ރައީސް ޔާމީންގެ މައްޗަށް ކުރެވެމުންދާ ސިހުރުގެ ތުހުމަތުތައް ތަހުޤީޤުކުރުމަށް އަދާލަތު ޕާޓީން ގޮވާލައިފި

ކުރީގެ ނާއިބް ރައީސް އަހުމަދު އަދީބު ހާމަކުރެއްވި މައުލޫމާތުތަކުގައި ރައީސް ޢަބްދުﷲ ޔާމީންގެ މައްޗަށް ސިހުރުވެރިކަމާ ގުޅޭގޮތުން ކުރައްވާފައިވާ ތުހުމަތުތައް ތަހުޤީޤުކޮށް ކުރިޔަށް އޮތް ރިޔާސީ އިންތިޚާބުގެ ކުރިން އެކަންކަމުގެ ޙަޤީޤަތް ރައްޔިތުންނަށް ހާމަކޮށްދިނުމަށް ދިވެހި ފުލުހުންނަށާއި ކަމާގުޅުންހުރި އެހެނިހެން މުއައްސަސާތަކަށް ޢަދާލަތު ޕާޓީން ގޮވާލައިފިއެވެ.

އަދާލަތު ޕާޓީން ނެރެފައިވާ ނޫސް ބަޔާނުގައި ބުނެފައިވަނީ ރައްޔިތުން އިންތިޚާބުގައި ވޯޓުދިނުމުގެ ކުރިން ރިޔާސީ ކެންޑީޑޭޓުންގެ މައްޗަށް ކުރެވޭ މިފަދަ ޖިނާއި ތުހުމަތުތަކުގެ ޙަޤީގަތް ހާމަކުރުމަކީ ދައުލަތުގެ ތަހުޤީޤީ އިދާރާތަކުގެ ޤާނޫނީ ޒިންމާއެއް ކަމުގައި އެ ޕާޓީން ދެކޭ ކަމަށެވެ. އަދާލަތު ޕާޓީގެ ނޫސް ބަޔާނުގައި އިތުރަށް ބުނެފައިވަނީ ހަމައެއާއެކު ދައުލަތުން ވަކިފަރާތަކަށް ނުޖެހި ހިންގާ މިނިވަން ތަހުޤީޤަކުން އަހުމަދު އަދީބު ކުރައްވާފައިވާ ތުހުމަތުތަށް ސާބިތުވެއްޖެ ނަމަ، ހ. ދޫވެހި، ޢަބްދުﷲ ޔާމީން، ޤާނޫނީ ހަމަތަކުގެ މަތިން ރައީސުލްޖުމްހޫރިއްޔާގެ މަޤާމުން އަޒުލުކުރަންޖެހޭނެ ކަމުގައިވެސް އެ ޕާޓީން ދެކޭ ކަމަށާއި، އަދި ތައުބާވެ އެކަން އިއުލާން ކޮށްފުމަށްދާންދެން އިތުރު އިންތިޚާބީ މަޤާމަކަށް ވާދަކުރުމުގެ ފުރުސަތު ދެވިގެން ނުވާނެ ކަމަށެވެ.

މިފަދަ މީހަކަށް ރިޔާސީ އިންތިޚާބެއްގައި ވާދަކުރުމުގެ ފުރުސަތު ދިނުމަކީ ދައުލަތުގެ މުއައްސަސާތަކަށް ޝަރުޢީ އަދި ޤާނޫނީ ހަމަތަކުގެ މަތިން ކުރެވޭނެ ކަމެއްނޫން ކަމަށާއި،އަދި އެފަދަ މީހެއްގެ ނަން ވޯޓު ކަރުދާހުގައި އޮތް ނަމަވެސް އެ މީހާ އިސްލާމީ ޤައުމެއްގެ އެންމެ މަތީ ވެރިކަމަށް އިންތިޚާބު ކުރުމަށް ވޯޓު ދިނުމަކީ އިސްލާމީ ޝަރީޢަތުގެ އަލީގައި މުސްލިމުންގެ މައްޗަށް ޖާއިޒުވެގެންވާކަމެއް ވެސް ނޫން ކަމަށް އަދާލަތު ޕާޓީން ނެރެފައިވާ ނޫސް ބަޔާނުގައި ބުނެފައިވެއެވެ.

އަދާލަތު ޕާޓީގެ ބަޔާނުގައި އިތުރަށް ބުނެފައިވަނީ ސިހުރުވެރިކަމަކީ އިސްލާމީ ޝަރީޢަތުގައި ކަނޑައެޅިގެން މަނާކުރައްވާފައިވާ ކަމަކަށްވެފައި އަދި ސުންނަތް ޖަމާޢަތުގެ އަޤީދާއާ ޚިލާފު، ގަދަ ކީރިތި ވަންތަ ﷲ ގެ ޙަޟުރަތާ އިތުރު ފަރާތެއް ބައިވެރިކުރުމުގެ ތެރެއިންހިމެނޭ ކަމަކަށް ވާއިރު އެ ނުބައިކަންބޮޑު ޢަމަލުގައި ބައިވެރިވާ މީހަކީ އިސްލާމީ ޤައުމެއްގެ ވެރިކަމަށް ކުފޫހަމަވާމީހެއް ކަމަށާއި، އަދި އެފަދަ މީހާއި ދިވެހިރާއްޖޭގެ ޤާނޫނުއަސާސީގެ 109 ވަނަ މާއްދާގެ (ށ) ގައި ބަޔާންކޮށްފައިވާ ރައީސުލްޖުމްހޫރިއްޔާއަކަށް އިންތިޚާބުކުރާ މީހެއްގައި ހުންނާންވީ ޝަރުޠުތަކުގެތެރެއިން މުސްލިމަކު ކަމުގައި ވުމާއި، ސުންނަތް ޖަމާޢަތުގެ މީހަކު ކަމުގައި ވުމުގެ ދެ ޝަރުޠު އުނިވެފައިވާ މީހެއް ކަމަށެވެ.

ސިހުރުވެރިކަމަކީ އިސްލާމީ ޝަރީޢަތުގައި ހައްދު ކަނޑައެޅިގެންވާ ކުށަކަށްވެފައި ދިވެހިރާއްޖޭގެ ޖިނާއީ އިޖުރާއާތުގެ ޤާނޫނުގެ 1205 ވަނަ މާއްދާގެ (ހ) އިސްލާމީ ޝަރީޢަތުގައި ހައްދުކަނޑައެޅިގެންވާ ކުށްތަކަށް އިސްލާމީ ޝަރީޢަތުގައި ކަނޑައެޅިފައިވާ އަދަބު ދިނުމަށް ގޮވާލާކަމަށް އަދާލަތު ޕާޓީގެ ބަޔާނުގައިވަނީ ބުނެފައެވެ.

ސިހުރު ހެދުމާއި ސިހުރުވެރިންގެ ގާތަށް ގޮސް ސިހުރުހެއްދުމާއި ސިހުރުވެރިން ދައްކާ ސިހުރުގެ ވާހަކަތަކަށް އަމަލުކުރުމާއި އެވާހަކަތައް ޤަބޫލުކުރުމާއި މިފަދަ އެންމެހާ ކަންކަމަކީ އިސްލާމީ ޝަރީޢަތުގެ މަތިވެރި އިސްތިލާޙުގައި ކަނޑައެޅިހެން ހަރާމްކުރައްވާފައިވާ ކަންކަމަށް ވުމުގެ އިތުރަށް އެކަންކަމަކީ ފަނާކުރަނިވި ބޮޑެތި ހަތް ފާފައިގެ ތެރޭގައި ހިމެނޭ ނުބައިކަން ބޮޑު ފާފައެއް ކަމަށެވެ. އަދާލަތު ޕާޓީގެ ބަޔާނުގައި އިތުރަށް ބުނެފައިވަނީ ސިހުރުވެރިކަމަކީ ކިރިތި ޤުރުއާނާއި މާތް ރަސޫލާ (ސ) ގެ ސުންނަތުގެ އަލީގައި ސުންނަތް ޖަމާޢަތުގެ ދަންނަބޭކަލުން އިޖުމާޢުވެވަޑައިގެންފައިވާ ގޮތުގައި ޝިރުކުގެ ތެރޭގައި ހިމެނޭ ކަމެއް ކަމަށެވެ.

ސިހުރު ހެދުމާއި ސިހުރުވެރިންގެ ގާތަށް ގޮސް ސިހުރުހެއްދުމާއި ސިހުރުވެރިން ދައްކާ ސިހުރުގެ ވާހަކަތަކަށް އަމަލުކުރުމާއި އެވާހަކަތައް ޤަބޫލުކުރުމާއި މިފަދަ އެންމެހާ ކަންކަމަކީ އިސްލާމީ ޝަރީޢަތުގެ މަތިވެރި އިސްތިލާޙުގައި ކަނޑައެޅިހެން ހަރާމްކުރައްވާފައިވާ ކަންކަމަށް ވުމުގެ އިތުރަށް އެކަންކަމަކީ ފަނާކުރަނިވި ބޮޑެތި ހަތް ފާފައިގެ ތެރޭގައި ހިމެނޭ ނުބައިކަން ބޮޑު ފާފައެއް ކަމަށެވެ. އަދާލަތު ޕާޓީގެ ބަޔާނުގައި އިތުރަށް ބުނެފައިވަނީ ސިހުރުވެރިކަމަކީ ކިރިތި ޤުރުއާނާއި މާތް ރަސޫލާ (ސ) ގެ ސުންނަތުގެ އަލީގައި ސުންނަތް ޖަމާޢަތުގެ ދަންނަބޭކަލުން އިޖުމާޢުވެވަޑައިގެންފައިވާ ގޮތުގައި ޝިރުކުގެ ތެރޭގައި ހިމެނޭ ކަމެއް ކަމަށް އަދާލަތުގެ ޕާޓީގެ ބަޔާނުގައިވަނީ ބުނެފައެވެ.