުރި ކަމަށެވެ.
އަދީބު ނެރުއްވާ ބަޔާންތަކާއި ގުޅިގެން ރައީސް އޮފީހުގެ ތަރުޖަމާނު އިބްރާހީމް މުއާޒު އަލީ ވިދާޅުވެފައި ވަނީ އަދީބުގެ ބަޔާންތަކަށް ކޮމެންޓެއް ކުރައްވަން ބޭނުންފުޅު ނުވާކަމަށެވެ.
