ކެމްޕެއިންގައި އިބޫ އާއި ފައިސަލް ހުރިހާ ރަށަކަށް ވަޑައިގެންފި
17 ސެޕްޓެމްބަރު 2018 | ހޯމަ 05:20ހުރިހާ ރަށެއް ހަމަވީ މާއެނބޫދޫއަށް ވަޑައިގަތުމާއެކު
އިބޫ ކެމްޕެއިންގައި ރަށަކަށް ވަޑައިގެން ސަޕޯޓަރަކާ ސަލާންކުރައްވަނީ
ރިޔާސީ އިންތިޚާބުގެ ކެމްޕެއިންގައި ގުޅިފައިވާ ސިޔާސީ ޕާޓީތަކުގެ ރިޔާސީ ކެންޑިޑޭޓް އިބްރާހިމް މުހައްމަދު ސޯލިހާއި އެ މަނިކުފާނުގެ ރަނިން މޭޓް ފައިސަލް ރާއްޖޭގައި މީހުން ދިރިއުޅޭ ހުރިހާ ރަށަކަށް ވަޑައިގެންފި އެވެ.
ރިޔާސީ އިންތިހާބުގެ ކެމްޕެއިން އިބޫ ފެއްޓެވީ ޖުލައި 13 ވަނަ ދުވަހު އައްޑޫ ސިޓީންނެވެ. ދެ މަހަށް ވުރެ ގިނަ ދުވަސް ކެމްޕެއިންގައި ހޭދަވެފައިވާއިރު، ގުޅިފައިވާ ޕާޓީތަކުން ކެމްޕެއިންގައި ކެންޑިޑޭޓާއި ރަނިން މޭޓް ވެވަޑައިގެންފައިވާ ވައުދާ އެއްގޮތަށް ހުރިހާ ރަށެއް ހަމަވެގެން ދިޔައީ ހޯމަ ދުވަހު ހެނދުނު ދ. މާއެނބޫދޫއަށް އިބޫ ވަޑައިގަތުމާއެކު އެވެ.
އިބޫ ނުވަތަ ފައިސަލް ރާއްޖޭގެ ހުރިހާ ރަށަކަށް ވަޑައިގަންނަވާނެ ކަމަށް ވައުދުވެވަޑައިގެންފައިވާއިރު، ކެމްޕެއިން މައިގަނޑު ގޮތެއްގައި ރަށްތަކަށް އިބޫ އާއި ފައިސަލް ވަޑައިގަންނަވަނީ ދެ ބޭފުޅުން ވަކިންނެވެ. މިހާތަނަށް އެ ދެބޭފުޅުން އެކުގައި ވަޑައިގެންފައިވަނީ އައްޑޫ އާއި ފުވައްމުލަކު ސިޓީ އަދި ކާށިދޫ އަށެވެ.
އިބޫ އެކަނި 145 އަށް ވަޑައިގެންނެވި އެވެ.
އިބޫގެ ކެމްޕެއިންގައި ރާއްޖޭގެ ހުރިހާ ރަށަކަށް ވަޑައިގެންއިރު އެއިން ކޮންމެ ރަށެއްގައި ވެސް ސަޕޯޓަރުންނާ ބައްދަލު ކުރައްވައި ވާހަކަފުޅު ދައްކަވާފައި އެވެ. ބައެއް ރަށްރަށުގައި ގެތަކަށް ހިންގަވައި މީހުންނާ ބައްދަލު ކުރައްވާފައިވާއިރު ބައެއް ރަށްތަކުގެ ކައުންސިލްތަކާ އިބޫ ބައްދަލު ކުރައްވާފައިވެ އެވެ. ބައެއް ރަށްރަށުގައި ބޮޑެތި ޖަލްސާތައް ވެސް ބާއްވަފައިވެ އެވެ.
ފައިސަލް ރަށަކަށް ވަޑައިގެން އާންމު މީހަކާ ބައްދަލު ކުރައްވަނީ
އަންނަ އާދިއްތަ ދުވަހު އޮންނަ ރިޔާސީ އިންތިހާބަށް ކެމްޕެއިން ކުރެއްވުމަށް އެމަނިކުފާނު 100 ވަނަ ރަށަކަށް ވަޑައިގެންނެވީ ހއ. ބާރަށެވެ.
އިބޫ ރަށަކަށް ވަޑައިގެން އެރަށުގައި ހުރި ސަޕޯޓަރަކާ ސަލާމް ކުރައްވަނީ:-
ރިޔާސީ އިންތިހާބުގައި ދެން ވާދަ ކުރައްވައި ރައީސް އަބްދުﷲ ޔާމިން ރާއްޖޭގައި މީހުން ދިރިއުޅޭ ރަށްތަކުގެ ތެރެއިން ދެބައި ކުޅައި އެއްބައި ރަށަށް ވެސް ވަޑައިގެންފައިނުވާއިރު އެމަނިކުފާނުގެ ރަނިންމޭޓް ޑރ.މުހައްމަދު ޝަހީމް އަލީ ސައިދާ ދެ ބޭފުޅުންނަށްވެސް ވަޑައިގެންނެވުނީ މަދު ރަށަކަށެވެ.
