ކޮލަމާފުށިން ހައްޔަރުކުރި މީހުންނަށް ވޯޓުލުމުގެ ފުރުސަތުދޭންޖެހޭނެ، ނުދޭނަމަ ކޯޓަށް ދާނަން: ވަކީލުން
17 ސެޕްޓެމްބަރު 2018 | ހޯމަ 14:41ހަމަނުޖެހުމުގެ ތެރެއިން ވަކި ސިޔާސީ ފިކުރަކަށް ނިސްބަތްވާ ބަޔަކު ހައްޔަރުކުރުމުން އެއީ ސިޔާސީ މަޤްސަދެއްގައި ކުރިކަމެއްކަމަށް ބެލެވޭ
ޤާނޫނީ ވަކީލްް ހުސްނުއް ސުއޫދު ނޫސްވެރިންނަށް މަުއލޫމާތުދެއްވަނީ
ޖަގަހައަކަށް ގެއްލުން ދިން މައްސަލައެއްގައި ޓެރަރިޒަމްގެ ތުހުމަތުކޮށް، ގއ. ކޮލަމާފުށިން ހައްޔަރުކުރި 18 މީހުންނަށް ވޯޓުލުމުގެ ހައްގުދޭންޖެހޭނެކަމަށާއި، ވޯޓުލުމުގެ ހައްޤުނުދޭނަމަ ހައިކޯޓަށް މައްސަލަ ހުށައަޅާނެކަމަށް ވަކީލުންގެ ޓީމުން ބުނެފި އެވެ.
ހައްޔަރުކޮށްފައިވާ 18 މީހުންގެ ވަކީލުންގެ ޓީމުން އާދިއްތަ ދުވަހު ބޭއްވި ނުސްވެރިންގެ ބައްދަލުވުމުގައި ވާހަކަދައްކަވަމުން ކުރީގެ ބަންޑާރަ ނައިބް ހުސްނުއް ސުއޫދު ވިދާޅުވީ ހައްޔަރުކުރި މިހުންގެ ބަންދުގެ މުއްދަތު ޖަހާފައިވާއިރު، އެ މީހުންނަށް ވޯޓުލުމުގެ ހައްޤު ނުދިނުމަށް މަސައްކަތްކުރައްވާކަމަށެވެ. ވޯޓުލުމުގެ ހައްޤަކީ ކޮންމެ ރައްޔިތަކަށްވެސް ޤާނޫނު އަސާސީން ކަށަވަރުކޮށްދީފައިވާ ހައްޤެއްކަން ފާހަގަކޮށް ސުއޫދު ވިދާޅުވީ އެ މީހުންނަށް ވޯޓުލުގެ ހައްޤު ފުލުހުން ދޭންޖެހޭނެ ކަމަށެވެ. އަދި ވޯޓުލުމުގެ ފުރުސަތު ދިނުމަށް ފުލުހުންގެ ކިބައިން އެދިފައިވާނެކަން ފާހަގަކޮށް ސުއޫދު ވިދާޅުވީ ވަކި މުއްދަތަކަށް ބެލުމަށްފަހުގައި ވޯޓުލުމުގެ ފުރުސަތު ނުދިނުމަށް މަސައްކަތްކުރާކަމުގައިވާނަމަ މައްސަލަ ހައިކޯޓަށް ހުށައަޅުއްވާނެ ކަމަށެވެ.
އިތުރަށް ވާހަކަދައްކަވަމުން ސުއޫދު ވިދާޅުވީ ހައްޔަރުކުރި މީހުންގެ ތެރޭގައި އިދިކޮޅު އިއްތިހާދުގެ ފަރާތުން އޮބަޒާވަރުންނަށް ކަނޑައަޅާފައިވާ ބައެއް މީހުން ހިމެނޭ ކަމަށެވެ. އަދި އެ މީހުން ހައްޔަރުކުރުމުން ވޯޓަށް އެކަމުގެ އަސަރުކުރާނެކަން ފާހަގަކޮށް ސުއޫދު ވިދާޅުވީ ހައްޔަރުކުރި މީހުންގެ ބަދަލުގައި އިތުރު އޮބްޒާވަރުން އައްޔަނުކުރުމަށް އިދިކޮޅު އިއްތިހާދަށް ފުރުސަތު ދޭންޖެހޭނެ ކަމަށެވެ. އޭނާ ވިދާޅުވީ ހަމަނުޖެހުމުގެ ތެރެއިން ވަކި ސިޔާސީ ފިކުރަކަށް ނިސްބަތްވާ ބަޔަކު ހައްޔަރުކުރުމުން އެއީ ސިޔާސީ މަޤްސަދެއްގައި ވޯޓަށް ނުފޫޒު ފޯރުވުމުގެ ގޮތުން ކުރިކަމެއްކަމަށް ބެލުމުގެ ފުރުސަަތު އެބަ އޮތް ކަމަށެވެ.
"އެކަމުގެ ސަބަބުން ހަޤީޤަތުގައި ވޯޓަށް އަސަރުކުރާނެ، ވޯޓަށް އަސަރުކުރާނެގޮތަކީ 118 މީހުނަނަށް ވޯޓުލުމުގެ ފުރުސަތު ނުލިބުމުގެ އިތުރުން ރައްޔިތުންތަކެއްގެ އަސާސީ ހައްޤެއް، އެވަރުގެ ބޮޑު އަސާސީ ހައްޤެއް ނިގުޅައިގަތުމުން"
ނޫސްވެރިންގެ ބައްދަލުވުމުގައި ވާހަކަދައްކަވަމުން ވަކީލް ޝީނާ މުހައްމަދު ވިދާޅުވީ ވޯޓްގެ ނަން ކިޔުމާއެކު ކޯޓުގައި އިންނެވި ގާޒީ އެ ވާހަކަދެއްކެވުން ހުއްޓުވާފައިވާކަމަށެވެ. ނަމަވެސް ވޯޓުލުމުގެ ހައްޤު ކަށަވަރުކޮށްދިނުމަކީ ގާޒީގެވެސް ޒިންމާއެއް ކަމަށް ޝީނާ ވިދާޅުވި އެވެ.
"ވޯޓުލުމުގެ ހައްޤުގެ ވާހަކަ އަޅުގަނޑުމެން "ވޯޓު" މި ބަސްވެސް ކޯޓް ރޫމްތެރޭގައި އަޅުގަނޑުމެން ބޭނުންކުރި ހިސާބުން ފަނޑިޔާރު މަނިކުފާނު ވަނީ އަޅުގަނޑުމެން ހުއްޓުވައި، އެ ވާހަކަ ނުދެއްކޭނެ ކަމަށް ވިދާޅުވެފައި"
އިތުރަށް ވާހަކަދައްކަވަމުން ސުއޫދު ވިދާޅުވީ އެ ހާދިސާއަކީ ޕީޕީއެމްގެ ސަޕޯޓަރުންތަކަކާއި އިދިކޮޅު ސަޕޯޓަރުންގެ މެދުގައި ހިނގި ހަމަނުޖެހުމެއްގައި އެއް ބަޔަކު އަނެއް ބައެއްގެ ދިދަ ފަތިތައް ކަނޑާލައި، ކޮންމެވެސް ވަރެއްގެ މާރާމާރީއެއް ހިންގި މައްސަލައެއް ކަމަށާއި އެއީ ޓެރަރިޒަމްގެ އަމަލެއް ކަމަށް ގަބޫލު ނުކުރެއްވޭ ކަމަށެވެ. އަދި އެއީ އެ މީހުން ހައްޔަރުކޮށް، ދެ ފަހަރެއްގެ މަތިން ބަންދުގެ މުއްދަތު އިތުރު ކުރަންޖެހޭ ސަބަބެއް ކަމަށް ގަބޫލު ނުކުރެއްވޭ ކަމަށް ވެސް ސުއޫދު ވިދާޅުވި އެވެ.
ދިދަ ދެމުމުގައި ދިމާވި މައްސަލައަކާ ގުޅިގެން ޕީޕީއެމްގެ ދިދަތަކަކާއި ޖަގަހައަކަށް ގެއްލުން ދިން ކަމުގެ ތުހުމަތުގައި އެމްޑީޕީގެ 18 އެކްޓިވިސްޓަކު ކޮލަމާފުށިން ވަނީ ހައްޔަރުކޮށްފައެވެ.
