އިބޫ އަކީ ޖަވާހިރެއް، ޅ އަތޮޅުން 100 ޕަސަންޓް ވޯޓް ލިބެންވާނެ: ޝެއިހް ހުސެއިން
ވެރިކަން ހަވާލުކުރާ މީހާގެ މައްޗަށް ޝަރުތުތަކެއްވޭ، އޭގެ ތެރެއިން އެންމެ މުހިންމު ކަމަކީ އަދުލުވެރިކަން
ރާއްޖެޓީވީގެ ފަލަސުރުޙީ ޕްރޮގްރާމްގައި ޝެއިހް ހުސެއިން ރަޝީދު
ގުޅިފައިވާ ސިޔާސީ ޕާޓީތަކުގެ ރިޔާސީ ކެންޑިޑޭޓް އިބްރާހީމް މުހައްމަދު ސޯލިހް (އިބޫ) އަކީ ޖަވާހިރެއް ކަމަށާއި ޅ. އަތޮޅުން އެމަނިކުފާނަށް 100 ޕަސަންޓް ވޯޓް ލިބެންވާނެ ކަމަށް ޝެއިހް ހުސެއިން ރަޝީދު ވިދާޅުވެއްޖެއެވެ.
ގުޅިފައިވާ ސިޔާސީ ޕާޓީތަކުން ޅ. ނައިފަރުގައި ހޮނިހިރު ދުވަހުގެ ރޭ ބޭއްވި ޖަލްސާގައި ވާހަކަ ދައްކަވަމުން ޝެއިހް ހުސެއިން ވިދާޅުވީ ވެރިކަމަކީ މާތްﷲ ހަވާލުކުރައްވާ ކަމެއް ކަމަށާއި އެ ވެރިޔާގެ މައްޗަށް ޝަރުތަކެއް އެކުލެވިގެންވާ ކަމަށެވެ. އެގޮތުން އެންމެ މުހިންމު ޝަރުތަކީ އަދުލުވެރިކަން ކަމަށެވެ.
"އެ ވެރިކަން ހަވާލުކުރާ މީހާގެ މައްޗަށް ޝަރުތުތަކެއްވޭ، އޭގެ ތެރެއިން އެންމެ މުހިންމު ކަމަކީ އަދުލުވެރިކަން. އަދުލު އިންސާފު، އަހްލާގެއް ހުރުން، ގޮތެއް ފޮތެއް ހުރުން، ރައްޔިތުންގެ މެދުގައި ހަމަހަމަކަން ގެންގުޅުން، ހަމައެއާ އެކީ ތިމާގެ ނަފްސު ދެކެ ލޯބިވާ ފަދައިން ރައްޔިތުން ދެކެ ލޯބިވުން. އަމާނާތްތެރިވުން، ތިމާއަށް ހަވާލުވާ މުދަލާއި ތަކެއްޗަށް ހިޔާނާތް ނުވުން، މިހެން ގޮސް ޝަރުތަކެއް އެބަހުރި، މި ޝަރުތުތައް ފުރިހަމަވާ މީހާއަށް ކިޔަނީ އޭނާ އަކީ ވެރިޔެކޭ، އެހެންނޫނީޔާ ވާނީ ބަލާވެރިޔަކަށް ނޫންތޯ؟ މިހާރުވެސް ޖެހިގެން މިއުޅެނީ އެ މައްސަލަ ނޫންތޯ އަޅުގަނޑުމެންނަށް" ޝެއިހް ހުސެއިން ވިދާޅުވިއެވެ.
ޝެއިހް ހުސެއިން ވިދާޅުވީ އިދިކޮޅު މީހުން ވަރަށް ގިނައިން ދައްކާ ވާހަކައަކީ އިބޫ ހޮވިއްޖެއްޔާ އިސްލާމްދީން ނޯންނާނެ ވާހަކަކަން ކަމަށާއި އެމީހުން ކަންތައް ކުރަމުންދާ ގޮތުން ދީނަކީ ކޮބައިކަން ވަރަށް ރަނގަޅަށް އެނގިވަޑައިގަންނަވާ ކަމަށެވެ. އަނިޔާވެރިކަމާއި އަދުލު އިންސާފު ގެއްލުވާލުމާއި ވައްކަން ކުރުމާއި ހިޔާނާތްތެރިވުމާއި ދޮގު ހެދުމުގެ އިތުރުން ބެންކޮކަށް ގޮސް އަންހެނުން ހޯދުމަކީ އެ ފަރާތްތަކުން ޤަބޫލުކުރާ ގޮތުގައި ދީން ކަމަށް ޝެއިހް ވިދާޅުވިއެވެ. އަދި އެ "ދީން" ކޯލިޝަނުން ބޭނުންނުވާ ކަމަށް އޭނާ ވިދާޅުވިއެވެ.
ފާދިއްޕޮޅުގެ ހުރިހާ ރައްޔިތުން އިބޫއަށް ވޯޓު ދެއްވުމަށް ޝެއިހް ހުސެއިން ވަނީ އެދިވަޑައިގެންފައެވެ.
"ވަކިން ހާއްސަކޮށް އަޅުގަނޑު ފާދިއްޕޮޅުގެ ރައްޔިތުންނަށް ދަންނަވާނީ 80 ޕަސަންޓް، 70 ޕަސަންޓް، 50 ޕަސަންޓް، 90 ވިދާޅުނުވާށޭ، މި އަތޮޅުގެ 100 ޕަސަންޓް އިބޫއަށް ލިބެން ޖެހޭނެ. ސަބަބަކީ ކޮބައިތޯ؟ ގަނޑަކާއި ޖަވާހިރަކާ ދޭތި އޮންނައިރު ކޮން ކޮޅެއްތޯ ބަރުވާނީ؟ އެހެންވީމަ އިބޫ އަކީ މި އަތޮޅަށް ލިބުނު ބޮޑު ނިއުމަތެއް. އެމަނިކުފާނު ކުރިމަތި ލެއްވީތީ ޝުކުރު އަދާކުރަން" ޝެއިހް ހުސެއިން ވިދާޅުވިއެވެ.
