އިއްތިހާދުގެ ރިޔާސީ ކެންޑިޑޭޓް އިބްރާހިމް މުހައްމަދު ސޯލިހް ކ. ގާފަރަށް ހޮނިހިރު ދުވަހު ވަޑައިގެންނެވި އިރު އެރަށުން ވެސް ވަނީ އެމަނިކުފާނަށް ހޫނު މަރުހަބާއެއް ކިޔާފައި އެވެ. އޭގެ ތެރެއިން ވެސް ފާހަގަ ކޮށްލެވުނު އެއް ބަޔަކީ ސިވިލް ސާވީސްގެ މުވައްޒަފުންތަކެއް އިބޫއަށް ތާއިދުކޮށް ނިކުތުމެވެ. އޭގެ ސބަބަބުން ރަށުގައި ތިބި އާންމު މެމްބަރުންނަށް ލިބުނީ އާ ހިތްވަރަކާއި ޖޯޝެކެވެ.
ގާފަރު ސްކޫލުގައި މަސައްކަތްކުރާ އިކްރާމް މާހިރު އާއި އަހްމަދު ސޮބާހް ވެގެން ދިޔައީ ހަމަ އެކަނި އިބޫއަށް ތާއިދުކޮށް ނިކުތް ދެ މީހުނަށް އެކަންޏެއް ނޫނެވެ. އިބޫ އެރަށަށް ވަޑައިގެން ވަގުތު އެމީހުން ނިކުތުމުގެ ސަބަބުތައް ވެސް މީޑިޔާތަކާ ހިއްސާ ކުރެި އެވެ. ސޮބާހް ރާއްޖެއެމްވީ އާ ވާހަކަ ދައްކަމުން ބުނީ އެމީހުން ނިކުތީ އަނިޔާއާ ދެކޮޅަށް ކަމަށެވެ. އަދި ބޭ އިންސާފާއި އަނިޔާއާ ދެކޮޅަށް އޭނާ ނިކުތީ ފިޔަވަޅެއް އަޅާފާނެތީ ބިރެއް ނެތި ކަމަށް ސޮބާހް ބުންޏެވެ. ގާފަރުގައި ތިބި އިބޫގެ ސަޕޯޓަރުންނާއި އެކު ބޭއްވި ބައްދަލުވުން ހުށައަޅައި ދީ، ގާފަރުގެ ތަރައްގީއަށް ބޭނުންވާ ކަންތައްތައް އިބޫއަށް ހުށައަޅައި ދީފައި ވަނީ ގާފަރު ސްކޫލުގައި އިސްލާމް ޓީޗަރެއްގެ ގޮތުގައި ހުންނެވި ސޮބާހު އެވެ.
ސްކޫލުގެ ޓީޗަރެއްގެ ގޮތުގައި ގިނަ ދުވަސްތަކެއް ވަންދެނ މަސައްކަތް ކޮށްފައިވާ އަދި މިއަދު ވެސް އެ ވަޒީފާގައި ދެމިހުރި އިކްރާމް ވެސް ބުނީ އޭނާ ނިކުމެ ހުރީ ރާއްޖޭގައި ހިނގަމުންދާ އަނިޔާއާ ފަސާދަ ކޮރަޕްޝަނާ ދެކޮޅަށް ކަމަށެވެ. އޭނާ ޖެހިލުމެއް ނެތި މަސައްކަތް ކުރަން ޖެހުނީ އިސްލާހީ މަސައްކަތުގައި ނިކުންނަން ކޮންމެހެން ޖެހޭ ކަމަށް ދެކިގެން ނެވެ. ގާފަރު ސްކޫލުގައި މަސައްކަތްކުރާ އަޖްލާން ރަޝާދު އާއި އަހްމަދު އާޒިމްވެސް ނިކުތީ "އަނިޔާވެރިކަން" ބަދަލު ކުރަން ބޭނުންވެގެން ކަމަށް ބުނެ އެވެ.
ގާފަރު ކައުންސިލް އިދާރާގައި މަސައްކަތްކުރާ ހަސަން ހަމީސް އާއި އަލީ ނަސީރާއި ހަސަން ފަހީމް ވެސް އިބޫއަށް މަރުހަބާ ކިޔަން ފާޅުގައި ނިކުތީ ކޮންމެ ފިޔަވަޅެއް އެޅިޔަސް ހެޔޮ ކަމަށް ބުނެވެ. އެމީހުން ފަރުވާލެއް އެކަމަށް ނެތެވެ.
އިބޫ ގާފަރަށް ވަޑައިގެން އެރަށުގައި ތިބި ސަޕޯޓަރުންނާ ސަލާމް ކުރައްވަމުން ގެންދެވިރު ޖެހިލުމެއްނެތި ނިކުމެތިބި ސަރުކާރުގެ މި މުވައްްޒަފުންނަށް މީހުންގެ ސަމާލުކަން ދިޔަ އެވެ. ރަށުތެރޭގައި ވެސް އެމީހުންގެ ވާހަކަތައް ދެއްކި އެވެ. އެމީހުން ވެސް ބިރުނުގަނެ ނިކުން ވާހަކަ އެވެ.
ގާފަރު ސިއްހީ މަރުކަޒުގައި މަސައްކަތްކުރާ އަބްދުﷲ ފަހުމީ ވެސް އިބޫއަށް މަރުހަބާ ކިޔުމަށް ނިކުތީ އޭގެ ސަބަބުން ފިޔަވަޅެއް ނާޅާނެ ކަމުގެ ޔަގީންކަމެއް އޮވެގެނެއް ނޫނެވެ. ވަޒީފާގެ ބިރު ސިއްޙީ ދާއިރާގައި މަަސައްކަތްކުރާ މުވައްޒަފުންނަށް އެހެން ރަށްރަށުގައި އޮތް ހެން ގާފަރުގައި ވެސް އެބަ އޮތެވެ. ނަމަވެސް އޭނާ ވެސް މި ފަހަރު ސަޕޯޓުކުރާ ރިޔާސީ ކެންޑިޑޭޓަކީ އިބޫ ކަމަށްވާތީ ސަޕޯޓަރުންގެ ސަފުން ގޮސް ޖާގަ ހޯދީ އެވެ.
އިބޫއަށް މަރުހަބާ ކިޔާ ސަލާން ކުރުމަށް ގާނޫނީ އެއްވެސް ހުރަހެއް ނެތްއިރު ގާފަރުގައި ތިބި މުވައްޒަފުން ވެސް ނިކުތީ އެހެން އެއްވެސް ހުރަހެއް އޮތް ކަމަށް ނުދެކެ އެވެ. ސަރުކާރުގެ ވަޒީފާއަދާ ކުރާ މުވައްޒަފުންގެ ތެރެއިން ސަރުކާރާ ދެކޮޅު މުވައްޒަފުންނަށް ވަޒިފާގެ ބިރުވެރިކަން ދައްކައި ބައެއް ވަޒީފާއިން ވަކި ކުރަމުންދާ މި ދުވަސްވަރު މިފަދަ ގޮތަކަށް މުވައްޒަފުން ބިރުފަހަނައަޅާ ނިކުތުމަކީ ގިނަ ބައެއްގެ ސަމާލުކަން އަންނަ ކަމެކެވެ. އެމީހުނަށް އެތައް ބައެއްގެ ތައުރީފާއި ޝުކުރު ވެސް އެތައް ބަޔަކު އޮއްސަ އެވެ. އެމީހުންނަކީ ވަކި ސިޔާސީ ބައެއްގެ އަޅުންނޫން ކަން އެމީހުން ދައްކާލީތީ އެވެ. ވަޒީފާއާ އޭނާގެ ފިކުރާ އެއީ ދެ އެއްޗެއްގެ ގޮތުގައި އޮންނަ ޖެހޭނެ ކަމަށް ދެކިގެންނެވެ.
